प्रेरित 3 - चितवनिया थारुपतरुस एक जन लङड मन्सेके डउल बनोलिय 1 एक दिन पतरुस हसे युहन्ना दिनाक तिन बजेवरि परथानाक जुनवामा मन्दिरवामा जाइ रहलइ। 2 वहवाँ एक जन जनमतिक लङड मन्सेके सबदिन मन्सावाह बोक यानके मन्दिरवाक सुन्दर नाउँक दुवरियामा धदेइ। उअ मन्सावा मन्दिरवामा यइलि-गेलि मन्सावानिसे भिख मङिय। 3 जब उअ पतरुस हसे युहन्नाके मन्दिरवामा जाइकि देखलिय, तब उअ हुनुकरसे भिख मङलिय। 4 हुनुका वकरेके टक लगाके हेरलइ हसे पतरुस वकरेके कहलिय, “अरे! हमारवरि हेरहि।” 5 उहेसे उअ मन्सावा हुनुकरसे किहो पउबहि कहके यसरा करके हुनुकरवरि हेरलिय। 6 तब पतरुस वकरेके कहलिय, “सोन हसे चाँनि मोरसाङे हइने बडइ, बाकि मोरसाङे जथि बडइ, उहे मुइ तोरके देबहिँ। नासरतक येसु ख्रिस्टक नाउँमा तुइ उठके बुलहि।” 7 तब पतरुस वकर दहिनि हथवा धरके उठोलिय हसे वइघरहिँ वकर टङवा हसे घुठियामा बोल्ह यलइ। 8 उअ उफरके यापन टङवामा ठडियाके बुले लगलिय। वकरपाछा उअ बुल्ते, उफरते हसे परमेस्वरक बखान करते हुनुकरसाङे मन्दिरवामा गेलिय। 9 जब वहवाँक जम्मे मन्सावाह वकरेके बुलइकि हसे परमेस्वरक बखान करइ देखलइ, 10 हुनुका वकरेके मन्दिरवाक सुन्दर कहल दुवरियामा बइठके भिख मङलाहरा कहके चिनलइ हसे उअ मन्सावाके बुलइकि देखके यचम्म मनते छक परलइ। पतरुस मन्दिरवामा उपदेस देलिय 11 जब मन्सावाह उअ डउल भेलि मन्सावाके सोलोमन कहलि ओसरावामा पतरुस हसे युहन्नाक साङे-साङे बुलइकि देखके, हुनुका यचम्म मानके वकर लघिना दगुरते यलइ। 12 इअ देखके पतरुस हुनुकाके कहलिय, “अरे इस्राएलक ददेर-भाइसभ, यकर बारेमा यपनहुँसभ केहके छक परल बडहुँ? हसे हमरा यापन सक्ति हसे भक्तिसे यकरेके बुले सकाह बनोले बडहुँ सोचके यपनहुँसभ याँ बउले हमराके केहके हेरइ बडहुँ? 13 अब्राहम, इसहाक हसे याकुबक परमेस्वर, हमार पिता पुरखाक परमेस्वर, यापन सेवक येसुजिके महिमित करले बडसि। यपनहुँसभ हुनेके मारे परतइ कहके सपदेलहुँ। पिलातस हुनेके छाड देवेके विचार करले रहलसि, बाकि यपनहुँसभ वकर यागा येसुजिके इन्कार करलहुँ। 14 यपनहुँसभ पवितर हसे निरदोस मन्सेके अस्विकार करके, बरु एक जन ज्यानमाराके छाड देवेके माङ करलहुँ। 15 जिवन देलहराके यपनहुँसभ मारलहुँ, बाकि परमेस्वर हुनेके मरलिसे फेनि जिउतोलसि। हमरा इअ बतवाक साछि बडहुँ। 16 येसुजिक नाउँमा विस्वास करलेसे यपनहुँसभ देखलि हसे चिनलि इअ मन्सावा बरियार भेल बडिय। येसुजिक नाउँमा विस्वास करलेसे इअ मन्सावा यपनहुँसभक यागा डउल भेल बडिय। 17 “अरे मोर ददेर-भाइसभ, मोर थाह बडइ, कि यपनहुँ येसुजिके हइने जानके मारलहुँ हसे यपनहुँसभक सासकसभ फेनि वसने करलइ। 18 बाकि परमेस्वर यापन अगमवक्तावानिसे फदकलि अगमवाडि यसके पुरा करलसि। हुने ख्रिस्टके दुःख भोगबसि कहके अगमवक्तावानिक मुहवासे बहुत यागा अगमवाडि फदकले रहलसि। 19 उहेसे याबे यापन-यापन पाप मानके परमेस्वरक लघिना यउहुँ, तब यपनहुँसभक पाप छमा हतइ, ताकि प्रभुक उपस्थितिसे यपनहुँसभक तहिँया आराम यतइ हसे 20 यसने यपनहुँसभके बचावेके तहिँया परमेस्वर यापन छानल ख्रिस्ट येसुजिके पठादेबसि। 21 परमेस्वर बहुत यागा यापन पवितर अगमवक्तावानिक मुहवासे कहलि नहिँया जम्मे चिजुवा लउठा बनोइलइ येसुजि स्वरगमा रहे परतइ। 22 मोसा फेनि यसके कहले बडिय, ‘परमप्रभु तोहार परमेस्वर मोरके उठोलि नहिँया तोहार ददेर-भाइसे फेनि एक जन अगमवक्ताके उठोबसि हसे तोहरा हुनेक कहलि जम्मे बतवा माने परतइ। 23 बाकि जुने उअ अगमवक्ताक कहलि बतवा हइने मनसह, उअ परमेस्वरक मन्सावानिसे छुटियतइ हसे नास हतइ।’ 24 “समुएल अगमवक्तासे लेके वकरसे पाछा यइलि जम्मे अगमवक्तावाह फेनि इअ दिनवामा घटल घटनाक बारेमा कहले बडइ। 25 तोहरा अगमवक्तावानिक हसे परमेस्वर तोहार पुरखावानिसाङे बनोलि वाचाक हकवाल हखह। परमेस्वर हमार पुरखा अब्राहमके यसके कहलसि, ‘तोर सन्तनवानिसे धरतियाक जम्मे मन्सावाह आसिस पउतइ।’ 26 यपनहुँसभके यापन-यापन दुस्ट कमवासे फिराके आसिस देवेके तहिँया परमेस्वर यापन सेवक येसुजिके सबसे यागा तोहरा इस्राएलिसभक लघिना पठोलसि।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.