प्रेरित 28 - चितवनिया थारुपावल माल्टा ठिसवामा 1 जब हमरा डउलसे बचके तिरवामा निकडलहुँ, उअ ठिसवाक नाउँ माल्टा हखइ कहके हमरा थाह पउलहुँ। 2 उअ ठउरियामा रहलहरा मन्सावाह हमराके बहुत दाया देखोलइ। तखनहिँ पानि परल रहलइ हसे जाड बढइ रहलइ, उहेसे हुनुका यागि बारके हमराके तापे बलोलइ। 3 जब पावल एक बोझा काठि उठाके यगियामा घललिय, तब यगियाक धिकलिसे एगुडा बिखियार साँप निकडलिय हसे वकर हथवामा घेउरेलिय। 4 तब वकर हथवामा सपवा झुन्डियाल देखके उअ ठउरियाक मन्सावाह एक-दोसरि जनसाङे यसके कहे लगलइ, “इअ मन्सावा सदियो ज्यानमारा हखिय। इअ समुनदरवासे त बचके निकडलिय, बाकि न्यायसे बचे हइने सकलिय।” 5 बाकि पावल उअ सपवाके यगियामा झटकार देलिय हसे वकर किहो फेनि हइने भेलइ। 6 बाकि उअ ठउरियाक मन्सावाह, याबे पावलक हथवा फुलके यरमरका भहडके मरबिय कहके हेरइ रहलइ। हुनुका जबड जुगलइ किहो फेनि हइने भेल देखके यापन विचार बदलके यसके कहलइ, “इअ मन्सावा त सदियो देवता हखिय।” 7 पब्लियस नाउँक एक जन मन्से उअ ठिसवाक मुखिया रहलिय। हमार पुगलि ठउरियाक लजिके वकर जागा रहलइ। उअ हमराके यापन घरवामा स्वागत करलिय हसे तिन दिनलइ हमराके डउलसे सेवा-सत्कार करलिय। 8 उहे समयमा वकर बाबाक जर याके हसे रकतमासि परके मनियाइल रहलिय। तब पावल वकर लघिना जाके यापन हथवा राखके परथाना करदेलिय हसे उअ वइघरहिँ डउल भेलिय। 9 इअ देखके, उअ ठिसवाक याको मनियइलि मन्सावाह फेनि यलइ हसे डउल भेलइ। 10 उअ ठउरियाक मन्सावाह हमराके खाँ यादर करे लगलइ हसे जब हमरा पानि-जहजवामा चढके यावे लगलहुँ, तब हुनुका हमार चाहि लगना जम्मे चिजु हमराके देलइ। 11 तिन महिना पाछा, हमरा अलेक्जेन्ड्रियाक एगुडा पानि-जहजवामा चढलहुँ। इअ जहजवा जडवामा इअ ठिसवामा रहलिय। उअ जहजवाक यागावरि जउराहा देवतासभक मुरति बनावल रहलइ। 12 हमरा सुराकुसाइ नाउँक सहरवामा पुगलहुँ हसे वहवाँ तिन दिनलइ रहलहुँ। 13 वकरपाछा वहवाँसे हमरा तिरवा-तिरवा भके रेगियन सहरवामा पुगलहुँ। दोसरि दिन बयार दखिनेसे चललइ हसे यसने दु दिन पाछा हमरा पटिओलि नाउँक सहरवामा पुगलहुँ। 14 उअ सहरवामा हमरा किहो विस्वासिसभके पउलहुँ। हुनुका हमराके एक हप्तालइ रहेके बिन्ति करलइ। हमरा वहवाँ एक हप्ता रहके रोम सहरवावरि गेलहुँ। 15 जब रोम सहरवाक विस्वासिसभ हमार बारेमा सुनलइ, हुनुका अप्पियस बजार हसे तिन-पाटि कहल ठउरियालइ हमराके भेटे यलइ। हुनुकाके देखके पावल याट पउलिय हसे परमेस्वरके धन्यवाद देलिय। पावल रोम सहरवामा 16 जब हमरा रोम सहरवामा पुगलहुँ, तब पावलके एक जन सिपाहिक देखभालमा एगुडा घरमा यसकरे रहेके अनुमति मिललइ। 17 तिन दिन पाछा पावल वहवाँक यहुदि यगुवासभके बलोलिय। जब हुनुका जामा भेलइ, उअ कहलिय, “अरे भयवाह, मुइ हमार जतियाक हसे पिता-पुरखासे चलते याइल रितिरिवाजक विरोधमा किहो हइने करले फेनि मोरके यरुसलेममा पकडके रोमि सरकारक जिम्मामा सोपलह। 18 रोमि सरकार छानबिन करलेपर मोरके छाड देवेके खोजइ रहलइ, हुनुका मोरके मृत्यु दन्ड देवेके लाइक किहो दोस हइने पउलइ। 19 बाकि जब यहुदि यगुवासभ मोर विरोध करलइ, तब मोर यापन जतियाक विरोधमा दोस लगावेके किहो बात हइने भेलेसे फेनि, मुइ सम्राट कइसर लघिना बिन्ति करहि परलइ। 20 मुइ यपनहुँसभके भेटेके तहिँया हसे हमरा इस्राएलियाह यसरा करलि मुक्ति देलाहर ख्रिस्ट यासकल बडसि कहके विस्वास करलेसे मुइ केहके याजु सिकरियासे बन्हाइल बडहिँ कहके बातचित करेके तहिँया बलोले बडहिँ।” 21 तब हुनुका पावलके कहलइ, “हमरा यपनहुँक बारेमा यहुदियासे न किहो चिठि पउले बडहुँ, न त हमार कुनहुँ मन्सावाह याके यपनहुँक विरोधमा हमराके किहो खराब बात सुनोले बडइ। 22 बाकि हमरा त यपनहुँक विचार सुने खोजइ बडहुँ, केहकेकि हमरा यपनहुँक इअ लउठि दफवाक विरोधमा मन्सावानिके जहवाँ-तहवाँ फदकइ थाह पउले बडहुँ।” 23 उहेसे हुनुका पावलक बतवा सुनेके तहिँया एगुडा दिन तोकलइ। उअ दिनवामा बहुत जन वकर डेरवामा यलइ हसे बिहनासे साँझलइ उअ परमेस्वरक राजक बारेमा हुनुकाके सिछा देलिय। उअ मोसाक व्यवस्था हसे अगमवक्तावानिक लिखलि कितबवासे येसुजिक बारेमा बुझोते हुनुकाके विस्वासमा यानेके कोसिस करलिय। 24 वकर कहलि बतवा सुनके कतेक जन विस्वास करलइ हसे बाकि कतेक जन विस्वास हइने करलइ। 25 जब हुनुका एक-यापसमा सहमत हइने भेलइ, तब हुनुका वहवाँसे गेलिसे यागा पावल यसके कहलिय, “पवितर-आत्मा यपनहुँसभक पुरखावानिके यापन अगमवक्ता यसइयासे कहलि बतवा सदियो हखइ। केहकेकि हुने यसके फदकलेसे, 26 ‘इअ मन्सावानिक लघिना जाके कहइ, तोहरा मोर वचन सुनेके त सुनसह, बाकि हइने बुझसह, हेरेके त हेरसह, बाकि हइने देखसह!’ 27 केहकेकि इअ मन्सावानिक मनवा भोथर भेल बडइ हसे हुनुकर कनवा मटखर भेल बडइ। हुनुका यापन यखिया बन्द करले बडइ, नतक हुनुकर यखिया देखतिय, कनवासे सुनतइ, हृदयसे बुझतइ। तब हुनुका यापन मनवा मोरवरि फिरोतइ हसे मुइ हुनुकाके डउल बनोतहिँ।” 28 “उहेसे तोहार इअ थाह हखइ कि, परमेस्वरक मुक्तिक सुसमाचार अयहुदि जतियाक तहिँया पठोले बडसि हसे हुनुका उअ सुनतइ।” 29 [पावल इअ बतवा कहलेपर, यहुदियाह एक-दोसरि जनसाङे ठोरा-बोलि करते बिदा भेलइ।] 30 पावल पुरा दु बरसलइ यापन लेलि डेरवामा रहलिय हसे वकरेके भेटे यलहरवा जम्मे जनके उअ स्वागत करिय। 31 उअ पुरा सहाससे परमेस्वरक राजक बारेमा परचार करते प्रभु येसु ख्रिस्टक बारेमा सिछा दिय हसे कुनहुँ फेनि वकरेके रोकेके कोसिस हइने करलइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.