प्रेरित 27 - चितवनिया थारुरोमवरि पावलक यातरा 1 जब हमार इटालिया देस जायके निरनय भेलइ, तब फेस्तस पावल हसे याको कइदियानिके युलियस नाउँक रोमि सम्राटक खास सिपहियवानिक कप्तनवाक जिम्मा लगादेलइ। 2 हमरा एड्रामिटेनोस सहरवासे एसिया छेतरक बहुत बन्दरगाहासभ हखते गेलहर एगुडा पानि-जहाजमा चढके यातरा सुरु करलहुँ। हमारसाङे माकेडोनिया छेतरक थेसलोनिके सहरवासे याइल अरिस्तारखस नाउँक एक जन फेनि रहलिय। 3 दोसरि दिन हमरा सिदोन सहरवामा पुगलहुँ। वहवाँ कप्तान युलियस पावलके दाया करके वकर सङहतियवानि लघिना जाके चाहि लगना चिजु मदत लेवेके अनुमति देलिय। 4 जब वहवाँसे हमरा फेरि पानि-जहजवामा चढके यातरा सुरु करलहुँ, तब धुधुइ-बयार चललेसे हमरा साइप्रस ठिसवाक तिरवा-तिरवा भके गेलहुँ, 5 हसे हमरा किलिकिया हसे पामफेलिया छेतरक तिरवामा भके समुनदरवा पार करके, लुकिया छेतरमा भेलि माइरा सहरवामा पुगलहुँ। 6 वहवाँ कप्तनवा युलियस अलेक्जेन्ड्रिया सहरवासे इटालिया देस गेलहर एगुडा पानि-जहाज पउलेसे उअ हमराके उहे पानि-जहजवामा चढादेलिय। 7 हमरा बहुत दिनलइ रसेरसे करते गारहसे क्निडस सहरवामा पुगलहुँ हसे वहवाँ हमराके धुधुइ-बयरवा यागा बढके जाए हइने देलेसे सालमोन कहल ठउरियाक दखिनेवरि भके क्रेट ठिसवाक तिरवा-तिरवा गेलहुँ। 8 हमरा खाँ दुःखसे ठिसवाक तिरवा-तिरवा भके लासिया सहरवाक लजिके डउल बन्दरगाह कहल ठउरियामा यापुगलहुँ। 9 हमरा वहवाँ पुगेके बहुत समय लागल रहलइ हसे समुनदर यातरा फेनि डेरटावनेक भेल रहलइ। तखनहिँ यहुदियानिक उपास रहेके दिन फेनि बितिसकल रहलइ। तब पावल हुनुकाके यसके कहके सल्लाह देलिय, 10 “हेरह सङहतियवाह, मोर यसनुक लगइ बडइ कि, यगर हमरा यहवाँसे याको यागा जेबहुँ जउँ, जहजवा हसे मालसमनवा मतरे नास नाहिँ हतइ, बाकि हमरा फेनि मरे सकबहुँ।” 11 बाकि झ्यालखनवाक कप्तनवा पावलक कहलि बतवा हइने पतियाके पानि जहजवा चलोलहराक हसे पानि जहजवाक मलिकवाक बतवा खुभे पतियलिय। 12 इअ बन्दरगाहवामा जाडक जुन बितावेके हइने डउल रहलइ। उहेसे जसके भेले फेनि फोनिक्समा पुगेके वहवाँ जाडक जुन बितावेके सल्लाह देलइ। फोनिक्स क्रेटक एगुडा बन्दरगाह हखिय, जुने दखिने-पछिय हसे उतरे-पछियवरि घुमल बडिय। समुनदरवामा धुधुइ-बयार यलइ 13 जब दखिनेवरिसे रसेरसे बयरवा चले लगलइ, याबे हमार योजना पुरा हतइ कहके सोचके, हुनुका जहजवाक लङ्गरवा निकडोलइ हसे क्रेटक तिरवा-तिरवा भके जाए लगलइ। 14 बाकि एकिघर ठिसवावरिसे उतरे-पुरवे कहल एगुडा जबड धुधुइ-बयार बहलइ। 15 जब हमार जहाजवा धुधुइ-बयरवाक चपेटवामा परलिय हसे यागा बढे हइने सकलिय, हमरा बयरवा जहजवाके जहवाँ लिगिय लेले जइय कहके छाड देलहुँ। 16 जब हमरा क्लउडा कहल एगुडा झिनिक ठिसवाक तिरवामा भके गेलहुँ, तब हमार जहजवा धुधुइ-बयरवासे इचिका बचे सकलिय। उहेसे हमरा जहजवाक पाछावरि बान्हलि झिनकि डोङवाके गारहसे बचावे सकलहुँ। 17 वकरपाछा जहजवा चलोलहराह डोङवाके जहजवा वपरा यनलइ। वकरपाछा हुनुका डोरियामाहे जहजवाके बरियारसे बान्ह देलइ। याबे जहजवा लिबियाक तिरवावरिक कतहुँ बलुवामा भसबिय कि कहके हुनुका डेरेलइ। उहेसे हुनुका जहजवाक गति कम बनावेके तहिँया लङ्गरवाके समुनदरवामा झारदेलइ हसे जहजवाके धुधुइ-बयरवाक भरमा छाड देलइ। 18 जब जबडि धुधुइ-बयरवा बहते रहलिय, दोसरि दिन हुनुका जहजवामा भेलि कतेक मालसमनवाह फाँके लगलइ, 19 हसे तिसरि दिन, हुनुका यपने हथवासे जहजवा चलोनवा जम्मे समानवाह समुनदरवामा फाकदेलइ। 20 बहुत दिनलइ हमरा न बेरिया न तरगन देखे पउलहुँ। तखनहिँ जबड धुधुइ-बयार चलल रहलइ हसे याखिरमा हमार बचेके यसरा फेनि हेरेलइ। 21 हुनुकर जेउना हइने करल बहुत दिन भेल रहलइ। उहेसे पावल जम्मे जनक यागा ठडियाके यसके कहलिय, “हेरहुँ सङहतियवाह, यपनहुँसभ मोर सल्लाह मानके क्रेटसे जहजवा हइने चलावेके रहलइ। यगर यपनहुँ मोर सल्लाह मनले रहतह जउँ, यसनुक दुःख हसे मालसमनवाक नस्ट फेनि नाहिँ हखतिय। 22 बाकि याबे याट करह कहके मुइ यपनहुँसभके बिन्ति करइ बडहिँ। जहजवा नास भेले फेनि, यपनहुँसभ नाहिँ मरबहुँ। 23 मुइ परमेस्वरक मन्से हखहि हसे हुनेक सेवा करसहि। याजु राति हुनेक एक जन दुत मोर लघिना याके यसके कहलिय, 24 ‘अरे पावल, झिन डेराहि, तुइ सम्राट कइसरक यागा ठडियबहि। हेरहि, परमेस्वर यापन दायासे तोरसाङे यातरा करलाहर जम्मे जनक प्रान बचबोसि।’ 25 उहेसे याट करह, केहकेकि परमेस्वरक कहलि इअ बतवा सदियो पुरा हतइ कहके मुइ विस्वास करले बडहिँ। 26 बाकि पहिला हमरा कुनहुँ एगुडा ठिसवामा ठोकेबहुँ।” पानि जहजवा डुबलिय 27 यसने हमरा धुधुइ-बयरवामा परके एड्रियास समुनदरवामा धकिलाइकि चउदह दिन भेल रहलइ। तब याधा रातवरि पानि जहजवा चलोलहराह, हमरा कुनहुँ एगुडा ठउरियाक तिरवामा पुगलहुँ कहके अनुमान करलइ। 28 उहेसे हुनुका कतहर गहिर पानि बडइ कि कहके डोरियावामा पत्थरा बान्हके पनियामा झारके नापे लगलइ। नपइकि पनियाक गहिरावा असि हाथ बडइ कहके थाह भेलइ हसे किहो समय पाछा फेरि नपइकि साठि हाथ पउलइ। 29 तखनहिँ हुनुका जहजवा कुनहुँ सिलवामा ठोकेबिय कि कहके डेरेलइ। उहेसे हुनुका पानि जहजवाक पाछाक चार गो लङ्गरवा तर झारदेलइ हसे हल-हालि बिहान हखइ कहके परथाना करे लगलइ। 30 तखनहिँ, जहजवा चलोलहराह भागे खोजइ रहलइ। उहेसे हुनुका यागाक लङ्गर खसोइकि नहिँया लाथ करके झिनकि डोङवाके समुनदरवामा झारइ रहलइ। 31 बाकि पावल कप्तनवा हसे सिपहियवानिके कहलिय, “यगर इअ मन्सावाह जहाजवा छाडके भगतइ जउँ, हमरा कुनहुँ फेनि नाहिँ बचबहुँ।” 32 उहेसे इअ बतवा सुनके सिपहियावाह जहजवामा बान्हलि झिनकि डोङवाक डोरियवा काटके डोङवाके बहाय देलइ। 33 बिहान भेलिसे यागा, पावल जम्मे जनके जेउना करेके तहिँया बिन्ति करलिय। उअ कहलिय, “यपनहुँसभ चिन्ता करके चउदह दिनलइ किहो फेनि हइने खइले बडहुँ। 34 उहेसे यपनहुँसभ किहो चिजु खाहुँ कहके मुइ बिन्ति करइ बडहिँ। केहकेकि बचेके तहिँया किहो खाए परतइ। यपनहुँसभक ककरो मुडवाक एगुडा फेनि केसवा नाहिँ झरतइ।” 35 यतुरा बतवा कहके पावल रोटिया लेके जम्मे जनक यागा परमेस्वरके धन्यवाद देलिय। वकरपाछा रोटिया खडाके खाए लगलिय। 36 तब हुनुका जम्मे जन याट पाके जेउना करे लगलइ। 37 उअ जहजवामा हमरा दु सय छिहतर जन रहलहुँ। 38 जब हुनुका जम्मे जन जेउना करके यघेलइ, तब हुनुका जहजवाके हलुक बनावेके तहिँया जहजवामा भेलि गोहुँवा समुनदरवामा फाँक देलइ। 39 जब बिहान भेलइ, हुनुका उअ ठउरिया हइने चिने सकलइ, बाकि समुनदरवाक तिरवामा एगुडा सम ठउरि देखलइ। उहेसे हुनुका जहजवाके वहवाँलइ लिगाइके विचार करलइ। 40 तब हुनुका लङ्गरवामा बान्हलि डोरियवा काटके लङ्गरवाके समुनदरमा छाड देलइ। तखनहिँ हुनुका जहाजवा घुमोनवा साधनमा बान्हलि डोरियवाह फेनि फोदेलइ हसे जहजवाक यागावरिक पलवा वपरावरि गहदेके बयरवाके जहजवाके तिरवावरि लिगाए देलइ। 41 बाकि जहाजवाक यागाक भगवा पनिया भितरा भेलि बलुवाक-ढुस्कावामा ठोकाके वहवाँहिँ भसलिय हसे जहजवाक पाछाक भगवा मचलवाक धाकासे फुटे लगलइ। 42 तखनहिँ कइदियाह पउरके भगतइ कहके, सिपहियावाह हुनुकाके मारेके विचार करलइ। 43 बाकि कप्तनवा पावलके बचावे खोजइ रहलिय। उहेसे उअ हुनुकाके यसनुक करे नाहिँ देके पउरे जनलि मन्सावानिके पहिला जहजवासे कुदके तिरवावरि जायके, 44 हसे याको जनके जहजवाक फुटलि पेटरियाक खडवा पकडके तिरवामा जायके आदेस देलिय। यसनेकरके हमरा जम्मे जन डउलसे तिरवामा पुगलहुँ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.