प्रेरित 24 - चितवनिया थारुपावल बडकि हकिमवा फेलिक्सक यागा 1 वकर पाँच दिन पाछा, सिदुकि पुजेरिया हननिया हसे किहो यहुदि यगुवासभ, तर्तुल्लस नाउँक एक जन वकिलके लेके कइसरियामा यलइ। हुनुका जम्मे जन पावलक विरोधमा बडकि हकिमवाक यागा उजुरि करलइ। 2 जब पावलके बडकि हकिमवा यागा यनलिय, तर्तुल्लस वकर विरोधमा दोस लगोते यसके कहे लगलिय, “माननिय फेलिक्स जि, यपनहुँक सासनमा हमरा यहुदियाह बहुत सान्तिमा बडहुँ हसे यपनहुँ हमार देसवाक तहिँया बहुत सुधारक काम फेनि करले बडहुँ। 3 यकरेके हमरा सबदिन जम्मे ठउरियामा किरितग्यसाङे स्विकार करले बडहुँ। 4 बाकि यपनहुँक बहुत समय नाहिँ लेके, दाया करके हमार बतवा छोटकरिमा सुनदेहुँ कहके मुइ बिन्ति करइ बडहिँ। 5 “हमरा इअ मन्सावाके जहवाँ-तहवाँ हुलदाङा करलहरा हसे संसारभरक जम्मे यहुदियानिक बिचा आन्दोलन करलाहर विद्रोहि मन्से कहके चिनले बडहुँ। इअ नासरि पन्थक एगुडा मुख्य नेता फेनि हखिय। 6 इअ मन्सावा मन्दिरवाके अपवितर बनावे खोजइ रहलिय, उहेसे हमरा यकरेके पकडलहुँ। [हमरा यापन व्यवस्था यनुसार यकरेके कारवाहि करेके विचार करले रहलहुँ, 7 बाकि सेनापतिया लुसियस हमार लघिना याके जबरजस्ति हमार हथवासे यकरेके निछोरके लिगलसि, 8 हसे यपनहुँक यागा उजुरि करेके तहिँया आग्या देलसि।] याबे यपनहुँ यकर छानबिन करके हमार करलि उजुरिक बात सदियो हखइ कि, हइने कहके पाता लगावे सकबहुँ।” 9 तब वहवाँ भेलि याको यहुदियाह फेनि तर्तुल्लसक कहलि बतवा सदियो हखइ कहके सहमत भेलइ। 10 तब बडकि हकिमवा पावलके फदकेके इसारा देलेपर पावल यसके कहलिय, “यपनहुँ बहुत बरससे यहुदि जतियानिक न्यायधिसक रुपमा काम करइ बडहुँ कहके मोर थाह बडइ। उहेसे मुइ खुसिसे यपनहुँक यागा यापन बचावमा बयान देइ बडहिँ। 11 मुइ यरुसलेमक मन्दिरवामा परमेस्वरक आराधना करे गेल बारह दिन फेनि हइने भेल बडइ। इअ बतवा यपनहुँ पाता लगावे सकबहुँ। 12 मोरके दोस लगोलहराह न त, मोरके मन्दिरवामा ककरहुँसे ठोरा-बोलि करइ पउलइ, न सभाघरवामा कि सहरवामा मन्सावानिके हुलदाङा करेके तहिँया उस्कोइ पउलइ। 13 मोरके यखनि लगोलि दोसवाक परमान फेनि हिनिका देवे नाहिँ सकतइ। 14 बाकि मुइ इअ बतवा यपनहुँक यागा स्विकार करइ बडहिँ कि, जुन येसुजिक पइडाके हिनिका झुठा कहसइ, उहे पइडाके पछियोतइ मुइ यापन पुरखावानिक मनते यइलि परमेस्वरक आराधना करसहिँ। मुइ यहुदि व्यवस्था हसे अगमवक्तावानिक कितबवामा लिखलि जम्मे बतवामा फेनि विस्वास करसहिँ। 15 मुइ फेनि हिनिकर नहिँया परमेस्वर धरमि हसे अधरमि हरेक मन्सेसभके मरलिसे जिउतोबसि कहके यसरा करसहिँ। 16 उहेसे मुइ परमेस्वर हसे मन्सावानिक यागा यापन विवेक सुद्ध राखेके कोसिस करसहिँ। 17 “याबे बहुत बरस पाछा मुइ यापन जातिक मन्सावानिके दान देवे हसे परमेस्वरके भेटि चढावेके तहिँया यरुसलेममा याइल रहलहि। 18 जब हिनिका मोरके मन्दिरवामा भेटलइ, तखनहिँ मुइ सुद्ध हखेके विधि पुरा करसकले रहलहि। वहवाँ न त, मन्सेक भिड रहलइ, न हुलदाङा भेलइ। 19 बाकि वहवाँ एसिया छेतरसे याइल किहो यहुदिसभ फेनि रहलइ। यगर मोर विरोधमा हुनुकर किहो बात हतिय जउँ, हुनुका यपनहुँक लघिना याके मोर विरोधमा उजुरि करे सकतइ। 20-21 बरु मुइ ‘मरलि मन्सावाह फेरि जिउततइ कहके विस्वास करलेसे याजु यपनहुँसभक यागा मोर मुदा चलइ बडइ।’ मोर विरोधमा दोस लगोलहराह इअ एगुडा मतरे बिसयमा मोर विरोधमा उजुरि लगावे सकतइ, केहकेकि महासभाक यागा हाजिर हखइखुनि इअ बतवा मुइ जबड माहे चिल्लाके कहले रहलइ। यगर यकर अलावा हुनुका मोरमा किहो दोस पउले रहलइ जउँ, याबे हुनुका यपनहिँ कहे सकतइ।” 22 फेलिक्सके येसुजिक पइडाक बारेमा डउलसे थाह भेलेसे, कारवाहि रोकदेलिय हसे हुनुकाके यसके कहलिय, “जब सेनापतिया लुसियस यहवाँ यबिय, तब मुइ यकर फइसला करदेबहिँ।” 23 वकरपाछा फेलिक्स कप्तनवाके यसके कहके हुकुम देलिय, तोहरा यकरेके वगरिह, बाकि कडिकडाव झिन करिह हसे वकर सङहतियवानिके यकर चाहि लगना चिजु पुगावेके तहिँया झिन रोकिह। 24 वकर किहो दिन पाछा फेलिक्स यापन जनियावा द्रुसिल्लाके लेले यलिय। उअ यहुदि जातिक रहलिय। हुनुका पावलके बलाके येसु ख्रिस्टके विस्वास करेके बारेमा वकरसे सुनलइ। 25 जब पावल हुनुकाके धारमिकता, संयम हखेके हसे भविस्यमा यावेवाला परमेस्वरक न्यायक बारेमा छलफल करलिय, फेलिक्स यतियाके कहलिय, “यखना जाहि, मउका मिल्तइ जउँ, मुइ फेरि तोरके बलोबहिँ।” 26 तखनहिँ उअ पावलसे घुस पउबहि कि, कहके यसरा करले रहलिय। उहेसे उअ पावलके घर-घराहे बलाके बातचित करिय। 27 बाकि दु बरस बितलेपर, फेलिक्सक सटहामा पर्किअस फेस्तस बडके हाकिम भेलिय। उहेसे फेलिक्स यहुदियानिके खुसि पारेके तहिँया पावलके झ्यालखनवामा रहेदेलिय। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.