प्रेरित 22 - चितवनिया थारु1 पावल कहलिय, “अरे मोर भयवाह हसे बाबासभ, यपनहुँसभक यागा मोर यापन पछमा कहे परना बात याबे सुनहुँ।” 2 जब हुनुका पावलके हिब्रु भासामा फदकइ सुनलइ, तब हुनुका जम्मे जन चुप भेलइ। तब पावल कहलिय, 3 “मुइ किलिकिया छेतरक टार्सस सहरवामा जरमल एगुडा यहुदि मन्से हखहि, बाकि इअ यरुसलेम सहरवामा हुर्कल बडहिँ हसे धरम-गुरु गमलिएलसे हमार पुरखासे चलते याइल यहुदि व्यवस्थाक सिछा डउलसे सिखले बडहिँ। याजु यपनहुँसभ परमेस्वरमा जतुरा कट्टर बडहुँ, मुइ फेनि वसने कट्टर रहलहि। 4 मुइ इअ पइडावामा लगलहरा मन्सावानिके मरइलइ सतोलहिँ। मुइ मरदाना हसे जनियानि दुन्हुँके पकडके झ्यालखनवामा थुनदेहिँ। 5 इअ मोर कहलि बतवा सदियो हखइ कहके सिदुकि पुजेरिया हसे महासभाक जम्मे सदस्यवाह फेनि साछि बडइ। मुइ हुनुकरसे दमस्कस सहरवाक यहुदियानिक तहिँया लिखल चिठिसभ फेनि पउले रहलहि। उअ चिठियाह लेके मुइ वहवाँ भेलि विस्वासिसभके यरुसलेममा यानके सजाय देवेके तहिँया हुनुकाके पकडेके दमस्कस सहरवावरि जाइ रहलहि। 6 “मुइ दिनावरि दमस्कस सहरावाक लजिके पुगइखुनि, यकसवासे यरमरका चहकार इजोर मोर वपरा चम्कलइ। 7 मुइ बुलते-बुलते भुयवामा गिरलहि हसे तखनहिँ यसके कहइकि एगुडा स्वर सुनलहिँ, ‘साउल, अरे साउल, तुइ केहके मोरके सतोसहि?’ 8 “तब मुइ पुछलहिँ, ‘प्रभु, यपनहुँ कुने हखहुँ?’ हुने कहलसि, ‘मुइ नासरतक येसु हखहि, जकरेके तुइ सतोसहि।’ 9 तब मोरसाङे जतेक जन वहवाँ रहलइ, हुनुका इजोर मतरे देखलइ, बाकि मोरसाङे फदकेलहराक कहलि बतवा हुनुका हइने बुझलइ। 10 “उहेसे मुइ कहलहिँ, ‘हे प्रभु, याबे मुइ कथि करेके?’ “तखनहिँ प्रभु मोरके कहलसि, ‘तुइ उठके दमस्कस सहरवामा जाहि हसे जथि काम करेके तोर तहिँया तोकाइल बडइ उअ तोरके वहवाँहिँ कहेतइ।’ 11 जब मुइ उअ चहकारि इजोरवासे किहो हइने देखे सकलहि, तब मोरसाङे रहलहरा मोर हथवा पकडके डोरियउते दमस्कसमा लिगलइ।” 12 “वहवाँ हननिया नाउँक एक जन मन्से रहलिय। उअ मोसाक व्यवस्था पालन करलाहर एक जन धरमि मन्से रहलिय हसे जम्मे यहुदियाह वकरेके यादर करइ। 13 उअ मोर लघिना यलिय हसे मोर पजरवामा ठडियाके मोरके यसके कहलिय, ‘अरे साउल भयवा, तुइ फेरि देखाह हखहि।’ उअ यतुरा कहतेकि मुइ फेरि देखे सकलहि हसे वकरेके फेनि देखलहिँ। 14 “तब उअ कहलिय, ‘तुइ हमार पुरखावानिक परमेस्वरक इछा जानेके तहिँया, धरमि सेवक येसुके देखेके हसे हुनेक मुहँवासे फदकलि बतवा सुनेके तहिँया तोरके छानले बडसि, 15 केहकेकि जथि-जथि बात तुइ सुनले हसे देखले बडहि, उअ जम्मे बिसयमा तुइ मन्सावानिक यागा हुनेक साछि हखबहि। 16 उहेसे याबे तुइ केहके देरि करइ बडहि? उठके बप्तिस्मा लेहि हसे येसुजिक नाउँमा यापन पापसे सुद्ध हखहि।’ 17 “जब मुइ वहवाँसे यरुसलेम फिरके यलहिँ हसे मन्दिरवामा परथाना करइरहलहि, तखनहिँ मुइ एगुडा दर्सन देखलहिँ। 18 येसुजि मोरके यसके कहइकि देखलहिँ, ‘यरुसलेमसे हल-हालि निकडके जाहि, केहकेकि मोर बारेमा देलि तोर गवाहि हुनुका गरहन नाहिँ करतइ।’ 19 “बाकि मुइ कहलहिँ, ‘हे प्रभुजि, मुइ कस्के जम्मे सभाघरवामा जाके यपनहुँमा विस्वास करलहरानिके झ्यालखनवामा थुनले हसे पिटले बडहिँ कहके जम्मे जनक थाह बडइ। 20 यपनहुँक साछि देलाहर स्तिफनसके मारइखुनि, मुइ यपनहिँ लजिके ठडियाके वकर हत्यामा फेनि सहमति रहलइ हसे वकर हत्या करलहरानिक लुगवा वगरइ रहलहि।’ 21 “बाकि प्रभु मोरके कहलसि, ‘जाहि, केहकेकि मुइ तोरके बहुत तनाउ-तनाउलइ अयहुदियानिक लघिना पठोबहि’।” 22 हुनुका यतुरालइ मतरे पावलक बतवा सुनलइ, बाकि जबड माहे चिल्लाके यसके कहलइ, “यसनुक मन्सेके मारहिँ परतइ! इअ जिउते रहेके लाइक हइने बडिय।” 23 हुनुका यापन-यापन लुगवा फारते हसे यकसवावरि धुरिया उडियोते चिल्लाए लगलइ। 24 इअ देखके सेनापतिया कहलिय, “वकरेके चउकिया भितरा यनह हसे मन्सावाह केहके वकर विरोधमा यसके चिल्लाइ बडइ कहके कोडा लगाके जचह।” 25 जब सिपहियावाह पावलके कोडा लगावेके तहिँया बनइ रहलइ, तब पावल लजिके ठडियलि कप्तनवाके पुछलिय, “कथि एगुडा रोमि नागरिकके दोसि हइने ठहराके कोडा लगावेके ठिक हखइ?” 26 कप्तनवा इअ बतवा सुनलेपर, सेनापतिया लघिना जाके कहलिय, “यपनहुँ कथि करे जाइबडहुँ? इअ मन्सावा त रोमि नागरिक हखिय!” 27 उहेसे सेनापतिया पावल लघिना जाके पुछलिय, “कथि तुइ रोमि नागरिक हखहि?” पावल कहलिय, “हँ, हखहि।” 28 इअ सुनके सेनापतिया कहलिय, “मुइ त बहुत रुपिया तिरके रोमि नागरिक भेल बडहिँ।” बाकि पावल कहलिय, “मुइ त जरमलिसे रोमि नागरिक हखहि।” 29 इअ सुनके पावलके पुछभाख करेके तहिँया तयार भेलि सिपहियावाह हटलइ हसे सेनापतिया फेनि डेरेलिय, केहकेकि पावल एगुडा रोमि नागरिक रहलिय हसे उअ वकरके बाँन्ह देले रहलिय। पावल महासभाक यागा 30 दोसरि दिना उअ सेनापतिया मुख्य पुजेरियाह हसे महासभाक जम्मे सदस्यसभके कचहेरियामा बलोलिय, केहकेकि कथि कारनसे मन्सावाह पावलके दोस लगोइ बडइ कहके उअ पाता लगावे खोजइ रहलिय। उहेसे उअ पावलके फो देलिय हसे वकरेके महासभाक यागा यानके ठडियोलिय। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.