प्रेरित 20 - चितवनिया थारुपावल माकेडोनिया हसे ग्रिसमा गेलिय 1 हुलदाङा सान्त भेलेपर, पावल विस्वासिसभके बलोलिय हसे हुनुकाके सहास देलिय। वकरपाछा हुनुकरसे बिदाबारि भके माकेडोनिया छेतरवरि गेलिय। 2 यसने माकेडोनिया छेतरमा भके जाइखुनि पावल विस्वासिसभके सहासक वचन देते, ग्रिस देसवामा गेलिय। 3 पावल वहवाँ तिन महिनालइ रहलिय। वहवाँसे पानि-जहजवामा चढके सिरिया छेतरमा जायके तयारि करइ, यहुदियाह वकरेके मारे खोजइबडइ कहके उअ थाह पउलिय। तब उअ फेरि फिरके माकेडोनिया हखते सिरिया जायके निरनय करलिय। 4 इअ पारिक यातरामा पावलसाङे बेरिया सहरवामा रहलाहर पुरसक बेटवा सोपातरोस, थेसलोनिक सहरवामा रहलाहर अरिस्तारखस हसे सिकन्दस, डर्बि सहरवामा रहलाहर गायस हसे तिमोथि, एसिया छेतरसे याइल तुखिकस हसे तरोफिमस रहलइ। 5 हुनुका हमारसे यागा जाके तरोआस सहरवामा हमराके इसियाइ रहलइ। 6 बाकि हमरा अखमिरि रोटिक पाबनि मानके फिलिप्पि सहरवासे पानि-जहजवामा चढके पाँच दिन पाछा हुनुकर लघिना तरोआसमा पुगलहुँ। हमरा वहवाँ सात दिनलइ रहलहुँ। तरोआसमा युटिकस मरलिसे जिउतलिय 7 हप्ताक पहिला दिन हमरा प्रभु-भोज खाएके तहिँया वहवाँक विस्वासियानिसाङे बटियलहुँ। पावल हुनुकरसाङे याधा रातलइ बात करइ रहलिय, केहकेकि दोसरि दिन वकर जायके रहलइ। 8 हमार बटियलि वपराक तलवाक कोठवामा बहुत दिवा रहलइ। 9 वहवाँ युटिकस नाउँक एक जन ढोठहनिया छोकनि झ्यलवामा बइठल रहलिय हसे वकर खुभे निन लगइ रहलइ। जब पावल जबड जुगलइ फदकते रहलिय, तब युटिकस निनवामा तिसरि तलवासे तर गिरलिय। मन्सावाह लजिके जाके हेरइकि उअ मरसकल रहलिय। 10 तखनहिँ पावल तर याके वकरेके पजटलिय हसे वहवाँ भेलि मन्सावानिके यसके कहलिय, “तोहरा झिन यतियाह, केहकेकि इअ छोकनिया जिउते बडिय।” 11 वकरपाछा पावल जम्मे जनसाङे वपराक तलवामा जाके प्रभु-भोज खेलिय हसे बिहना इजोर हखइलइ हुनुकरसाङे बात करते रहलिय। वकरपाछा उअ बिदा भके गेलिय। 12 तखनहिँ हुनुका उअ ढोठहनियावा छोकनियाके वहवाँसे वकर घरवामा जिउते पुगादेलेसे, खाँ खुसि भेलइ। पावलक तरोआससे मिलेटसलइ यातरा 13 हमरा यगाहेसे पानि-जहजवामा चढके अस्सोस सहरवामा गेलहुँ हसे वहवाँसे पावलके पानि-जहजवामा चढावे खोजइ रहलहुँ, केहकेकि उअ यसने बन्दबस्त करके अस्सोसलइ पइदले गेल रहलिय। 14 जब पावल हमराके अस्सोस सहरवामा भेटलिय, तब हमरा वहवाँसे पानि-जहजवामा चढके सङहि मितिलेने सहरवामा गेलहुँ। 15 दोसरि दिन हमरा वहवाँसे पानि-जहजवामा चढके खियस ठिसवाक लजिके पुगलहुँ हसे तिसरि दिन हमरा सामोस ठिसवामा पुगलहुँ। यसनेकरके वकर दोसरि दिन मिलेटस सहरवामा पुगलहुँ। 16 बाकि पावलक एसिया छेतरमा समय बितावेके विचार हइने भेलेसे, एफिसस सहरवामा हइने पेसेके निरनय करलिय। केहकेकि उअ सकभर हल-हालि पेन्तिकोसक पबनिक दिन यरुसलेममा पुगेके इछा करले रहलिय। एफिससक मन्डलियाक यगुवासभसाङे पावलक बिदाइ 17 जब हमरा मिलेटसमा पुगलहुँ, तब पावल एफिससक मन्डलियाक यगुवासभके वकरेके भेटे यावेके कहके हुनुकाके समाद पठोलिय। 18 जब हुनुका वहवाँ यापुगलइ, पावल हुनुकाके कहलिय, “एसियामा यइलि दिनवासे याजुलइ मुइ तोहारसाङे रहइखुनि कस्के दिन बितोलहिँ कहके तोहार थाहे बडइ। 19 मुइ नम्र भके रोर चुवते यहुदियानिक सतावटमा फेनि प्रभुक सेवा करलहिँ। 20 यपनहुँसभक फाइदाक तहिँया वचन परचार करेके मुइ कबहुँ फेनि पाछा हइने हटलहि। मुइ बाहरा जम्मे जनक यागा परचार करलहिँ हसे तोहार घरवा-घरवामा जाके फेनि सिखोते रहलहि। 21 मुइ यहुदि हसे ग्रिक जातिक जम्मे जन पछताप करके परमेस्वरवरि फिरेके तके हमार प्रभु येसुजिमा विस्वास करिह कहके परचार करलहिँ। 22 “याबे हेरह, मुइ पवितर-आत्माक कहलि बतवा मानके यरुसलेमवरि जाइ बडहिँ, वहवाँ कथि हतइ कहके, मोर किहो फेनि थाह हइने बडइ। 23 बाकि मोर इतुरा मतरे थाह बडइ कि, सतावट हसे झ्यालखनवाक दुःख भोगे परतइ कहके जम्मे सहरवामा पवितर-आत्मा मोरके कहले बडसि। 24 ताफेनि मुइ जसने यापन दउड पुरा करे सकहि हसे परमेस्वरक अनुग्रहक खुसिक समादक गवाहि देवेके तहिँया जुन सेवाक कमवा प्रभु येसुजिसे बडहिँ, उअ पुरा करे सकहि कहके मुइ यापन जिन्गिके किहो मोलक हइने सम्झसहिँ। 25 “याबे हेरह, मुइ तोहरा जतेक जनके परमेस्वरक राजक बारेमा परचार करले बडहिँ, तोहरा फेरि मोरके कबहुँ नाहिँ देखबह कहके मोर थाह बडइ। 26 उहेसे, याजु मुइ तोहराके सदियो गवाहि देके कहइ बडहिँ कि, यगर यपनहुँसभ मधेसे कुनहुँ नास हखबह जउँ वकर दोसवा मोर वपरा नाहिँ लगतइ। 27 केहकेकि परमेस्वरक जम्मे योजना मुइ यपनहुँसभके कहले बडहिँ। 28 उहेसे, यपनहुँसभ यापन हसे पवितर-आत्मा यपनहुँसभके जुन विस्वासिसभक वपरा यगुवा बनोले बडसि, वकर हेरचाह करिह। तोहरा परमेस्वरक मन्डलियाक यसल भेडहार बनिह, केहकेकि हुने यापन पुतरक रकतसे किनले बडसि। 29 मोर इअ थाह बडइ कि, मुइ यहवाँसे गेलेपर झुठा सिछकसभ तोहार बिचा घुसिटके तोहराके सतोतइ। 30 यसनुक कि, तोहरे बिचासे फेनि झुठा सिछा देलाहर मन्सेसभ निस्कतइ हसे हुनुका विस्वासिसभके झुठा बात सिखाके यापन पाछा लिगतइ। 31 उहेसे, मुइ तिन बरसलइ दिन-रात तोहराके रोर चुवते एकहक जन विस्वासिसभके सिखोलि बतवा समझके चेतले रहिह। 32 “याबे मुइ तोहराके परमेस्वरमा हसे हुनेक अनुग्रहक वचनमा सपइ बडहिँ। जुन वचनवा तोहराके विस्वासमा बरियार बनोबसि हसे पवितर बनोलि जम्मे जनमधे तोहराके उतराधिकार देबसि। 33 मुइ कबहुँ फेनि ककरो सोन, चाँनि हसे महङ लुगाफाटाक लोभ हइने करलहिँ। 34 तोहार थाह बडइ कि, मुइ यपने हथवासे काम करके यापन हसे मोरसाङे रहलहरानिक तहिँया चाहि लगना चिजु जुटोलहिँ। 35 मुइ जम्मे चिजुवा यापन कमवासे तोहराके देखोले बडहिँ। जसने प्रभु येसु, ‘लेवेकेसे त देवेके झन यसल हखइ’ कहके कहले बडसि, तोहरा फेनि उअ समझके यसने मेहनत करके कमजोर मन्सावानिके मदत करिह।” 36 इअ बतवा कह सकलेपर पावल जम्मे जनसाङे ठेहुँनाके परथाना करलिय। 37 तब हुनुका जम्मे जन खुभे कनलइ हसे पावलके पजिटके चुमे लगलइ, 38 हसे पावल हुनुकाके, “तोहारसाङे मोर फेरि कबहुँ फेनि भेट नाहिँ हतइ” कहलि बतवा समझके हुनुका खाँ दुःख मनलइ। वकरपाछा हुनुका वकरेके पानि-जहजवालइ पुगादेलइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.