प्रेरित 19 - चितवनिया थारुपावल एफिसस सहरवामा 1 जब अपोल्लोस कोरिन्थ सहरवामा रहलिय, तब पावल एसिया पहडवाक इलाका हखते एफिसस सहरवामा यलिय। वहवाँ पावल किहो विस्वासिसभके पउलिय। 2 पावल हुनुकाके पुछलिय, “जब तोहरा प्रभुमा विस्वास करलह, कथि तोहरा पवितर-आत्मा पउलह?” हुनुका जवाफ देके कहलइ, “पवितर-आत्मा बडसि कहके हमरा सुनले फेनि हइने बडहुँ।” 3 उहेसे पावल कहलिय, “वसके भेले, तोहरा कस्नुक बप्तिस्मा लेलह त?” हुनुका कहलइ, “बप्तिस्मा देलाहर युहन्नाक सिखोलि नहिँया हमरा बप्तिस्मा लेले बडहुँ।” 4 तब पावल कहलिय, “युहन्नाक बप्तिस्मा त पछतापक बप्तिस्मा रहलइ हसे युहन्ना यपनहिँ ‘मोरसे पाछा यलहरवामा विस्वास करह’ कहके मन्सावानिके कहलिय। युहन्ना येसुजिक बारेमा कहइ रहलिय।” 5 इअ बतवा सुनके हुनुका प्रभु येसुजिक नाउँमा बप्तिस्मा लेलइ। 6 वकरपाछा, जब पावल हुनुकर वपरा हथवाह राखदेलिय, तब पवितर-आत्मा हुनुकरमा यलसि हसे हुनुका अन्य भासासभमा फदकके अगमवाडि करे लगलइ। 7 वहवाँ बारह जन जतुरा मरदाना मन्से रहलइ। 8 तब पावल तिन महिनालइ सभाघरवामा जाके सहाससे परचार करलिय। उअ परमेस्वरक राजक बारेमा छलफल करते मन्सावानिके डउलसे मनावेके कोसिस करलिय। 9 बाकि जब कतेक जन हइलठ भके विस्वास हइने करलइ हसे प्रभुक पइडाक विरोधमा मन्सावानिक यागा निना करलइ, तब पावल प्रभुमा विस्वास करलहरा चेलवानिके यापनसाङे लेके हुनुकरसे छुटलिय हसे सबदिन टुरान्नस इसकुलवामा मन्सावानिसाङे छलफल करलिय। 10 इअ दु बरसलइ चलते रहलइ हसे एसिया छेतरमा रहलहरा यहुदि तके अयहुदि जम्मे जन प्रभुक वचन सुनलइ। 11 परमेस्वर पावलसे यसनुक यचम्म-यचम्मक काम करलसि कि, 12 जब मन्सावाह रुमलवाह हसे चदरियाह पावलक देहियामा छुआके मनियइलि मन्सावानिक लघिना लिगाके छुवादेइ, तब हुनुका यापन-यापन रोगवासे डउल हखइ तके हुनुकरसे दुस्ट-आत्मासभ फेनि निकडके जाइ। 13 झारफुक करलाहर कतेक जन यहुदिसभ फेनि ठउरि-ठउरिमा जाके प्रभु येसुजिक नाउँमा मन्सावानिसे दुस्ट-आत्मा निकडोलइ। हुनुका इअ येसुजिक नाउँमा करे खोजलइ। हुनुका दुस्ट-आत्मासभके यसके कहइ, “पावलक परचार करलि येसुजिक नाउँमा मुइ तोरके निस्केके आग्या देइ बडहिँ।” 14 वहवाँ स्केवास नाउँक एक जन मुख्य पुजेरियाक सात जन बेटवाह फेनि वसने करइ। 15 बाकि एक दिन दुस्ट-आत्मा हुनुकाके कहलिय, “मुइ येसुजिके चिनसहिँ हसे पावलके फेनि चिनसहिँ, बाकि तोहरा कुने हखह?” 16 तब उअ दुस्ट-आत्मा लगलि मन्सावा हुनुकर वपरा उफरते यलिय हसे जम्मे जनके यापन वसमा धरके घायल बनोलिय। उहेसे हुनुका उअ घरवासे घायल भके नङटे भगलइ। 17 इअ बतवा एफिससमा रहलहरा यहुदि हसे अयहुदियाह सुनके खाँ डेरेलइ। तब हुनुका प्रभु येसुजिक नाउँके खुभे यादर करलइ। 18 तखनहिँ प्रभुमा विस्वास करलहरा बहुत जन याके यापन-यापन करलि खराब कमवाह खुल्लमखुल्ला स्विकार करलइ। 19 हुनुकरमधे बहुत जन जुने झारफुक करइ, हुनुका यापन-यापन कितबवाह बटियाके यनलइ हसे जम्मे जनक यागा जरादेलइ। हुनुकर जरोलि उअ कितबवानिक मोल करइकि पचाँस हजार चाँनिक पइसाक बराबर भेलइ। 20 यसनेकरते प्रभुक वचन सक्तिसालि भके फइलते गेलइ। 21 इअ जम्मे घटनावा पाछा, पावल माकेडोनिया हसे अखइया छेतर हखते यरुसलेम जायके निरनय करलिय हसे “वहवाँ पुगलेपर मुइ रोम सहरवामा फेनि जाए परतइ” कहके उअ कहलिय। 22 उहेसे पावल यापन दु जन मदत करलाहर, तिमोथि हसे इरास्तसके माकेडोनियामा पठोलिय, बाकि उअ किहो दिनलइ एसिया छेतरमा रहलिय। एफिसस सहरवामा हुलदाङा 23 तखनहिँ, प्रभुक पइडाक बारेमा परचार भेलेसे एफिससमा जबड हुलदाङा भेलइ। 24 वहवाँ डेमेतिरियस नाउँक एक जन चाँनिक समान बनोलहर सोलार रहलिय। उअ ग्रिक देवि आर्तेमिसक मन्दिरक झिन-झिन नमुनासभ बनाके बहुत जन सोलारके काम दिय। 25 एक दिन उअ यापन सोलरासभके हसे वसने काम करलाहर याको जम्मे जनके बटियाके यसके कहलिय, “अरे मोर सङहतियवाह, तोहार थाहे बडइ कि, इहे व्यपार करके हमरा बहुते पइसा कमेसहुँ। 26 बाकि पावल जथि करइ बडिय तोहरा यपनहिँ देखइ हसे सुनइ बडह। इअ मन्सावा एफिससमा मतरे हइने बरु जम्मे एसिया छेतरक मन्सावानिके ‘हथवासे बनोलि देउता त देउता हइने’ कहके भडकोइ बडिय। 27 उहेसे इअ हमार व्यपार मतरे हइने, बाकि महान देवि आर्तेमिसक मन्दिरवाक फेनि हेला हतइ हसे यसने एसिया हसे संसारभरक मन्सावाह मनते यइलि देवि आर्तेमिसक महिमा घटतइ।” 28 इअ बतवा सुनके हुनुका खुभे खिसियलइ हसे “एफिसिक मन्सावानिक देवि आर्तेमिस महान हखिय!” कहके नारा लगावे लगलइ। 29 तब वइघरहिँ जम्मे सहरवामा हुलदाङा फइललइ। मन्सावाह एकजुट भके माकेडोनियासे यइलि पावलक सङहतियवाह गायस हसे अरिस्तारखसके पकडके रङगसालवामा घिसियउते लिगलइ। 30 तखनहिँ पावल मन्सावानिक भिडवाक यागा जाए खोजलिय, बाकि विस्वासिवाह वकरेके जाए हइने देलइ। 31 एसियाक कतेक जन सरकारि हाकिमसभ फेनि पावलक सङहतिया रहलइ। हुनुका पावलके रङगसालवा भितरा झिन जाहुँ कहके बिन्ति करलइ। 32 तखनहिँ रङगसलवामा यतुरा हुलदाङा भेल रहलइ कि, कतेक जन इअ कहके हसे याको कतेक जन उअ कहके चिल्लाइ रहलइ। बहुत जनके त, हुनुका वहवाँ केहके बटियाइल बडइ कहके फेनि थाह हइने रहलइ। 33 वहवाँ भेलि कतेक जन यहुदियाह अलेक्जेन्डर नाउँक एक जन मन्सेके बात करेके तहिँया यागा सारलइ। तखनहिँ भिडवासे कतेक जन मन्सेसभ इअ घटनावाक बारेमा किहो कहेके तहिँया अलेक्जेन्डरके कहलइ। तब उअ मन्सावानिके सान्त बनावेके तहिँया हथवासे इसारा करलिय हसे यहुदियानिके बचावेके तहिँया फदकेके कोसिस करलिय। 34 बाकि जब भिडवाक मन्सावाह अलेक्जेन्डरके यहुदि हखिय कहके चिनलइ, तब हुनुका जम्मे जन “एफिसिक मन्सावानिक देवि आर्तेमिस देविक जय हखइ!” कहके दु घन्टालइ नारा लगोलइ। 35 बाकि याखिरमा सहरवाक हकिमवाह भिडवाके सान्त बनाके कहलइ, “एफिससक मन्सावाह, इअ सहरवा महान देवि आर्तेमिसक मन्दिरवा हसे यकसवासे झरलि वकर मुरतियाक रछक हखिय कहके काकर हइने थाह बडइ? 36 इअ बतवा कुनहुँ फेनि इन्कार करे नाहिँ सकतइ। उहेसे यपनहुँसभ किहो फेनि दुःख यावेके काम झिन करके सान्त भके रहहुँ। 37 उहेसे यपनहुँसभ पकडके यनलि इअ मन्सावा, न त हमार मन्दिरवा लुटले बडिय, न हमार देविक यपमान करले बडिय। 38 यगर डेमेतिरियस हसे वकर सोलरा सङहतियवानिक इअ मन्सावानिक विरोधमा ककरो किहो बात हतइ जउँ, हुनुका अदालतमा जाके उजुरि करे सकतइ। हुनुकर तहिँया अदालत बडइ हसे न्याय करलाहर न्यायधिससभ फेनि बडइ। 39 बाकि यगर यपनहुँसभक यकरसे फेनि बहुत उजुरि बडइ जउँ, वकर बारेमा दिनहुक कचहेरियामा छलफल करे सकेतइ। 40 केहकेकि याजुक इअ हुलदाङाक दोस रोमि सरकार हमार वपरा लगावे सकबिय। केहकेकि हमारसाङे इअ हुलदाङाक किहो कारन हइने बडइ हसे रोमि सरकारके देवेके तहिँया हमारसाङे किहो जवाफ फेनि हइने बडइ।” 41 यतुरा कहके सहरवाक हकिमवा भिडवाके बिदा देलिय। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.