प्रेरित 18 - चितवनिया थारुपावल कोरिन्थ सहरवामा 1 वकरपाछा पावल एथेन्स सहरवासे कोरिन्थ सहरवामा गेलिय। 2 वहवाँ उअ पोन्टसमा जरमल अकिलास नाउँक एक जन यहुदि मन्सेके भेटलिय। उअ यापन जनियावा प्रिस्किलासाङे भरखाहे इटालियासे वहवाँ याइल रहलिय, केहकेकि रोमक सम्राट क्लउडियस जम्मे यहुदियानिके रोम सहरवासे निकडके जायके हुकुम देले रहलिय। तब पावल हुनुकाके भेटे गेलिय, 3 हसे उअ हुनुकरसाङे रहके काम करलिय, केहकेकि हुनुकर फेनि पावल नहिँया पाल बनावेके पेसा रहलइ। 4 पावल जम्मे विसरामक दिन सभाघरवामा जाके यहुदियाह हसे ग्रिक जतियाक मन्सावानिसाङे ठोरा-बोलि करके, हुनुकाके मनावेके कोसिस करिय। 5 जब सिलास हसे तिमोथि माकेडोनियामा यलइ, पावल परचारक काममा मतरे लगलिय हसे येसु मुक्ति देलाहर ख्रिस्ट हखसि कहके यहुदियानिके परचार करलिय। 6 बाकि जब हुनुका विरोध करते पावलक यपमान करलइ, तब उअ यापन लुगवाक धुरिया झारते हुनुकाके कहलिय, “तोहार रकत तोहरे मुडवामा परइ, मुइ निरदोस बडहिँ। याबेसे मुइ अयहुदियानिक लघिना जेबहिँ।” 7 वकरपाछा पावल सभाघरवासे निकडके तितस युस्तस नाउँक मन्सेक घरवामा गेलिय। वकर घरवा सभाघरवाक लजिके रहलइ। उअ परमेस्वरक सेवा करलाहर अयहुदि मन्से रहलिय। 8 क्रिस्पस नाउँक सभाघरवाक यगुवा यापन परिवारक जम्मे जनसाङे प्रभुमा विस्वास करलिय। पावलक वचनवा सुनलाहर कोरिन्थ सहरवाक बहुत मन्सेसभ फेनि प्रभुमा विस्वास करके बप्तिस्मा लेलइ। 9 एक रात प्रभु पावलके दर्सनमा कहलसि, “ककरहुँसे झिन डेराहि हसे चुप लागके झिन रहसि, बाकि परचार करते जाहि। 10 मुइ तोरसाङे बडहिँ हसे कुनहुँ फेनि तोर हानि नोक्सानि करे नाहिँ सकतइ, केहकेकि मोर बहुत मन्सेसभ इअ सहरवामा बडइ।” 11 उहेसे पावल एक बरस छ महिनालइ कोरिन्थ सहरवामा रहके मन्सावानिके परमेस्वरक वचन सिखोलिय। 12 जब गलियोन अखइया छेतरक सासक रहलिय, तब जम्मे यहुदियाह एकजुट भके पावलके पकडलइ हसे वकरेके अदालतमा यनलइ। 13 हुनुका वकरेके दोस लगोते यसके कहलइ, “इअ त हमार मन्सावानिके यसके गलत तरिकासे परमेस्वरक आराधना करेके सिखोसिय, कि जुन हमार यहुदि व्यवस्थाक उल्टा हखइ।” 14 जब पावल फदके खोजइ रहलिय, तब गलियोन यहुदियानिके कहलिय, “अरे यहुदियाह, यगर इअ कुनहुँ हइने डउल काम हसे कुनहुँ जबड अपराधक बात रहतिय जउँ, मुइ तोहार उजुरि सुनके न्याय करेके ठिक हतिय। 15 बाकि इअ त तोहार यपने धरमसास्तरवाक नाउँ, सबद हसे व्यवस्थाक बारेमा भेलेसे तोहरा यपनहिँ यकर न्याय करह। मुइ यसनुक बातक न्याय नाहिँ करबहिँ।” 16 यतुरा कहके गलियोन हुनुकाके अदालतसे निकाडा देलिय। 17 तब भिडवाक मन्सावाह सभाघरवाक यगुवा सोस्थेनेसके पकडके अदालतक यागा पिटलइ। बाकि गलियोन यकर बारेमा किहो वास्ता हइने करलिय। प्रिस्किला, अकिलास हसे अपोल्लोस 18 वकरपाछा पावल बहुत दिनलइ कोरिन्थ सहरवामा रहलिय। वहवाँसे विस्वासिसभसाङे बिदाबारि भके सिरिया छेतरमा गेलिय। प्रिस्किला हसे अकिलास फेनि वकरसाङे गेलइ। तब वहवाँसे पानि-जहजवामा चढके गेलिसे यागा, उअ भाखल करलि यनुसार किंक्रिया सहरवामा यापन केसवा मुडोलिय। 19 जब हुनुका एफिसस सहरवामा पुगलइ, पावल प्रिस्किला हसे अकिलासके उहे सहरवामा छाड देलिय। उअ सभाघरवामा जाके यहुदियानिसाङे छलफल करे लगलिय। 20 जब हुनुका पावलके किहो दिनलइ वहवाँहिँ रहेके बिन्ति करलइ, उअ हइने मनलिय। 21 बाकि हुनुकरसाङे बिदा हखइखुनि पावल हुनुकाके यसके कहलिय, “यगर परमेस्वरक इछा हतइ जउँ, मुइ फेरि फिरके तोहार लघिना यबहिँ।” तब उअ पानि-जहजवामा चढके एफिससमा गेलिय। 22 जब उअ कइसरिया सहरवामा पुगलिय, वहवाँसे यरुसलेम जाके विस्वासिसभसाङे भेटघाट करके एन्टिओखिया सहरवामा गेलिय। अपोल्लोस एफिसस सहरवामा 23 पावल किहो दिनलइ वहवाँहिँ रहलिय। वकरपाछा उअ गलातिया हसे फ्रिगिया छेतरक बहुत ठउरिमा जाके विस्वासिसभके प्रभुमा बरियार बनोलिय। 24 तखनहिँ अलेक्जेन्ड्रिया सहरवामा जरमल अपोल्लोस नाउँक एक जन यहुदि मन्से एफिससमा यलिय। उअ खाँ डउलसे फदके सकिय हसे धरमसास्तरवाक बारेमा वकर बहुत ग्यान रहलइ। 25 उअ प्रभु येसुजिक पइडाक बारेमा सिछा पउले रहलिय हसे यपनहिँ फेनि समरपित भके येसुजिक बारेमा मन्सावानिके ठिकसे सिखोइह। बाकि उअ युहन्नाक बप्तिस्माक बारेमा मतरे जनले रहलिय। 26 उअ सभाघरवामा जाके याट करके परचार करलिय। तब वकर परचार सुनके प्रिस्किला हसे अकिलास वकरेके यापन घरवामा लिगाके, परमेस्वरक पइडाक बारेमा याको डउलसे बुझादेलइ। 27 जब अपोल्लोस अखइया छेतरमा जायके विचार करलिय, तब एफिससमा भेलि विस्वासिवाह वकरेके वहवाँ जायके तहिँया उत्साह देलइ हसे वकरेके स्वागत करिह कहके वहवाँक चेलवानिके एगुडा चिठि फेनि लिखदेलइ। अपोल्लोस अखइया पुगलेपर प्रभुक अनुग्रहसे विस्वासिसभके खाँ मदत करलिय। 28 केहकेकि उअ खुलारुपसे यहुदियानिसाङे ठोरा-बोलि करलिय हसे धरमसास्तरवासे वचन देखोते येसुजि ख्रिस्ट हखसि कहके हुनुकाके परमान देलिय। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.