प्रेरित 16 - चितवनिया थारुपावलक दोसरो परचार यातरा 1 वकरपाछा पावल डर्बि हसे लुस्तरा सहरवामा फेनि गेलिय। वहवाँ तिमोथि नाउँक एक जन चेला रहलिय। वकर दाओ यहुदि विस्वासि रहलिय, बाकि वकर बाबा ग्रिक जातिक रहलिय। 2 लुस्तरा हसे आइकोनिया सहरवामा भेलि विस्वासिवाह तिमोथिके यसल मन्से हखिय कहके मानइ। 3 पावल तिमोथिके यापनसाङे परचार यातरामा लिगेके मन करलेसे वकरेके खतना करे लगोलिय। केहकेकि वकर बाबा ग्रिक जातिक रहलिय कहके उअ छेतरक जम्मे यहुदियानिक थाह रहलइ। 4 याबे हुनुका सहर-सहरवामा जाके यरुसलेमक प्रेरितवाह हसे एल्डरवाह मिलके करलि निरनय पालन करे कहके विस्वासिसभके सुनादेलइ। 5 यसनेकरते, मन्डलियाक विस्वासिसभक विस्वास बरियार हखते गेलइ हसे विस्वासिसभक संख्या सबदिन बढते गेलइ। पावलक माकेडोनियामा जायके दर्सन 6 तब पवितर-आत्मा पावल, सिलास हसे तिमोथिके एसिया छेतरमा जाके वचन परचार करेके तहिँया रोकलेसे, हुनुका फ्रिगिया हसे गलातिया छेतर भके गेलइ। 7 हुनुका माइसिया छेतरक सिउनवामा पुगलेपर, बिथिनिया छेतरमा जायके विचार करलइ, बाकि येसुजिक आत्मा हुनुकाके वहवाँ जाए हइने देलसि। 8 उहेसे हुनुका माइसिया छेतर हखते तरोआस सहरवामा गेलइ। 9 उहे राति पावल एगुडा दर्सन देखलिय। उहे दर्सनमा माकेडोनियाक एक जन मन्से ठडियाके यसके बिन्ति करइ रहलिय, “माकेडोनियामा यउहुँ हसे हमराके मदत करहुँ।” 10 पावल यसनुक दर्सन देखलेपर, हमरा वइघरहिँ माकेडोनिया जायके तहिँया तयार भेलहुँ, केहकेकि उअ ठउरियाक मन्सावानिके सुसमाचार परचार करेके तहिँया परमेस्वर हमराके बलोले बडसि कहके हमरा निस्चित भेलहुँ। लिडिया येसुजिमा विस्वास करलिय 11 तब हमरा तरोआससे पानि-जहजवामा चढके सोझे वाहिपार सामोथ्राक ठिसवावरि गेलहुँ हसे दोसरि दिन हमरा नियापोलिस सहरवामा पुगलहुँ। 12 वहवाँसे बुलके हमरा फिलिप्पि सहरवामा गेलहुँ। उअ सहरवा माकेडोनिया जिल्लाक एगुडा मुख्य सहर रहलिय हसे रोमि सरकारक अदलमा फेनि रहलिय। हमरा वहवाँ किहो दिनलइ रहलहुँ। 13 एक विसरामक दिनमा हमरा सहरवाक दुवरियासे बाहरा लदियाक तिरवामा गेलहुँ, केहकेकि परथाना करेके तहिँया ठउरि बडइ कहके हमरा सोचलहुँ। हमरा वहवाँ बइठलहुँ हसे बटियलि जनिनियानिसाङे बात करे लगलहुँ। 14 वहवाँ थियाटिरा सहरवाक लिडिया नाउँक महङ जामुक रङक लुगाक व्यपार करलाहर एक जन जनियानि रहलिय। उअ परमेस्वरक आराधना करलाहर एक अयहुदि रहलिय। तब पावलक बतवा ध्यान लगाके सुनेके तहिँया प्रभु वकर हृदय खोल देलसि। 15 जब उअ हसे वकर घरवाक जम्मे जन बप्तिस्मा लेलइ, तब उअ हमराके बिन्ति करके यसके कहलिय, “यगर यपनहुँसभ मोरके सदियो एगुडा प्रभुक विस्वासि सम्झबहुँ जउँ, मोर घरवामा याके रहहुँ।” यसने उअ हमराके यापन घरवामा जायके तहिँया कर लगोलिय। पावल हसे सिलास झ्यालखनवामा 16 एक दिन हमरा परथाना करलि ठउरियामा जाइखुनि, भुत-आत्मा लागल एगुडा कमारि-छउडिसाङे भेट भेलइ। उअ भुत-आत्माक सक्तिसे भविस्य कहके वकर मलिकवाक तहिँया बहुत पइसा कमाके दिय। 17 उअ पावल हसे हमार पाछा-पाछा याके चिलइते यसके कहिय, “इअ मन्सावाह सबसे महान परमेस्वरक सेवक हखइ। हिनिका तोहराके मुक्तिक बारेमा परचार करसइ।” 18 उअ बहुत दिनलइ यसने कहते रहलिय। तब पावल झ्याउँ मानके वकरवरि फिरलिय हसे भुत-आत्माके कहलिय, “मुइ तोरके येसु ख्रिस्टक नाउँमा आग्या देइ बडहिँ, वकरसे निकडके जाहि।” यतुरा कहतेकि उअ भुत-आत्मा वकरसे निकडके जइबे करलिय। 19 जब वकर मलिकवासभक उअ कमारि छउडियासे पइसा कमाएके यसरा हेरेलइ, तब हुनुका पावल हसे सिलासके पकडके सहरवाक चोकवामा सासकसभक लघिना घिसियउते लिगलइ। 20 हुनुका पावल हसे सिलासके रोमि सरकारक हकिमवानिक यागा ठडियाके कहलइ “इअ मन्सावाह यहुदि भके हमार जम्मे सहरवामा हुलदाङा करइ बडइ। 21 हिनिका यसनुक रितिरिवाज सिखोसइकि जुन हमरा रोमि मन्सावानिके गरहन हसे पालन करे ठिक हइने बडइ।” 22 तब भिडवाक मन्सावाह मिलके पावल हसे सिलासके पिटे यलइ। सहरवाक हकिमवाह फेनि हुनुकर लुगवाह फारदेलइ हसे लाठिसे पिटेके हुकुम देलइ। 23 खुभे पिटसकलेपर हुनुकाके झ्यालखनवामा थुन देलइ हसे झ्यालखनवाक हकिमावाके डउलसे वगरेके हुकुम देलइ। 24 यसनुक हुकुम पउलेसे उअ हकिमवा हुनुकाके झ्यालखनवाक भितरा कोठवामा लिगलिय हसे हुनुकर टङवामा ठिँगुरा लगाके धरदेलिय। 25 याधा रतियावरि पावल हसे सिलास परथाना करते परमेस्वरक भजन गवइ रहलइ हसे याको कइदियाह सुनइ रहलइ। 26 तखनहिँ यरमरका एगुडा जबड भुइचाल गेलइ हसे झ्यालखनवाक जगवा डिङलइ। तब झ्यालखनवाक जम्मे दुवरिया वइघरहिँ खोलेलइ हसे जम्मे कइदियानिक बन्हलि सिकरिया फेनि फुचलइ। 27 जब झ्यालखनवाक हकिमवा जगलिय, वहवाँक जम्मे दुवरिया खोलाइल देखलिय। तब जम्मे कइदियाह भागिसकल बडइ कहके, आत्महत्या करेके विचारसे उअ यापन तरवारवा घिचलिय। 28 बाकि पावल इअ देखके जबड माहे चिल्लाके वकरेके यसके कहलिय, “यपनहिँके नोक्सानि झिन करहुँ। केहकेकि हमरा जम्मे जन यहवहिँ बडहुँ।” 29 इअ सुनके झ्यालखनवाक हकिमवा दिवा माङके हल-हालि कोठवा भितरा गेलिय हसे डरेसे दुलदुलइते पावल हसे सिलासक यागा घोप्टे परलिय। 30 वकरपाछा पावल हसे सिलासके बाहरा लिगाके पुछलिय, “उद्धार पावेके तहिँया मुइ कथि करे परतइ?” 31 तब हुनुका कहलइ, “प्रभु येसु ख्रिस्टमा विस्वास करहुँ, यपनहुँ उद्धार पउबहुँ हसे वसने यपनहुँक घर-परिवार फेनि उद्धार पउतइ।” 32 तब हुनुका उअ हकिमवा हसे वकर परिवारक जम्मे जनके प्रभुक वचन सुनोलइ। 33 रतियाक उहे जुनवामा उअ पावल हसे सिलासके लिगाके हुनुकर घउवाह धोदेलिय। वकरपाछा उअ हसे वकर परिवारक जम्मे जन वइघरहिँ बप्तिस्मा लेलइ। 34 तब उअ हकिमवा हुनुकाके यापन घरवामा लिगाके जेउना देलिय। उअ हसे वकर परिवारवाक जम्मे जन परमेस्वरमा विस्वास करलेसे खाँ खुसि भेलइ। 35 जब बिहान भेलइ, सहरवाक हकिमवाह झ्यालखनवाक हकिमावाके यसके कहके सिपाहिसभके पठोलिय, “उअ मन्सावानिके छाडदिह।” 36 तब झ्यालखनवाक हकिमवा पावलके कहलिय, “सहरवाक हकिमवाह यपनहुँसभके छाड देवेके कहके हुकुम देले बडसि। याबे यपनहुँसभ सान्तिसे जाहुँ।” 37 बाकि पावल उअ सिपहियवानिके कहलिय, “हमरा रोमि नागरिक हखहुँ, ताफेनि हुनुका हमराके बिना दोसक मन्सावानिक यागा पिटलइ हसे झ्यालखनवामा फेनि थुन देलइ हसे याबे हुनुका हमराके चुपे-चुपे पठावे खोजइबडइ? हमरा नाहिँ मनबहुँ? बरु हुनुका यपनहिँ याके हमराके निकडावे परतइ।” 38 तब पावलक कहलि इअ बतवा सिपहियावाह जाके हकिमवानिके सुनादेलइ। जब पावल हसे सिलास रोमि नागरिक हखइ कहके सुनलइ, हुनुका डेरेलइ। 39 उहेसे हुनुका पावल हसे सिलासक लघिना याके छमा मङलइ। वकरपाछा हुनुकाके झ्यालखनवासे बाहरा निकडाके सहरवासे जाहुँ कहके बिन्ति करलइ। 40 तब पावल हसे सिलास झ्यालखनवासे लिडियाक घरवामा गेलइ। वहवाँ हुनुका विस्वासिसभके भेटलइ हसे हुनुकाके सहास देते वहवाँसे बिदा भेलइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.