प्रेरित 15 - चितवनिया थारुयरुसलेमक परिसद 1 पावल हसे बारनाबास एन्टिओखिया सहरवामा रहइखुनि, यहुदिया छेतरसे कतेक जन मन्सेसभ याके वहवाँक विस्वासिसभके यसके सिखावे लगलइ, “यगर तोहरा मोसाक व्यवस्था यनुसार खतना नाहिँ करबह जउँ, तोहरा मुक्ति पावे नाहिँ सकबह।” 2 तब इअ बिसयमा, पावल हसे बारनाबासक हुनुकरसाङे ठोरा-बोलि भेलइ। उहेसे वहवाँक विस्वासिवाह पावल, बारनाबास हसे याको कतेक जनके यकर फइसलाक तहिँया यरुसलेममा भेलि प्रेरितवाह तके एल्डरवानिक लघिना पठावेके निरनय करलइ। 3 तब मन्डलियाक सदस्यसभ हुनुकाके बिदा करके पठोलइ। हुनुका फोनिके हसे सामरिया छेतर हखते जाइखुनि, अयहुदियाह फेनि प्रभु येसुजिमा विस्वास करले बडइ कहके वहवाँक विस्वासिसभके सुनोते गेलइ। इअ बतवा सुनके वहवाँक विस्वासिवाह खाँ खुसि भेलइ। 4 जब हुनुका यरुसलेममा यापुगलइ, मन्डलियाक जम्मे सदस्यसभ, प्रेरितवाह हसे एल्डरवाह हुनुकाके स्वागत करलइ। वकरपाछा, पावल हसे बारनाबास वहवाँ बटियाके जम्मे जनके परमेस्वर हुनुकरसे करलि जम्मे कमवाक बारेमा कहदेलइ। 5 बाकि फरिसियानिक दफवासे यइलि कतेक जन विस्वासिसभ उठके यसके कहलइ, “अयहुदि विस्वासिसभके फेनि खतना करेके हसे मोसाक जम्मे व्यवस्था पालन करेके तहिँया आग्या देवे परतइ।” 6 उहेसे इअ बिसयमा सोच-विचार करेके तहिँया प्रेरितवाह हसे एल्डरवाह बटियलइ। 7 तब बहुत ठोरा-बोलि भेलेपर, पतरुस उठके हुनुकाके कहलिय, “हेरह भयवाह, तोहार थाहे बडइ, कि अयहुदियाह फेनि मोरसे सुसमाचार सुनइ हसे विस्वास करे सकइ कहके परमेस्वर मोरके तोहरे बिचासे बहुत दिन यागासे चुनले बडसि। 8 परमेस्वर, जुने मन्सावाक हृदय जनससि, हुने हमराके पवितर-आत्मा देले नहिँया अयहुदियानिके फेनि पवितर-आत्मा देके हुनुकाके फेनि गरहन करलसि कहके देखोलसि। 9 हुने हमार हसे हुनुकर बिचा किहो भेदभाव हइने करलसि, बाकि हुनुका विस्वास करलेसे, परमेस्वर हुनुकर हृदय सुद्ध पारलसि। 10 याबे तोहरा केहके अयहुदि विस्वासिसभके इअ बोदहर पाला हुनुकर घेन्टियामा बोके लगाके परमेस्वरके जचइ बडह? इअ बोदहरि पलवा नत हमार पुरखावाह न हमरा बोके सकलहुँ। 11 बाकि हमरा विस्वास करसहुँ, कि हमरा प्रभु येसुजिक अनुग्रहसे उद्धार पउले बडहुँ, जसने हुनुका फेनि पउले बडइ।” 12 इअ सुनके कचहेरियामा भेलि जम्मे जन चुप भेलइ। जब बारनाबास हसे पावल परमेस्वर हुनुकरसे अयहुदियानिक बिचा करलि चिन्हा हसे यचम्म-यचम्मक कामक बारेमा बयान करलइ, तब कचहेरियाक जम्मे मन्सावाह ध्यान-पाट लगाके सुनलइ। 13 हुनुका फदक सकलेपर, याकुब कहलिय, “हेरह भयवाह, मोर बतवा सुनह, 14 परमेस्वर कस्के यापन नाउँक तहिँया पहिनासे अयहुदियानि मधेसे यापन तहिँया एगुडा जाति छानलि बतवा सिमोन पतरुस कहले बडिय। 15 इअ बतवा अगमवक्तावानिक वचनसाङे फेनि मिलसइ। जसने लिखाइल बडइ, 16 ‘यकरपाछा मुइ फिरके यबहिँ, हसे दाउदक भसकलि घरवा फेरि बनोबहिँ। मुइ उअ भसकलि भगवासभके फेरि जोडके पहिलेक नहिँया बनादेबहिँ, 17 ताकि याको जम्मे मन्सावाह हसे मोर नाउँसे बलावल जम्मे अयहुदियाह फेनि मोरके खोजतइ। इअ परमप्रभु कहइ बडसि हसे 18 जुने इअ चिजुवा करससि, हुने इअ बतवा बहुत यागासे प्रकास करले बडसि।’ 19 “याकुब यसके कहते गेलिय, याबे मोर इअ विचार बडइ, कि परमेस्वरक लघिना यलहरवा अयहुदियानिके हमरा दुःख नाहिँ देउ। 20 बरु हुनुकाके ‘मुरतियाके चढाके असुद्ध भेलि चिजुवा झिन खइह, धुचुड झिन करिह, घेन्टिया दाबके मारलि पसुवाक मासु झिन खइह हसे ककरो रकतवा फेनि झिन खइह’ कहके लिखके पठाउ। 21 केहकेकि मोसाक देलि व्यवस्था त यगाहेक पुस्तासे जम्मे सहरवामा परचार भके याइल बडइ हसे हरेक विसरामक दिनवामा फेनि सभाघरवाहमा पढेसइ।” अयहुदि विस्वासिसभक तहिँया लिखल चिठि 22 तब प्रेरितवाह हसे एल्डरवाह जम्मे मन्डलियाक सदस्यसभसाङे मिलके यपनहुँसभ मधेसे कतेक जन यगुवासभ चुनके पावल हसे बारनाबाससाङे एन्टिओखिया सहरवामा पठावेके निरनय करलइ। हुनुका विस्वासि ददेर-भयवाह मधेसे यगुवा बारसाबास कहल यहुदा हसे सिलासके पठोलइ। 23 हुनुका यापन हथवासे यसके लिखल एगुडा चिठि पठोलइ, “हमरा यरुसलेममा भेलि प्रेरितवाह, एल्डरवानिसे, तोहार एन्टिओखिया, सिरिया हसे किलिकियामा भेलि जम्मे अयहुदि विस्वासिसभके, अभिवादन बडइ। 24 हमार अधिकार हइने पाके हमार बिचासे गेलि कुनहुँ-कुनहुँ मन्सावाह तोहराके गलत सिछा देके दुःख देलइ कहके हमरा सुनलहुँ। 25 उहेसे हमरा, दु जनके चुनके हुनुकाके हमार सोगावल सङहतियाह बारनाबास हसे पावलसाङे तोहार लघिना पठावेके तहिँया जम्मे जनक सहमतिसे निरनय करलहुँ। 26 पावल हसे बारनाबास हमार प्रभु येसु ख्रिस्टक नाउँक खातिर यापन प्रान देवेके फेनि तयार बडइ। 27 उहेसे हमरा, यहुदा हसे सिलासके तोहार लघिना पठोइ बडहुँ। हुनुका यपनहिँ यापन मुहँवासे इअ बतवा तोहराके कहतइ। 28 केहकेकि चाहिँ लगना इअ नियमसभ छाडके तोहार वपरा याको बोझ नाहिँ देवेके तहिँया पवितर-आत्मा हमराके देखोले बडसि। 29 उहेसे तोहरा मुरतियाके चढाके असुद्ध भेलि चिजुवा झिन खइह, ककरो रकतवा फेनि झिन खइह, घेन्टिया दाबके मारलि पसुक मासु झिन खइह हसे धुचुड झिन करिह। यगर तोहरा यकरसे यपनहिँके तनाउ रखबह जउँ, तोहार तहिँया खाँ डउल हतइ। यखनि बिदा हखुँ।” 30 वकरपाछा, हुनुका चार जन चिठिया लेके एन्टिओखिया सहरवामा गेलइ हसे मन्डलियाक सदस्यसभके एक ठउरिमा बटियाके हुनुकाके उअ चिठिया देलइ। 31 जब हुनुका उअ चिठिया पढलइ, तब जम्मे जन उअ चिठियासे सान्त्वना पउलेसे खाँ खुसि भेलइ। 32 तब यहुदा हसे सिलास जुने यपनहिँ अगमवक्ता रहलइ, हुनुका बहुत वचन कहके, विस्वासिसभके सहास देलइ हसे हुनुकर विस्वासके बरियार बनोलइ। 33 हुनुका वहवाँ किहो दिन रहलेपर विस्वासिवाह हुनुकाके सान्तिसे पठादेलइ। वहवाँक विस्वासिसभसे बिदाबारि भके, हुनुकाके पठोलरानिक लघिना फिरके गेलइ। 34 [बाकि सिलास वहवाँहिँ रहेके मन करलिय।] 35 उहेसे पावल हसे बारनाबास एन्टिओखियामा रहलइ। हुनुका याको बहुत जनसाङे मिलके मन्सावानिके सिछा देते प्रभुक वचन परचार करलइ। पावल हसे बारनाबास बेगरेलइ 36 किहो दिन पाछा पावल बारनाबासके कहलिय, “हमरा जुन-जुन सहरवामा प्रभु येसुजिक बारेमा सुसमाचार परचार करले रहलहुँ, याउ, उअ जम्मे सहरवामा फिरके जाउँ हसे विस्वासिसभक हालखबर बुझुँ।” 37 तब बारनाबास मरकुस कहल युहन्नाके फेनि सङहि लिगे खोजलिय। 38 बाकि मरकुसके सङहि लिगेके बतवा पावलक ठिक हइने लगलइ, केहकेकि मरकुस पामफेलिया छेतरमा हुनुकरसे बेगराके गेल रहलिय हसे हुनुकरसाङे परचारक कमवामा सहभागि हखे यागा हइने गेल रहलिय। 39 उहेसे इअ बतवामा पावल हसे बारनाबासक बिचा ठोरा-बोलि भेलइ हसे हुनुका एक-दोसर जनसे बेगरेलइ। उहेसे बारनाबास मरकुसके सङहि लेलिय हसे पानि-जहजवामा चढके साइप्रस ठिसवामा गेलिय। 40 बाकि पावल सिलासके छानलिय हसे विस्वासिसभके परमेस्वरक अनुग्रहमा यरपन करके वहवाँसे बिदा भेलइ। 41 तब उअ मन्डलियानिके बरियार बनोते सिरिया हसे किलिकिया छेतर हखते गेलिय। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.