प्रेरित 14 - चितवनिया थारुपावल हसे बारनाबास आइकोनियन सहरवामा 1 वसनेकरते, आइकोनियन सहरवामा फेनि पावल हसे बारनाबास यहुदियानिक सभाघरवामा जाके परचार करलइ। हुनुकर परचार यसनुक सक्तिसालि रहलइ, कि वहवाँ भेलि यहुदियाह हसे अयहुदियाह फेनि येसुजिमा विस्वास करलइ। 2 बाकि विस्वास हइने करलहरा यहुदियाह, याको अयहुदि विस्वासिसभक विरोधमा हुनुकर मनवा भडका देलइ। 3 ताफेनि पावल हसे बारनाबास याटसे प्रभुक बारेमा परचार करते, बहुत दिनलइ उअ सहरवामा रहलइ। प्रभु हुनुकर हथवासे यचम्म-यचम्मक चिन्हा देखाके हसे सक्तिसालि कामसभ करके यापन अनुग्रहक वचन सदियो हखइ कहके परमानित करलसि। 4 बाकि उअ सहरवाक मन्सावाह दु दाफामा बटेलइ। कुनहुँ यहुदिसभवरि लगलइ हसे कुनहुँ प्रेरितसभवरि लगलइ। 5 तब किहो अयहुदियाह हसे यहुदियाह यापन सासकसभसाङे मिलके, पावल हसे बारनाबासके सतावेके हसे पत्थरासे ढोकहारके मारे खोजलइ। 6 जब हुनुकाके यकर बारेमा थाह भेलइ, हुनुका लुकोनिया छेतरक लुस्तरा हसे डर्बि सहर हसे यासपासक इलाकामा भागके गेलइ। 7 हुनुका वहवाँ फेनि सुसमाचार परचार करलइ। लुस्तरा हसे डर्बि सहरवामा पावल हसे बारनाबास 8 जब एकपल्टा पावल हसे बारनाबास लुस्तरा सहरवामा परचार करइ रहलइ, वहवाँ एक जन टङवा कमजोर भेल मन्से बइठल रहलिय। उअ जरमतेक लङड भेलेसे, कबहुँ फेनि हइने बुलल रहलिय। 9 उअ मन्सावा पावलक कहलि बतवा ध्यान-पाट देके सुनइ रहलिय। जब पावल वकरेके टक लगाके हेरलिय, उअ मन्सावाक डउल हखेके तहिँया विस्वास भेल देखके, 10 उअ जबड माहे चिल्लाके कहलिय, “तुइ यापन टङवामा ठडियाहि!” तब उअ मन्सावा भकदरे उठलिय हसे बुले लगलिय। 11 जब पावलक करलि कमवा भिडवाक मन्सावाह देखलइ, तब हुनुका लुकोनिया भासामा जबड माहे चिल्लाके यसके कहे लगलइ, “देवतावाह मन्सेक रुप लेके हमार लघिना याइल बडसि।” 12 हुनुका बारनाबासके जिउस देवता हसे पावल मुख्य परचारक भेलेसे, वकरेके हरमेस देवता कहलइ। 13 याबे जिउस देवताक मन्दिर सहरवाक मुख्य दुवरियाक बाहरा रहलिय। उहेसे उअ मन्दिरवाक पुजेरिया मन्सावानिसाङे गोरुसभ हसे फुलक मालासभ लेके पावल हसे बारनाबासक यागा भोग चढावेके इछा करके, सहरवाक मुख्य दुवरियामा बटियलइ। 14 बाकि जब बारनाबास हसे पावल इअ बतवा सुनलइ, हुनुका खाँ दुःखित भके यापन-यापन लुगवा फारलइ हसे मन्सावानिक लघिना दगुरते जाके, जबड माहे चिल्लाके कहलइ, 15 “अरे मन्सावाह, तोहरा केहके इअ करइबडह? हमरा फेनि त तोहरे नहिँया दुःख-सुख भोगलाहर मन्सेसभ हखहुँ। हमरा तोहराके यसनुक बेकार चिजुसे फिराके, स्वरग, धरतिया, समुनदर हसे वकरमा भेलि जम्मे चिजुवा बनोलहर जिउते परमेस्वरक लघिना लिगाएके तहिँया, खुसिक समाद परचार करे याइल बडहुँ। 16 बितलि जुनवामा त, परमेस्वर जम्मे मन्सावानिके यापन-यापन इछा यनुसार चले देलसि। 17 ताफेनि हुने कबहुँ फेनि यसल हसे भलाइक काम करेके हइने छडलसि। हुने तोहराके दाया करके, यकसवासे झरि देके ठिक जुनवामा बालि-नालि देले बडसि। हुने तोहार तहिँया जम्मे खइना चिजु जुटा देले बडसि हसे तोहार हृदय आनन्दसे भर देले बडसि।” 18 इअ जम्मे बतवा कहके फेनि, बारनाबास हसे पावल गारहसे मन्सावानिके भोग चढावेकेसे रोकलइ। 19 बाकि कतेक जन यहुदिसभ एन्टिओखिया हसे आइकोनियन सहरवासे वहवाँ यलइ हसे भिडवाक मन्सावानिके उल्लकाके, पावलके पत्थरासे पिटलइ। हुनुका पावल मरगेलिय कहके, वकरेके सहरवासे बाहरा घिसियोते लिगलइ। 20 बाकि जब चेलवाह पावलक चारिवर बटियलइ, उअ उठलिय हसे सहरवामा पेसलिय। दोसरि दिन बारनाबाससाङे डर्बि सहरवामा गेलिय। पावल हसे बारनाबास फेरि सिरियाक एन्टिओखियामा फिरलइ 21 जब पावल हसे बारनाबास डर्बि सहरवामा सुसमाचार परचार करके बहुत जनके प्रभु येसुजिक चेला बनोलइ, वहवाँसे लुस्तरा हसे आइकोनिया भके हुनुका पिसिदिया छेतरक एन्टिओखिया सहरवामा फिरलइ। 22 हुनुका वहवाँ भेलि प्रभुक चेलवानिक आत्माके बरियार बनोलइ हसे विस्वासमा सबदिन यटल रहेके तहिँया हुनुकाके सहास देके, यसके कहलइ, “हमरा परमेस्वरक राजमा जायके तहिँया खाँ दुःख-कस्ट सहे परतइ।” 23 वकरपाछा पावल हसे बारनाबास हरेक मन्डलिमा एल्डर पदमा मन्सावानिके छानलइ। पावल हसे बारनाबास हुनुका जम्मे जनसाङे मिलके उपास हसे परथाना करके हुनुकर विस्वास करलि, प्रभु येसुजिक हथवामा हुनुकाके सपदेलइ। 24 वकरपाछा हुनुका पिसिदिया छेतर हखते पामफेलिया छेतरमा गेलइ। 25 हुनुका पर्गा सहरवामा परमेस्वरक वचन परचार करसकलेपर, अटालिया सहरवामा गेलइ। 26 हुनुका वहवाँसे पानि-जहजवामा चढके सिरिया छेतरक एन्टिओखिया सहरवामा फिरलइ। इहे सहरवामा विस्वासिवाह पावल हसे बारनाबासके परमेस्वरक अनुग्रहमा सपके परचार करेके काममा पठोले रहलइ। याबे हुनुका उअ कमवा पुरा करके उहे ठउरियामा फिरलइ। 27 हुनुका एन्टिओखिया सहरवा पुगके, वहवाँक मन्डलियाक विस्वासिसभके बटियोलइ। परमेस्वर कस्के हुनुकरसे काम करलसि हसे अयहुदि मन्सावानिक तहिँया विस्वास करेके फेनि पइडा खोल देलसि, वकर बारेमा सुनादेलइ। 28 हुनुका उअ सहरवामा विस्वासिसभसाङे बहुत दिनलइ रहलइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.