प्रेरित 13 - चितवनिया थारुबारनाबास हसे साउलके पठोलइ 1 तखनहिँ एन्टिओखियाक मन्डलियामा अगमवक्ताह हसे गुरुसभ रहलइ। हुनुका बारनाबास, सिमियोन (कहल करिया), कुरेनि सहरवाक लुसियस, परदेसक सासक हेरोदसाङे हुर्कल मनेन हसे साउल रहलिय। 2 एक दिन हुनुका उपास रहके आराधना करइखुनि पवितर-आत्मा हुनुकाके यसके कहलसि, “मुइ बारनाबास हसे साउलके जुन कामक तहिँया बलोले बडहिँ, उहे कमवाक तहिँया हुनुकाके छुटोह।” 3 उहेसे हुनुका बहुत उपास हसे परथाना करसकलेपर, हुनुकर वपरा हथवा राखके परथाना करलइ हसे हुनुकाके पठोलइ। पावलक पहिला परचार यातरा 4 उहेसे बारनाबास हसे पावलके पवितर-आत्मा पठोलेसे, सिलुकिया सहरवामा गेलइ हसे वहवाँसे पानि-जहजवामा चढके साइप्रस ठिसवामा गेलइ। 5 जब हुनुका सालमिस सहरवामा पुगलइ, वहवाँ यहुदियानिक सभाघरवाहमा जाके परमेस्वरक वचन परचार करलइ। तब हुनुकाके मदत करेके तहिँया युहन्ना फेनि हुनुकरसाङे रहलिय। 6 जब हुनुका जम्मे ठिसवामा यातरा करते पाफोस सहरवामा यापुगलइ, वहवाँ हुनुका बार-येसु कहल एक जन यहुदि जादुगरके भेटलइ। उअ यपनहिँके अगमवक्ता कहके कहिय। 7 उअ जादुगरवा साइप्रस ठिसवाक बडके हाकिम सर्गियस पउलसक सङहतिया रहलिय। सर्गियस पउलस एगुडा बुद्धियार मन्से रहलिय। वकर परमेस्वरक वचन सुनेके मन लगलेसे, उअ बारनाबास हसे साउलके बलावे पठोलिय। 8 बाकि उअ जादुगरवा, जाकर नाउँ ग्रिक भासामा एलुमास रहलइ, उअ सर्गियस पउलसके प्रभु येसुजिमा विस्वास करेकेसे रोकेके तहिँया बारनाबास हसे साउलके विरोध करे लगलिय। 9 वकरपाछा साउल, जाकर नाउँ पावल फेनि रहलइ, उअ पवितर-आत्मासे भरपुर भके एलुमासके टक लगाके हेरके कहलिय, 10 “अरे सइतानक सन्तान, जम्मे धारमिकताक सतरु, छलकपट हसे दुस्ट चालसे भरल बडहि। कथि तुइ प्रभुक सोझ पइडा टेडावेके नाहिँ छडबहिँ त? 11 याबे हेरहि, परमप्रभुक दन्ड तोर वपरा परल बडइ। याबे तुइ किहो जुनलइ यान्हर हखबहि हसे घामक इजोर फेनि नाहिँ देखे सकबहि।” वइघरहिँ वकर यखियामा करिया बादर नहिँया भेलइ हसे उअ यान्हर भेलिय। उहेसे कुनहुँ वकर हथवा पकडके डोरया देतइ कहके यतेवते मदत खोजे लगलिय। 12 तब इअ जम्मे घटनावा देखके उअ सासक प्रभु येसुजिमा विस्वास करलिय, केहकेकि प्रभुक बारेमा सिछा सुनके उअ छक परल रहलिय। पावल हसे बारनाबास पिसिदिया छेतरक एन्टिओखिया सहरवामा 13 वकरपाछा पावल हसे वकर सङहतियवाह पाफोस सहरवासे पानि-जहजवामा चढके पामफेलिया छेतरक पर्गा सहरवामा पुगलइ। तखनहिँ मरकुस कहल युहन्ना हुनुकाके वहवाँहिँ छाडके यरुसलेम फिरलिय। 14 बाकि पावल हसे बारनाबास पर्गासे पिसिदिया छेतरक एन्टिओखिया सहरवामा गेलइ। विसरामक दिनवामा हुनुका सभाघरवामा जाके बइठलइ। 15 मोसाक लिखलि व्यवस्था हसे अगमवक्तावानिक लिखलि कितबवा पढसकलेपर, सभाघरवाक यगुवासभ पावल हसे बारनाबास लघिना यसके कहके समाद पठोलइ, “भयवाह, यगर तोहारसाङे मन्सावानिके सहास देना किहो वचन हतइ जउँ कहह।” 16 इअ सुनके पावल उठलिय हसे हथवा बतलाके कहलिय, “इस्राएलिसभ हसे परमेस्वरक डर मनलहरा अयहुदिसभ, मोर बतवा सुनह। 17 हमरा इस्राएलि जतियाक परमेस्वर हमार पुरखावानिके चुनलसि हसे हुनुका मिस्र देसवामा विदेसि भके रहइखुनि, हुनुकाके संख्यामा बहुत बनाके हसे यापन महान सक्तिसे हुनुकाके मिस्र देसवासे निकडाके यनलसि। 18 हुनुका उराठ-ठउरियामा रहइखुनि परमेस्वर चालिस बरसलइ हुनुकर व्यबहार सहलसि। 19-20 हुने कनान देसवामा भेलि सात गो जातिसभके नास करके, हुनुकर देसवा लगभग चार सय पचाँस बरसलइ अधिकार करेके तहिँया इस्राएलिसभके देलसि। वकरपाछा परमेस्वर समुएल अगमवक्ताक जुनवालइ सासन करेके तहिँया हुनुकाके न्यायधिससभ देलसि। 21 “वकरपाछा हमार पुरखावाह परमेस्वरसाङे एगुडा राजाक माङ करलइ। तब परमेस्वर बेन्यामिन कुलक किसक बेटवा साउलके राजा बनोलसि। उअ चालिस बरसलइ राज करलिय। 22 बाकि परमेस्वर वकरेके राजाक पदसे होटाके दाउदके राजा बनोलसि। हुने दाउदक बारेमा गवाहि देके यसके कहलसि, ‘यिसइक बेटवा दाउद मोर मन परल एगुडा मन्से हखिय, जुने मोर जम्मे इछा पुरा करबिय।’ 23 “दाउद रजवाक कुलसे परमेस्वर यापन करलि प्रतिग्या यनुसार इस्राएलिसभक तहिँया मुक्ति देलाहर येसुजिके पठोलसि। 24 येसुजि यइलिसे यागा, युहन्ना जम्मे इस्राएलिसभके पाप मानके बप्तिस्मा लेह कहके परचार करलिय। 25 युहन्ना यापन सेवाकाइक याखिरवरि यसके कहले बडिय, ‘मुइ कुने हखहि कहके तोहरा सोचसह? मुइ मसिह हइने हखहि, बाकि मोरसे पाछा एक जन यवइ बडसि, जाकर चप्पलवाक फिता फोवेके मुइ लाइक हइने बडहिँ।’ 26 “हेरह भयवाह, अब्राहमक सन्तान हसे परमेस्वरक डर मनलहरा जम्मे जन, मुक्तिक इअ सन्देस परमेस्वर हमार तहिँया पठोले बडसि। 27 केहकेकि यरुसलेमक मन्सावाह हसे हुनुकर सासकसभ, येसुजिके हइने चिनलइ। बरु हुनुका येसुजिके मृत्यु दन्डक आग्या देके सबदिन विसरामक दिनवामा पढलि अगमवक्तावानिक लिखलि वचनवा पुरा करलइ। 28 हुनुका येसुजिके मृत्यु दन्ड देवेके तहिँया किहो दोस हइने पउले फेनि, हुनेके मारहिँ परतइ कहके पिलातससाङे बिन्ति करलइ। 29 यसनेकरके, येसुजिक बारेमा लिखइलि जम्मे अगमवाडि पुरा करलेपर, हुनुका येसुजिके क्रुसवासे झारके चिन्डियामा धरदेलइ। 30 बाकि परमेस्वर हुनेके मरलिसे जिउतोले बडसि, 31 हसे गालिल छेतरसे हुनेसाङे यरुसलेममा यइलि मन्सावानिक लघिना बहुत दिनलइ देखा परलसि। याबे उअ मन्सावाह इस्राएलिसभक मन्सावानिक तहिँया साछि बडइ। 32 “याबे हमरा परमेस्वर हमार पुरखावानिसाङे करलि प्रतिग्याक खुसिक समाद तोहार लघिना लेले याइल बडहुँ। 33 परमेस्वर उअ प्रतिग्या येसुजिके मरलिसे जिउताके, हमार, हुनुकर सन्तनवानिक तहिँया पुरा करदेले बडसि। भजनसंग्रह दुमा हुनेक बारेमा यसके लिखाइल बडइ, ‘तुइ मोर पुतर हखहि, याजु मुइ तोरके जनम देले बडहिँ।’ 34 “परमेस्वर ख्रिस्टके सरियाए नाहिँ देके, मरलिसे फेरि जिउतोबसि कहलि बतवाक बारेमा, हुने यसके कहले बडसि, ‘दाउदक तहिँया करलि पवितर हसे अटल आसिस मुइ तोहराके देबहि।’ 35 “उहेसे दोसरि भजनमा फेनि दाउद रजवा यसके कहले बडिय, ‘यपनहुँ यापन पवितर जनक देहियाके सरियाए नाहिँ देबहुँ।’ 36 “इअ बतवा दाउद यपनहिँक बारेमा हइने कहले हखिय, केहकेकि उअ यापन पुस्तामा परमेस्वरक इछा यनुसार सेवा करके मरलेपर यापन पुरखावानिसाङे गडेलिय हसे वकर देहिया सरियलइ। 37 बाकि परमेस्वर येसुजिके मरलिसे जिउतोलसि हसे हुनेक देहिया हइने सरियलइ। 38 उहेसे हेरह भयवाह, इअ येसुजिमा पाप छमा हतइ कहके हमरा घोसना करइ बडहुँ। 39 यसने, हुनेमा विस्वास करलहरा जम्मे जन पापसे छुटकारा पउसइ, जुन छुटकारा मोसाक देलि व्यवस्था माहे पुरा हखे हइने सकलइ। 40 उहेसे, अगमवक्तावानिक फदकलि वचनवा यपनहुँमा पुरा झिन हखइ कहके, यपनहुँसभ चेतले रहबहुँ। 41 परमेस्वर यसके कहलसि, ‘अरे गिल्ला करलहराह, हेरह, यचम्म मनह हसे मरह, केहकेकि तोहार दिनवामा मुइ यसनुक एगुडा काम करइ बडहिँ, कि वकर बारेमा कुनहुँ तोहराके बयान करदेले फेनि, तोहरा कबहुँ फेनि विस्वास नाहिँ करबह’।” 42 जब पावल हसे बारनाबास सभाघरवासे बाहरा निकडके जाए लगलइ, तब मन्सावाह “तोहरा दोसरि विसरामक दिन फेरि याके इअ बतवा हमराके सुनोइह” कहके हुनुकरसाङे बिन्ति करे लगलइ। 43 जब कचहेरिया वरेलइ, बहुत यहुदिसभ हसे यहुदि धरम मनलाहर अयहुदियाह पावल हसे बारनाबासक पाछा लगलइ। तब पावल तके बारनाबास हुनुकरसाङे बात करते, परमेस्वरक अनुग्रहमा सबदिन रहेके कहके बिन्ति करलइ। 44 दोसरि विसरामक दिन उअ सहरवाक जम्मे मन्सावाह परमेस्वरक वचन सुनेके तहिँया बटियलइ। 45 बाकि वहवाँ यइलि मन्सावानिक भिडवा देखके, यहुदियाह खुभे खिस करलइ हसे पावलक बतवाक विरोध करते वकर यपमान करलइ। 46 बाकि पावल हसे बारनाबास याट करके कहलइ, “परमेस्वरक वचन सबसे यागा त तोहरा यहुदियानिके सुनावेके रहलइ, बाकि तोहरा इअ वचनवा इन्कार करलह। याबे तोहराहिँ अनन्त जिवन पावेके लाइक हइने बडह कहके परमान देलेसे, याबे हमरा अयहुदियानिक लघिना जाइबडहुँ। 47 केहकेकि प्रभु हमराके यसके कहके आग्या देले बडसि, ‘धरतियाक वाहि कोनहरवालइक मन्सावाह मुक्ति पवइ कहके मुइ तोहराके अयहुदियानिक तहिँया एगुडा इजोर बनोले बडहिँ’।” 48 जब अयहुदियाह इअ बतवा सुनलइ, हुनुका खुसि भेलइ हसे परमेस्वरक वचनवाक बखान करलइ। जतेक जन अनन्त जिवन पावेके तहिँया पहिनासे छनाइल रहलइ, हुनुका येसु ख्रिस्टमा विस्वास करलइ। 49 उहेसे प्रभुक वचन उअ छेतरक चारिवर फइललइ। 50 बाकि पावल हसे बारनाबासक विरोध करलाहर जम्मे यहुदियाह, परमेस्वरक भक्ति करलाहर उँच स्तरक जनियानिह हसे उअ सहरवाक मुख्य-मुख्य मन्सावानिके हुनुकर विरोधमा उल्लकोलइ। हुनुका पावल हसे बारनाबासके दुःख देते यापन छेतरसे बाहरा निकडा देलइ। 51 उहेसे पावल हसे बारनाबास हुनुकर विरोधमा यापन टङवाक धुरिया झारके आइकोनियन सहरवामा गेलइ। 52 तखनहिँ एन्टिओखियामा भेलि चेलवाह आनन्द हसे पवितर-आत्मासे भरेलइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.