प्रेरित 11 - चितवनिया थारुपतरुस यापन करलि कमवाक स्पस्टिकरन देसिय 1 याबे अयहुदियाह फेनि परमेस्वरक वचन गरहन करलइ कहके यहुदिया छेतरमा भेलि प्रेरितवाह हसे प्रभुमा विस्वास करलहरा याको ददेर-भयवासभ सुनलइ। 2 जब पतरुस फिरके यरुसलेममा पुगलिय, तब यहुदि विस्वासिसभ वकरेके विवाद करके 3 यसके कहलइ, “यपनहुँ त खतना हइने भेलि अयहुदियानिक घरवामा जाके हुनुकरसाङे खेलहुँ।” 4 तब जथि-जथि भेल रहलइ, उअ जम्मे घटनावाक बारेमा पतरुस सुरुसे हुनुकाके सुनावे लगलिय, 5 “मुइ योप्पा सहरवामा परथाना करइखुनि एगुडा दर्सन देखलहिँ। मुइ एगुडा ताना नहिँया चिजु चारु कोनहरवामा पकडके स्वरगसे झरइकि देखलहिँ हसे उअ मोर लघिना यलिय। 6 जब मुइ डउलसे हेरलहिँ, उअ तनवामा धरतियाक जम्मे खलिक जनावर देखलहिँ। वकरमा घरवामा पालना जनावर, वनक जनावर, घिसियाके बुलना जनावर हसे चरइसभ रहलइ। 7 वकरपाछा मुइ एगुडा यसनुक स्वर सुनलहिँ, ‘पतरुस उठहि हसे हुनुकाके मारके खाहि।’ 8 “बाकि मुइ कहलहिँ, ‘हइने प्रभु, मुइ कबहुँ फेनि यसनुक असुद्ध हसे अपवितर चिजु हइने खइले बडहिँ।’ 9 “बाकि स्वरगसे फेरि यसके कहके स्वर यलइ, ‘परमेस्वरक सुद्ध बनोलि चिजुवाके तुइ केहके असुद्ध कहसहि।’ 10 वसने करके तिन पारिलइ यसने भेलइ हसे वकरपाछा जम्मे चिजुवा तनवासाङे स्वरगवरि फेरि लिगेलइ। 11 “तखनहिँ कइसरियासे मोरके बलावे पठावल तिन जन मन्से मोर रहलि घरवामा यापुगलइ। 12 तखनहिँ पवितर-आत्मा मोरके ‘तुइ झिन डेराके हुनुकरसाङे जाहि’ कहके कहलसि। तब इअ छ जन विस्वासिवाह फेनि मोरसाङे गेलइ हसे हमरा उहे मन्सावाक घरवामा गेलहुँ। 13 उअ यापन घरवामा कस्के एगुडा स्वरगदुतके देखलिय कहके हमराके कहलिय। उअ स्वरगदुतवा वकरेके कहलिय, ‘योप्पा सहरवामा पतरुस कहल सिमोनके बलावे पठोहि। 14 उअ याके तोरके हसे तोर जम्मे घर-परिवारके मुक्ति कस्के पावेके कहके वचन सुनोबिय।’ 15 “जब मुइ फदके लगलहिँ, तब पवितर-आत्मा हमारमा याइल नहिँया हुनुकरमा फेनि यलसि। 16 तब प्रभुक कहलि वचनवा मुइ सम्झलहिँ। हुने यसके कहले रहलसि, ‘युहन्ना त पनियामा बप्तिस्मा देलिय, बाकि तोहरा पवितर-आत्मामा बप्तिस्मा पउबह।’ 17 हमरा प्रभु येसु ख्रिस्टमा विस्वास करके जुन वरदान पउलहुँ, परमेस्वर उहे वरदान अयहुदियानिके फेनि देलसि। यगर परमेस्वर यपनहिँ हुनुकाके वरदान देबसि जउँ, हुनेके रोके सकलाहर मुइ कुने हखहि जे?” 18 इअ बतवा सुनसकलेपर यहुदि विस्वासिसभ पतरुसके दोस लगावे छडलइ हसे यसके कहते परमेस्वरक बखान करलइ, “परमेस्वर अयहुदियानिके फेनि यापन-यापन पापि मनवा फिराके परमेस्वरक लघिना यावेके हसे जिवन पावेके मउका देले बडसि।” एन्टिओखियाक मन्डलिमा 19 याबे स्तिफनसक हत्या पाछा सतावटक कारनसे, विस्वासियवाह यरुसलेमसे छाहरछिता भके कुनहुँ फोनिके छेतरमा, कुनहुँ साइप्रस ठिसवामा हसे कुनहुँ एन्टिओखिया सहरवालइ पुगलइ। हुनुका यहुदियानिके मतरे वचन परचार करलइ। 20 बाकि वकरपाछा साइप्रस ठिसवा हसे कुरेनि सहरवासे कतेक जन चेलसभ एन्टिओखियामा याके अयहुदियानिके फेनि प्रभु येसु ख्रिस्टक सुसमाचार परचार करे लगलइ। 21 हुनुकरसाङे प्रभुक सक्ति भेलेसे बहुत जन विस्वास करके प्रभुवरि फिरलइ। 22 इअ समाद यरुसलेमक मन्डलियामा पुगलइ, तब हुनुका बारनाबासके एन्टिओखियामा पठोलइ। 23 उअ एन्टिओखियामा पुगके परमेस्वर वहवाँक मन्सावानिके करलि अनुग्रह देखके खाँ खुसि भेलिय। तब उअ हुनुकाके जम्मे हृदयसे प्रभुमा विस्वासिलो रहिह कहके उत्साह देलिय। 24 केहकेकि बारनाबास पवितर-आत्मा हसे विस्वासमा भराइल एगुडा डउल मन्से रहलिय। वकर कारनसे बहुत मन्सेसभ प्रभुमा विस्वास करलइ। 25 वकरपाछा बारनाबास साउलके खोजे टार्सस सहरवामा गेलिय। 26 जब साउलके पउलिय, उअ वकरेके एन्टिओखियामा यनलिय। हुनुका दुन्हु जन एक बरसलइ विस्वासिसभसाङे सङगति करते बहुत जनके सिछा देलइ। याबे एन्टिओखियामाहिँ सबसे यागा येसुजिक चेलवाह “ख्रिस्टियान” कहके कहलइ। 27 तखनहिँ किहो अगमवक्तासभ यरुसलेमसे एन्टिओखियामा यलइ। 28 हुनुकरमधेमा अगाबास नाउँक एक जन अगमवक्ता रहलिय। उअ मन्डलियामा उठके जम्मे संसारमा जबड यनिकाल परतइ कहके पवितर-आत्मासे अगमवाडि फदकलिय। (इअ अगमवाडि रोमि सासक क्लउडियसक सासन करइखुनि पुरा भेलइ।) 29 उहेसे एन्टिओखियाक विस्वासिवाह यहुदिया छेतरमा हखलहरा विस्वासिसभक तहिँया यापन-यापन देवे सके जोकर भेटि उठाके पठावेके विचार करलइ। 30 उहेसे हुनुका भेटि उठाके बारनाबास हसे साउलसाङे यरुसलेमक मन्डलियाक यगुवानिक लघिना पठादेलइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.