प्रेरित 10 - चितवनिया थारुपतरुस हसे कर्नेलियस 1 कइसरिया सहरवामा कर्नेलियस नाउँक एक जन मन्से रहलिय। उअ इटालिया कहल सइनिक-दलक कप्तान रहलिय। 2 उअ हसे वकर जम्मे परिवरवाक मन्सावाह परमेस्वरक आराधना करइ हसे हुनेक मन परना जिन्गि बितोइ। उअ दुःखि-गरिब मन्सावानिके खाँ दान करिय हसे सबदिन परमेस्वरसे परथाना करिय। 3 एक दिन कर्नेलियस दिनक तिन बजेवरि एगुडा दर्सन देखलिय। उअ दर्सनवामा परमेस्वरक एगुडा स्वरगदुत याके वकरेके “अरे कर्नेलियस” कहके बलोलिय। 4 कर्नेलियस स्वरगदुतवरि निहारके हेरलिय हसे डेराके कहलिय “प्रभु इअ कथि हखइ?” तब स्वरगदुतवा वकरेके कहलिय, “तोर परथनासभ हसे तोर गरिबवानिके देलि दानके परमेस्वर भोगक रुपमा स्विकार करले बडसि। 5 याबे तुइ योप्पा सहरवामा भेलि पतरुस कहल सिमोनके मन्सावानिके बलावे पठोहि। 6 उअ छालाक काम करलाहर सिमोनसाङे रहलिय, जाकर घर समुनदरक तिरवामा रहलइ।” 7 जब कर्नेलियससाङे फदकेलहरा स्वरगदुतवा बिदा भके गेलिय, उअ यापन दु जन बहरिया हसे परमेस्वरके यादर करलाहर यापन एगुडा सेवक सिपाहिके बलोलिय। 8 वकरपाछा कर्नेलियस यापन देखलि जम्मे बतवा कहके हुनुकाके योप्पा सहरवामा पठोलिय। पतरुस दर्सन देखलिय 9 दोसरि दिन जब हुनुका योप्पा सहरवाक लजिके यापुगलइ, तब दिनाक बारह बजल रहलइ हसे तखनहिँ पतरुस घरवाक छतवामा परथाना करे गेलिय। 10 परथाना करते-करते वकर भुख लगलइ, तब उअ जेउना खाएके इछा करलिय। जब दोसरि जन जेउना तयार करइ रहलइ, तखनहिँ पतरुस एगुडा दर्सन देखलिय। 11 उअ दर्सनवामा पतरुस स्वरग खोलाइल हसे वहवाँसे चारु कोनहरवामा बान्हल एगुडा जबड ताना नहिँया किहो चिजु धरतियामा झरइकि देखलिय। 12 उअ तनवामा धरतियाक जम्मे खलिक चार-टाङ भेल जनावर हसे घिसियाके बुलना जिव तके जम्मे खलिक चेरइ रहलइ। 13 तब पतरुस एगुडा स्वर सुनलिय। उअ स्वर पतरुसके यसके कहलिय, “पतरुस, उठ हसे हुनुकाके मारके खाहि।” 14 बाकि पतरुस कहलिय, “हइने प्रभु, मुइ कबहुँ फेनि यसनुक असुद्ध हसे अपवितर चिजु हइने खइले बडहिँ।” 15 तब पतरुस फेरि दोसरि पारि उअ स्वर यसके कहइ सुनलिय, “परमेस्वरक सुद्ध बनोलि चिजुवाके तुइ असुद्ध झिन कहहि।” 16 तिन पारिलइ यसने भेलइ हसे वकरपाछा उअ तनवा फेरि स्वरगवरि लिगेलिय। 17 जब पतरुस यापन देखलि दर्सनवाक यरथ बुझे हइने सकके यलमलेलिय, तखनहिँ कर्नेलियसक पठोलि मन्सावाह सिमोनक घरवा पाता लगाके वकर घरवाक दुवरियामा ठडियलइ। 18 कथि “पतरुस कहल सिमोन यहवाँ रहसिय?” कहके हुनुका पुछलइ। 19 जब पतरुस यापन देखलि दर्सनवाक बारेमा विचार करइ रहलिय, तब पवितर-आत्मा वकरेके कहलसि, “हेरहि, तिन जन मन्सेसभ तोरके खोजइबडइ। 20 उहेसे याबे उठ हसे तर जायके गारह झिन मानके हुनुकरसाङे जाहि, केहकेकि मुइ हुनुकाके पठोले बडहिँ।” 21 तब पतरुस तर यलिय हसे हुनुकर लघिना जाके कहलिय, “यपनहुँसभक खोजलि मन्सावा मोहिँ हखहि। यपनहुँसभ यहवाँ कथि काममा यलहुँ?” 22 तब हुनुका कहलइ, “कप्तान कर्नेलियस हमराके पठोले बडसि। उअ डउल हसे परमेस्वरक डर मनलाहर मन्से हखिय। यहुदियाक जम्मे जन वकरेके यादर करसइ। यपनहुँके उअ घरवामा बलाके यपनहुँसे उपदेस सुनेके कहके स्वरगदुतवासे हुकुम पउले बडिय।” 23 तब पतरुस हुनुकाके घरवा भितरा लिगाके हुनुकर सेवा-सत्कार करलिय हसे उहे राति हुनुका वहवाँहिँ रहलइ। दोसरि दिन पतरुस हसे योप्पामा भेलि कतेक विस्वासिसभ फेनि हुनुकरसाङे गेलइ। पतरुस कर्नेलियसक घरवामा 24 तिसरि दिन हुनुका सिजरिया पुगलइ। वहवाँ कर्नेलियस यापन सङहतियवानिके हसे नतदरवानिके बलाके हुनुकाके इसियाइ रहलइ। 25 जब पतरुस घरवा भितरा पेसे लगलिय, तब कर्नेलियस वकर टङवामा घोप्टे परके वकरेके आराधना करे लगलिय। 26 बाकि पतरुस वकरेके उठोते कहलिय, “उठहुँ, मुइ फेनि त एक जन मन्से मतरे हखहि।” 27 पतरुस कर्नेलियससाङे बात करते घरवा भितरा गेलिय हसे वहवाँ बहुत मन्से बटियाइल देखलिय। 28 पतरुस हुनुकाके कहलिय, “यपनहुँ जम्मे जनक थाहे बडइ कि हमरा यहुदियाह अयहुदि जतियाक मन्सावानिसाङे सङगत करेके हसे हुनुकर घरवामा जायके हमार नियमक विरोध हखइ। बाकि ककरहुँके फेनि असुद्ध कि अपवितर झिन सम्झसि कहके परमेस्वर मोरके देखोले बडसि। 29 उहेसे यपनहुँ मोरके बलावे पठोतेकि मुइ किहो यापत हइने मानके तोहार लघिना यलहिँ। याबे कहहुँ मोरके केहके बलोले बडहुँ?” 30 तब कर्नेलियस कहलिय, “चार दिन यागाक बात हखइ। मुइ दिनाक तिन बजेवरि घरवामा परथाना करइखुनि यरमरका चहकार लुगा पेहरल एक जन मन्से मोर यागा ठडियाके कहलिय, 31 ‘कर्नेलियस, परमेस्वर तोर करलि परथाना सुनले बडसि हसे गरिबवानिके तोर देलि दानवा देखले बडसि। 32 उहेसे योप्पा सहरवामा मन्सावानिके पठाके पतरुस कहल सिमोनके बलोह। उअ छालाक काम करलाहर सिमोनक घरवामा रहसिय। वकर घर समुनदरक तिरवामा बडइ।’ 33 उहेसे मुइ वइघरहिँ यपनहुँके बलावे पठोलहिँ हसे यपनहुँ यहवाँ याके डउले करलहुँ। याबे हमरा जम्मे जन परमेस्वर यपनहुँके आग्या करलि बतवा सुनेके तहिँया प्रभुक यागा बटियाइल बडहुँ।” 34 तब पतरुस कहलिय, “परमेस्वर जम्मे मन्सावानिसाङे बराबर व्यबहार करससि कहके मुइ याबे डउलसे बुझले बडहिँ, 35 बाकि हुनेसे डर मनलहरा हसे यसल काम करलाहर जम्मे जतियाक मन्सावानिके हुने गरहन करससि। 36 यपनहुँसभक थाह बडइ कि, परमेस्वर इस्राएलि मन्सावानिक लघिना यापन वचन पठोलसि हसे हुने येसुजि, जुने जम्मे जनक प्रभु हखसि, हुनेसे सान्तिक सुसमाचार सुनोलसि। 37 उअ समाद युहन्नाक बप्तिस्माक परचार पाछा गालिलक छेतरसे सुरु भके जम्मे यहुदियाक छेतरमा फइललि बतवा यपनहुँसभक थाह बडइ। 38 परमेस्वर नासरतक येसुजिके पवितर-आत्मा हसे सक्तिसे अभिसेक करलसि। वकरपाछा येसुजि डउल काम करते तके भुतवा लगलि मन्सावानिके डउल बनोते जम्मे ठउरियामा गेलसि, केहकेकि परमेस्वर हुनेसाङे रहलसि। 39 “यहुदियानिक देसवामा हसे यरुसलेम सहरवामा करलि जम्मे कमवाक हमरा साछि बडहुँ। हुनुका येसुजिके क्रुसवामा टाँङके मारलइ। 40 बाकि तिसरि दिन परमेस्वर हुनेके मरलिसे जिउतोलसि हसे मन्सावानिक यागा परकट करदेलसि। 41 जम्मे जनके त हइने, बाकि परमेस्वर हमराके साछि बनावेके तहिँया चुनलसि। हुने मरलिसे फेरि जिउतलि पाछा हमराहिँ हखहुँ जुने हुनेसाङे खेलहुँ हसे पिलहुँ। 42 येसुजि हमराके खुसिक समाचार परचार करेके तहिँया आग्या देले बडसि हसे हुनेके परमेस्वर जिउति तके मरलि मन्सावानिक न्यायधिस बनोले बडसि कहके साछि देवेके तहिँया हमराके आग्या देले बडसि। 43 जम्मे अगमवक्तावाह फेनि हुनेक बारेमा साछि देले बडइ, कि हुनेमा विस्वास करलाहर जम्मे जन हुनेक नाउँमा पापक छमा पउतइ।” 44 जब पतरुस इअ बतवा कहते रहलिय, तब वकर वचनवा सुनलहरा जम्मे मन्सावामा पवितर-आत्मा यलसि। 45 परमेस्वर पवितर-आत्माक वरदान अयहुदियानिके फेनि देले देखके पतरुससाङे यइलि यहुदि विस्वासियवाह छक परलइ, 46 केहकेकि हुनुका दोसरे भासामा फदकते हसे परमेस्वरक बखान करते रहलइ। तब पतरुस कहलिय, 47 “याबे हिनिकाके पानिक बप्तिस्मा लेवेके कुने रोके सकतइ? केहकेकि हिनिका फेनि हमार पउलि नहिँया पवितर-आत्मा पउले बडइ।” 48 उहेसे पतरुस हुनुकाके येसु ख्रिस्टक नाउँमा बप्तिस्मा लेवेके आग्या देलिय। वकरपाछा हुनुका पतरुसके किहो दिनलइ हुनुकरसाङे रहेके तहिँया बिन्ति करलइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.