३ युहन्‍ना 1 - चितवनिया थारु

¹ मुइ मन्‍डलियाक एल्‍डरवा युहन्‍नाक वरिसे, प्रिय गायसके इअ चिठिया लिखइ बडहिँ, जकरेके मुइ सदि प्रेम करसहिँ।

² प्रियसभ, तोर जम्‍मे चिजुवामा यसल हखइ हसे तोर आत्‍मिकि जिवन नहिँया तोर देहिजाङर फेनि डउल हखइ कहके मुइ परथाना करसहिँ।

³ कतेक जन विस्‍वासि भाइसभ याके तोर बारेमा कहइकि, मुइ खाँ खुसि भेलहिँ, केहकेकि तुइ सत्‍य सिछाके विस्‍वास करइ रहसहिँ हसे उहे यनुसार जिवन बितोइ बडहिँ कहके कहलइ।

⁴ मोर छोकनियाह सत्‍य बात यनुसार जिवन बितोइ बडइ कहके सुने पउलेसे याको जबड आनन्‍दक बात मोर तहिँया दोसर कथि हतइ त?

⁵ प्रियसभ, तोहरा विस्‍वासि भयवानिक जुने परदेसि भेले फेनि तोहरा सेवा करइबडह, तोहरा विस्‍वासयोग्‍य भके करइबडह।

⁶ हुनुका मन्‍डलियामा तोर प्रेमक बारेमा साछि देले बडइ। तुइ परमेस्‍वरक लजरियामा मन परना तरिकासे हुनुकर यातराक तहिँया मदत कर देतहि त डउल हतिय।

⁷ केहकेकि हुनुका प्रभुमा विस्‍वास हइने करलहरानिसे किहो फेनि हइने लेके प्रभुक नाउँक खातिर यातरामा निकडल बडइ।

⁸ उहेसे हमरा यसने मन्‍सेसभके मदत करे परतइ, ताकि हमरा सत्‍य सिछा देवेके काममा सहभागि हखे सकुँ।

⁹ मुइ मन्‍डलियाके चिठियामा किहो बात लिखले रहलहिँ। बाकि तोहार बिचा जबड हखे खोजलाहर डियोतिरिफास मोर अधिकार स्‍विकार हइने करसिय।

¹⁰ मुइ तोहार लघिना यवइकि वकर करलि हइने डउलि कमवा हसे हमार विरोधमा फदकलि जम्‍मे खराब बतवा सुनोबहि। यतुरामा मतरे खुसि हइने भके, उअ परदेसि भयवानिके स्‍वागत हइने करसिय हसे हुनुकाके स्‍वागत करे खोजलहरानिके फेनि मन्‍डलियासे उअ बाहरा निकडा देसिय।

¹¹ प्रियसभ, हइने डउल बात ककरहुँसे फेनि झिन सिखिह, बरु डउल बात मतरे सिखिह। जुने भलाइ करसइ उअ परमेस्‍वरक हखिय, जुने खराब काम करसिय उअ परमेस्‍वरके हइने देखले बडिय।

¹² डिमेतिरियसक बारेमा जम्‍मे जन यसल गवाहि देसइ हसे वकर जिवन फेनि परमेस्‍वरक सत्‍य वचनसे मिलके यसल गवाहि देसइ। हमरा फेनि उअ बतवाक साछि देसहुँ हसे तोहार थाह बडइ कि, हमार गवाहि सत्‍य बडइ।

¹³ मुइ तोरके बहुत बातसभ लिखेके रहलइ, बाकि मुइ कलम हसे मसिसे लिखे नाहिँ चाहबहिँ।

¹⁴ बरु मुइ तोरके हलहालि भेटेके यासा करइ बडहिँ हसे हमरा मुहा-मुहिँ भेटके बातबिरतन करबहुँ।

¹⁵ तोरके सान्‍ति मिलइ। यहवाँक जम्‍मे सङहतियवाह तोरके अभिवादन पठोले बडइ। वहवाँ भेलि जम्‍मे सङहतियवानिके फेनि मोर अभिवादन सुनादेसि।