२ तिमोथि 4 - चितवनिया थारु1 मुइ परमेस्वर हसे जुन येसु ख्रिस्ट एक दिन यापन राजमा याके जिउति हसे मरलि मन्सावानिक न्याय करबसि, हुनेक यागा तोरके काडा आग्या देके इअ कहइ बडइ कि, 2 तुइ परमेस्वरक वचन परचार करसि। समयमा हसे बेसमयमा फेनि वचन सुनावेके तहिँया तयार रहसि। सहसानसे मन्सावनिके सम्झोसि, चेतवनि देसि हसे यसल सिछासे हुनुकाके उत्साह देसि। 3 यसनुक समय यवइ बडइ, जब मन्सावाह सदि सिछा सुने नाहिँ चाहतइ, बरु यापन-यापन इछाक पाछा लगतइ। हुनुका यपनहिँके मन परना बात सुनोलहर सिछकसभ मतरे बटियोतइ। 4 हुनुका सत्य बात सुनेके इन्कार करतइ हसे पहिलाक मन्सावानिक बनावल काथासभमा यापन मन लगोतइ। 5 बाकि तुइ जम्मे अवस्थामा चेतले रहसि। दुःख सहसि हसे सुसमाचार परचार करते यापन सेवाक काम पुरा करसि। 6 केहकेकि मुइ त भोग हखे जाइ बडहिँ हसे मोर बिदा हखेके जुन लजिके यासकल बडइ। 7 मुइ यसल लडाइ लड सकले बडहिँ। मोर दउड वरोले बडहिँ हसे मोर विस्वासके फेनि बचाके रखले बडहिँ। 8 याबे परमेस्वर मोर तहिँया धारमिकताक मकुट धरदेले बडसि। जुन पुरस्कार धरमि प्रभु उअ दिनवामा मोरके देबसि हसे मोरके मतरे हइने, बाकि हुने यबसि कहके हृदयसे इसियलराह जम्मे जनके देबसि। 9 तुइ मोर लघिना सकभर हल-हालि यावेके कोसिस करसि। 10 केहकेकि डेमास इअ संसारके प्रेम करलेसे मोरके छाडके थेसलोनिके सहरवामा गेल बडिय। क्रेसेन्स गलातिया छेतरमा हसे तितस दलमातिया छेतरमा गेल बडिय। 11 लुका मतरे मोरसाङे बडिय। तुइ मरकुसके यापनसाङे लेले यइसि, केहकेकि उअ मोर सेवाक काममा बहुत मदत करबिय। 12 मुइ तुखिकसके एफिसस सहरवामा पठोले बडहिँ। 13 तुइ यवइकि तरोआस सहरवामा कारपस लघिना छडलि मोर चदरिया हसे कितबवासभ यानदेसि, खास करके छलवाक कितबवा यानेके झिन बिसरोसि। 14 अलेक्जेन्डर लोहरा मोर गहनि हानि करलिय। प्रभुजि वकर करलि कमवा यनुसार वकरसे बदला लेबसि। 15 तुइ वकरसे चेतले रहसि, केहकेकि उअ हमार परचार करलि सिछाक फेनि खाँ विरोध करलिय। 16 जब पहिला पारि मोर मुदा चलइ रहलइ, तखनहिँ कुनहुँ फेनि मोर तहिँया हइने फदकलइ, बाकि जम्मे जन मोरके छाडके गेलइ। इअ बतवाक दोस हुनुकर विरोधमा झिन लगइ। 17 बाकि प्रभुजि मोर पछयमा भके मुइ जम्मे अयहुदियानिके खुसिक समाद पुरा रुपसे सुनावे सकहि कहके मोरके सक्ति देलसि। प्रभुजि त मोरके सिंहक मुहवासे फेनि बचोलसि। 18 प्रभुजि मोरके जम्मे खराबसे बचोबसि हसे हुने स्वरग राजमा मोरके सुरछितसे लिगबसि। हुनेक महिमा सबदिन हखइ। आमेन। पावलक अन्तिम अभिवादन 19 प्रिस्किला, अकिलास हसे ओनेसिफरसक परिवारके फेनि मोर नमस्कार बडइ कहके कहदेसि। 20 इरास्तस कोरिन्थ सहरवामा रहलिय हसे तरोफिमसके मुइ मिलेटस सहरवामा छाड देले बडहिँ, केहकेकि उअ मनियाइल रहलिय। 21 सकभर जडवाक जुन यइलिसे यागा यावेके कोसिस करसि। युबुलस, पुडेस, लिनस, क्लउडिया हसे यहवाँ भेलि जम्मे भयवा-बहिनियाह फेनि तोरके नमस्कार पठोले बडइ। 22 प्रभुजि तोर आत्मासाङे रहसि हसे हुनेक अनुग्रह तोहार जम्मे जनसाङे रहइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.