२ तिमोथि 3 - चितवनिया थारु

वराट दिनक खतरा

¹ बाकि वराट दिनवामा दुःखक जुन यतइ कहके तुइ जनसि।

² केहकेकि तखनहिँ मन्‍सावाह यपनहिँके मतरे माया करतइ हसे पइसाक लोभ करतइ। हुनुका घमन्‍डि, ढिठ, निन्‍दक, यापन दाओ-बाबाक आग्‍या हइने मनलाहर, बइगुनि हसे अपवितर हतइ।

³ हुनुका ककरहुँके फेनि माया नाहिँ करतइ हसे छमा नाहिँ देतइ। हुनुका चुगलेहर, छाडा, डेरटावनेक, यसल बातके घिना करलाहर,

⁴ विस्‍वासघाति, टिहुलार, घमन्‍डसे फुलल रहसइ। परमेस्‍वरके माया नाहिँ करके बरु मोजमाजा करेके मन परोतइ।

⁵ हुनुका धरमक भेस त धारन करतइ, बाकि वकर सक्‍तिके इन्‍कार करतइ। तुइ यसनुक मन्‍सेसभसे तनावे रहसि।

⁶ हुनुकरमधे कतेक जन घरवा-घरवामा जाके पापसे भरल, जम्‍मे खलिक खराब इछा रखलाहर कमजोर जनिनियानिके यापन वसमा पारसइ।

⁷ उअ जनिनियाह सबदिन लउठा सिछा खोजसइ, बाकि सत्‍य ग्‍यान कबहुँ फेनि हइने बुझे सकसइ।

⁸ जसने यान्‍नेस हसे याम्‍ब्रेस मोसाक विरोध करलइ, वसने इअ मन्‍सावाह फेनि सत्‍यक विरोध करसइ। हिनिकर बुद्धिया बिगडल बडइ हसे हिनिकर विस्‍वास नक्‍कलि बडइ।

⁹ बाकि हुनुका बहुत उन्‍नति करे नाहिँ सकतइ, केहकेकि यान्‍नेस हसे याम्‍ब्रेस नहिँया हुनुकर मुरुखता जम्‍मे जनक यागा परकट भेल बडइ।

अन्‍तिम सिछासभ

¹⁰ बाकि तुइ मोर सिछा, मोर चालचलन, मोर जिवनक लछय, मोर विस्‍वास, मोर सहसान, मोर प्रेम हसे मोर स्‍थिरता देखले बडहिँ।

¹¹ मुइ एन्‍टिओखिया, आइकोनियन हसे लुस्‍तरा सहरवामा कस्‍नुक-कस्‍नुक दुःख हसे सतावट सहलहि कहके तोर डउलसे थाह बडइ। बाकि प्रभुजि मोरके उअ जम्‍मे यापत-विपतसे बचोलसि।

¹² जतेक जन येसु ख्रिस्‍टमा भक्‍तिसाङे जिवन बितावेके इछा करसइ हुनुका जम्‍मे जनके सतावट यतइ।

¹³ बाकि दुस्‍ट हसे ठग मन्‍सेसभ खराबसे झन खराब हखते जेतइ। हुनुका दोसरि जनके ठगते यपनहिँ ठगेतइ।

¹⁴ बाकि तुइ यापन सिखलि हसे पुरा मनसे विस्‍वास करलि सिछामा डटके रहसि, केहकेकि इअ बतवा तुइ काकरसे सिखले बडहि कहके तोर थाह बडइ।

¹⁵ तुइ छोटहिसे पवितर धरमसास्‍तरवामा लिखइलि वचन जनले बडहि। इहे तोरके येसु ख्रिस्‍टमा विस्‍वास करके मुक्‍ति पावेके बारेमा ग्‍यान देसइ।

¹⁶ धरमसास्‍तरवामा लिखइलि जम्‍मे वचन परमेस्‍वरक मुहसे याइल हखइ। इअ सिखावेके तहिँया, यरति देवेके तहिँया, हमराके सुधारेके तहिँया हसे धारमिक जिवन जिएके तालिम देवेके तहिँया उपयोगि बडइ,

¹⁷ ताकि परमेस्‍वरक मन्‍सावाह पुरा रुपसे यसल कामक तहिँया तयार रहइ।