२ तिमोथि 2 - चितवनिया थारुयेसु ख्रिस्टक यसल सिपाहि 1 मोर सोगावल बेटा तिमोथि, येसु ख्रिस्टमा भेलि अनुग्रहसे तुइ बरियार हखसि, 2 हसे जुन बतवा तुइ बहुत जन साछिसभक बिचा मोरसे सुनले रहलहि, उअ बतवा दोसरि जनके सिखावे सकलाहर विस्वासयोग्य मन्सावानिके सपदेसि। 3 येसु ख्रिस्टक यसल सिपाहि नहिँया तुइ हमारसाङे दुःख भोगसि। 4 फउजमा कुनहुँ फेनि सिपाहि दोसरे कमवामा हइने यझुरेसिय, केहकेकि यापन सेनापतियाके खुसि पारेके हुनुकर लछय हसइ। 5 वसने, खेलमा भाग लेलाहर खेलाडि खेलवाक नियम यनुसार नाहिँ खेलेबिय जउँ उअ इनाम नाहिँ पउबिय। 6 मेहनत करलाहर किसान उब्जलि बालिक पहिला बखरा पावे परतइ। 7 मुइ तोरके जथि कहइ बडहिँ उअ बतवा डउलसे विचार करसि, केहकेकि प्रभु इअ जम्मे बतवा बुझेके तहिँया तोरके समझ सक्ति देबसि। 8 मरलिसे जिउते भेलि राजा दाउद वंसक सन्तान येसु ख्रिस्टके सम्मझसि, केहकेकि मोर परचार करलि खुसिक समाद इहे हखइ हसे, 9 जुन खुसिक समाद परचार करलेसे मुइ दुःख भोगके अपराधि नहिँया सिकरियामा बन्हाइल बडहिँ। बाकि मन्सावाह परमेस्वरक वचन बान्हे नाहिँ सकतइ। 10 उहेसे परमेस्वरक चुनलि मन्सावानिक तहिँया मुइ जम्मे बतवा सहसहि, ताकि हुनुका फेनि येसु ख्रिस्टमा मुक्ति हसे अनन्त महिमामा सहभागि हखे सकइ। 11 इअ बात सदि हखइ कि: हमरा हुनेसाङे मरबहुँ जउँ, हमरा फेरि हुनेसाङे जिउतबहुँ। 12 हमरा हुनेसाङे दुःख भोगबहुँ जउँ, हमरा फेनि हुनेसाङे राज करबहुँ। हमरा हुनेके इन्कार करबहुँ जउँ, हुने फेनि हमराके इन्कार करबसि। 13 हमरा विस्वासयोग्य नाहिँ रहले फेनि हुने विस्वासयोग्य बडसि, केहकेकि हुने यपनहिँके इन्कार करे नाहिँ सकबसि। परमेस्वरक यसल सेवक 14 तिमोथि, इअ बतवा तुइ विस्वासिसभके सम्झोसि हसे सबदसभक बारेमा झगडा झिन करिह कहके हुनुकाके परमेस्वरक यागा आग्या देसि। इअ ककरोके फेनि भलाइ हइने करसइ, बरु सुनलहरानिके हानि पुगोसइ। 15 परमेस्वरक यागा गरहनयोग्य हखेके तहिँया दिलोजान मेहनत करसि। तुइ एगुडा यसल कामदार बनसि। जुन कामदारके लजिया हखेके आवस्यक हइने बडइ हसे जुने सत्य सिछाके ठिकसे उपयोग करससि। 16 तुइ परमेस्वरक यपमान करना हसे काम हइने लगना बातसे तनाउ रहसि, केहकेकि यसनुक बात त मन्सावानिके परमेस्वरसे बहुते तनाउ लिगसइ। 17 यसनुक सिछा सइनक घाउ नहिँया हखइ। हुमेनियस हसे फिलेतसक सिछा फेनि वसने बडइ। 18 हुनुका सत्य बातसे तनाउ गेल बडइ हसे पुनरुत्थान भेसकल बडइ कहके कतेक जनक विस्वासके हुनुका खलभला देले बडइ। 19 बाकि परमेस्वरक बनोलि बरियारि जगवा दृढसाङे सबदिन रहतइ। उअ जगवामा यसके लिखाइल बडइ कि: “प्रभुजि यापन मन्सावानिके चिनससि” हसे “परमेस्वरक नाउँ लेलहरवा जम्मे जन खराब कामसे तनाउ रहइ।” 20 कुनहुँ फेनि धनि मन्सेक घरमा सोन कि चाँनिक भडिया मतरे हइने रहसइ, बाकि काठक हसे माटिक भडिया फेनि रहसइ। कुनहुँ भडियावा बिसेस कामक तहिँया त कुनहुँ भडियावा साधारन कामक तहिँया परयोग हतइ। 21 यगर कुनहुँ मन्से यपनहिँके खराब कामसे सुद्ध रखबिय, उअ यादर योग्य कामक तहिँया एगुडा भडिया बनबिय, जुन सुद्ध भके घरवाक मलिकवाक तहिँया काम लगना हसे जम्मे यसल कामक तहिँया तयार हखतिय। 22 तुइ जवानिक जम्मे अभिलासासे तनाउ रहसि हसे जुन मन्सावाह सुद्ध हृदयसे प्रभुक नाउँ पुकार करसइ, तुइ फेनि हुनुकरसाङे धारमिकता, विस्वास, प्रेम हसे सान्तिक पाछा लगसि। 23 बाकि तुइ मुरुख हसे काम हइने लगना ठोरा-बोलिसे तनाउ रहसि, केहकेकि तोर थाह बडइ कि, यसनुक बातसे झगडा मतरे हसइ। 24 प्रभुक सेवा करलाहर मन्से झगडा करे हइने बनसइ, बाकि जम्मे जनके दाया करे परतइ। उअ सिखावे सकलाहर हसे सहनसिल मन्से हखे परतइ। 25 उअ यापन विरोधियानिके नम्र भके सिखावे परतइ, परमेस्वर सायद हुनुकर मन बदल देबिय हसे हुनुका सत्यके चिनतइ। 26 यसने हुनुका होस करइ हसे सइतनवाक फानासे बचतइ, केहकेकि सइतनवा यापन इछा पुरा करेके तहिँया हुनुकाके वसमा धरले बडिय। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.