२ तिमोथि 1 - चितवनिया थारु

¹ मुइ पावल, परमेस्‍वरक इछासे, येसु ख्रिस्‍टमा भेलि जिवनक प्रतिग्या यनुसार, येसु ख्रिस्‍टक एगुडा प्रेरित,

² मोर सोगावल बेटा तिमोथिके इअ चिठिया लिखइ बडहिँ। परमेस्‍वर पिता हसे हमार प्रभु येसु ख्रिस्‍टसे तोरके अनुग्रह, दाया हसे सान्‍ति मिलइ।

धन्‍यवाद हसे उत्‍साह

³ यापन पिता-पुरखावानि सेवा करल नहिँया जुन परमेस्‍वरक सेवा मुइ फेनि सुद्ध विवेकसे करते बडहिँ, उअ परमेस्‍वरके मुइ धन्यवाद देइ बडहिँ हसे दिन-रात परथानामा तोरके सम्‍झइ बडहिँ।

⁴ तोर झारलि रोरवा समझके तोरके भेटेके खाँ मन लगइ बडइ, ताकि तोरके भेटके मुइ खाँ खुसि हखे सकबहि।

⁵ मुइ तोर सदि विस्‍वासक सम्‍झना करसहि। जुन विस्‍वास, पहिला तोर बुदाओ लोइस हसे तोर दाओ युनिसमा रहलइ। याबे उअ विस्‍वास तोरमा फेनि बडइ कहके मोर विस्‍वास बडइ।

⁶ उहेसे मुइ तोरके इअ याद करावे चाहबहिँ कि, मुइ तोर वपरा हथवा धरइकि जुन वरदान परमेस्‍वर तोरके देले बडसि, वकरेके परयोग करते रहसि।

⁷ केहकेकि परमेस्‍वर हमराके डरक आत्‍मा हइने, बाकि सक्‍ति, प्रेम हसे यपनहिँके वसमा राखेके आत्‍मा देले बडसि।

⁸ उहेसे तुइ हमार प्रभुक बारेमा गवाहि देवेके झिन लजेसि। मुइ हुनेक तहिँया झ्‍यालखानामा परलहिँ कहके फेनि मोर बारेमा तुइ लाज झिन मानसि। बाकि परमेस्‍वरक सक्‍तिमा खुसिक समाद सुनावेके काममा मोरसाङे दुःख भोगेके तयार हखसि।

⁹ परमेस्‍वर हमराके उद्धार करके यापन मन्‍से हखेके तहिँया बलोलसि। इअ हमार करलि कमवासे हइने, बाकि हुनेक यपने उदेस्‍य हसे अनुग्रहसे बडइ। हुने इअ अनुग्रह संसार सुरु भेलिसे यगाहे येसु ख्रिस्‍टमा हमराके देले रहलसि हसे,

¹⁰ याबे इअ हमार मुक्‍तिदाता येसु ख्रिस्‍ट यइलेपर परकट भेल हखइ। हुने मृत्‍युके नास करके जिवन हसे अविनासके खुसिक समादक माध्‍यमसे परकट करले बडसि।

¹¹ इहे खुसिक समाद परचार करेके तहिँया परमेस्‍वर मोरके एगुडा परचारक, प्रेरित हसे सिछक नियुक्‍त करले बडसि।

¹² उहेसे मुइ इअ दुःख भोगइ बडहिँ। बाकि मुइ यकर तहिँया नाहिँ लजेबहिँ, केहकेकि मुइ काकर वपरा विस्‍वास करले बडहिँ कहके मोर थाह बडइ। परमेस्‍वर जथि मोरके सपले बडसि, उअ यापन यइलि दिनवालइ सुरछित धरबसि कहके मुइ निस्‍चित बडहिँ।

¹³ तुइ येसु ख्रिस्‍टमा भेलि विस्‍वास हसे प्रेममा डटके रहके मोर सिखोलि सदि सिछाक उदाहरन बनसि।

¹⁴ तोरके जिम्‍मा देलि सदि सिछाके हमार भितरा वास करलाहर पवितर-आत्‍माक मदतसे सुरछित रखसि।

¹⁵ तोर थाह बडइ कि, एसिया छेतरमा रहलाहर जम्‍मे जन मोरके त्‍यागके गेलइ। हुनुकरमधे फुगेलस हसे हर्मोगेनस हखइ।

¹⁶ ओनेसिफरसक परिवारके प्रभु दाया करसि, केहकेकि उअ मोरके बहुत पारि भेटके उत्‍साह देलिय हसे मुइ झ्‍यालखनवामा भेलि बिसयमा फेनि उअ लाज हइने मनलिय।

¹⁷ बाकि जब उअ रोम सहरवामा यलिय, उअ उत्‍साहसे मोरके खोजलिय हसे मोरके पउलिय।

¹⁸ प्रभुक यइलि दिनवामा हुने ओनेसिफरसके दाया करिय। मुइ एफिससमा रहइकि उअ मोरके कस्‍के मदत करलिय कहके तोर डउलसे थाह बडइ।