२ थेसलोनिकि 3 - चितवनिया थारु

परथानाक तहिँया अनुरोध

¹ याखिरमा प्रियसभ, हमार तहिँया परथाना करिह, ताकि जसने तोहार बिचा प्रभुक वचनक यादर भेल रहलइ, वसने परमेस्‍वरक वचन हलहालि चारिवर फइलके महिमित हखइ।

² परमेस्‍वर हमराके खराब हसे दुस्‍ट मन्‍सेसभसे बचोसि कहके परथाना करदिह, केहकेकि हरेक जन सुसमाचारमा विस्‍वास हइने करसइ।

³ बाकि प्रभुजि विस्‍वासयोग्‍य बडसि हसे हुने तोहराके बरियार बनोबसि तके दुस्‍ट सइतानसे बचोबसि।

⁴ हमरा जथि बात तोहराके आग्‍या देसहुँ, उअ तोहरा मनले बडह हसे मनते जेबह कहके हमरा प्रभुमा निस्‍चित बडहुँ।

⁵ प्रभु तोहार हृदयके परमेस्‍वरक प्रेमके बुझेके हसे ख्रिस्‍टक नहिँया सहना सक्‍ति दिय।

जम्‍मे जन काम करहि परतइ

⁶ प्रियसभ, प्रभु येसु ख्रिस्‍टक नाउँमा हमरा तोहराके इअ आग्‍या देइ बडहुँ कि, जुन विस्‍वासिसभ हमार देलि सिछा यनुसार हइने चलसइ हसे यल्‍छि बडइ, हुनुकरसे यलग रहिह।

⁷ केहकेकि कस्‍के हमार देखासिखि करे परतइ कहके तोहरा यपनहिँ जनले बडह। हमरा तोहारसाङे रहइकि यल्‍छि भके हइने रहलहुँ।

⁸ हमरा पइसा हइने तिरके ककरो खइना चिजु फेनि हइने खेलहुँ। बाकि तोहार ककरो वपरा फेनि बोझ झिन हखइ कहके हमरा रातदिन खाँ मेहनत करके हसे दुःख सहलहुँ।

⁹ तोहारसे मदत माङेके अधिकार भेले फेनि, बाकि हमार जिवन तोहार तहिँया एगुडा नमुना बनइ कहके हमरा यसनुक करलहुँ।

¹⁰ हमरा तोहारसाङे रहइकि तोहराके इअ आग्‍या देले रहलहुँ, “यगर कुनहुँ काम नाहिँ करबिय जउँ, उअ जेउना झिन खइय।”

¹¹ तोहारमधे कतेक जन यल्‍छि बडह कहके हमरा सुनले बडहुँ। हुनुका यपनहिँ काम हइने करसइ, बाकि यनकर काममा व्‍यरथमा हाथ घलसइ।

¹² याबे हमरा प्रभु येसु ख्रिस्‍टक नाउँमा यसनुक मन्‍सेसभके चुपचाप यापन काम करके खाएके तहिँया हसे यापन हथवासे कमाइ कहके इअ आग्‍या देके बिन्‍ति करइ बडहुँ।

¹³ हेरह प्रियसभ, यसल काम करेके कबहुँ फेनि झिन हरियइह।

¹⁴ यगर तोहारमधे कुनहुँ हमार इअ चिठियामा कहलि बतवा नाहिँ मनबिय जउँ, उअ मन्‍सावाके चिनले रहिह। वकरसाङे सङगत झिन करिह, ताकि उअ यपनहिँ लजियामा परिय।

¹⁵ ताफेनि वकरेके सतरु कहके झिन ठानिह बाकि यापन भाइ समझके वकरेके चेतवनि दिह।

अन्‍तिम अभिवादन

¹⁶ याबे सान्‍ति देलाहर प्रभु यपनहिँ हर समय, हरेक खलिकसे तोहराके सान्‍ति दिय। प्रभु तोहार जम्‍मे जनसाङे रहसि।

¹⁷ मुइ पावल, यपने हथवासे इअ अभिवादन लिखइ बडहिँ। मोर जम्‍मे चिठियाक चिन्‍हा इहे हखइ। मुइ यसने लिखसहिँ।

¹⁸ हमार प्रभु येसु ख्रिस्‍टक अनुग्रह तोहार जम्‍मे जनसाङे रहइ।