२ थेसलोनिकि 2 - चितवनिया थारु

व्‍यवस्‍था-भङ करलाहर

¹ याबे प्रियसभ, हमार प्रभु येसु ख्रिस्‍ट यावेके हसे हमरा हुनेके भेटेके तहिँया जामा हखेके बिसयमा हमरा तोहराके बिन्‍ति करके कहइ बडहुँ कि,

² यगर कुनहुँ प्रभुक यइना दिन यासकल बडइ कहके कहतइ जउँ, तोहरा झिन यतियइह हसे विचलित झिन हखिह। यगर उअ दिनवाक बारेमा कुनहुँ अगमवाडि, समाद, कि चिठि हमारसे याइल बडइ कहके कहतइ जउँ तोहरा विस्‍वास झिन करिह।

³ कुनहुँ फेनि तोहराके कसहुँकरके झिन झुकोइ। केहकेकि जखनिलइ मन्‍सावाह परमेस्‍वरक खाँ विरोध नाहिँ करतइ हसे व्‍यवस्‍था-भङ करलाहर, जुने नास हखेके तहिँया बडिय उअ मन्‍सावा देखा नाहिँ परइलइ, उअ दिनवा नाहिँ यतइ।

⁴ उअ, परमेस्‍वर हसे मन्‍सावानि इस्‍वर मानके पुजलि जम्‍मे चिजुवाक विरोध करबिय हसे याको जम्‍मेसे यपनहिँके जबड कहके ठानबिय। उहेसे उअ परमेस्‍वरक मन्‍दिरवामा पेसके बेठबिय हसे “मोहिँ परमेस्‍वर हखहि” कहके कहबिय।

⁵ मुइ तोहारसाङे रहइकि इअ जम्‍मे बतवा तोहराके कहले रहलहि। कथि तोहरा बिसरोलह?

⁶ दिनवा पुगलेपर व्‍यवस्‍था-भङ करलहरा देखा परबिय। यखनि वकरेके कथि रोकले बडिय कहके तोहरा जनले बडह।

⁷ केहकेकि व्‍यवस्‍था-भङ करलाहरक गुप्‍त सक्‍ति काम करइ बडिय। जखनिलइ परमेस्‍वर उअ सक्‍ति रोकलहराके नाहिँ होटोबिय, उअ रोकलहरा लगातार रोकबिय।

⁸ वकरपाछा व्‍यवस्‍था-भङ करलहरा देखा परबिय। बाकि प्रभु येसुजि यापन मुहवाक सबदसे वकरेके नास करबसि हसे हुनेक आगमनक महिमित प्रकाससे सखाप करबसि।

⁹ उअ व्‍यवस्‍था-भङ करलहरा सइतनवाक सक्‍ति लेके यबिय हसे जम्‍मे खलिक झुठा चिन्‍हासभ देखोबिय हसे यचम्‍म-यचम्‍म कामसभ करबिय।

¹⁰ जतेक जन नास हखे जाइ बडइ, हुनुकाके उअ जम्‍मे खलिक दुस्‍टसे छल करके धोखा देबिय, केहकेकि हुनुका मुक्‍ति देना सत्‍य वचनके प्रेम करेके इन्‍कार करतइ।

¹¹ उहेसे हुनुका झुठा बातमा विस्‍वास करइ कहके परमेस्‍वर हुनुकर लघिना छलक सक्‍ति पठोबसि,

¹² ताकि जतेक जन सत्‍यमा विस्‍वास हइने करके, दुस्‍टतामा आनन्‍द मनोले बडह, उअ जम्‍मे जन दोसि ठहरतइ।

मुक्‍तिक तहिँया छनाइलसभ

¹³ प्रभुक प्रियसभ, तोहार तहिँया सबदिन हमरा परमेस्‍वरके धन्‍यवाद चढोहिँ परतइ, केहकेकि परमेस्‍वर तोहराके उद्धार देवेके तहिँया पहिलासे चुनले बडसि। इअ उद्धार पवितर-आत्‍माक पवितर बनउना काम हसे तोहार सत्‍यमा विस्‍वास करलेसे यसइ।

¹⁴ उहे मुक्‍तिक तहिँया परमेस्‍वर हमार परचार करलि सुसमाचारसे तोहराके बलोलसि, ताकि हमार प्रभु येसु ख्रिस्‍टक महिमामा तोहरा सहभागि हखे सकह।

¹⁵ उहेसे, प्रियसभ, विस्‍वासमा बरियार भके डटके रहिह हसे हमार मुहवासे सुनलि हखइ कि चिठियासे हखइ, हमार सिखोलि जम्‍मे सिछासभ डउलसे पालन करिह।

¹⁶ याबे हमार प्रभु येसु ख्रिस्‍ट यपनहिँ हसे प्रेम करके यापन अनुग्रहसे यसल यसरा हसे सान्‍त्‍वना देलाहर हमार परमेस्‍वर पिता,

¹⁷ तोहार हृदयमा उत्‍साह देइ रहसि हसे हरेक यसल काम तके वचनमा बरियार बनोसि।