२ थेसलोनिकि 1 - चितवनिया थारु1 थेसलोनिकिक मन्डलियामा भेलि हमार परमेस्वर पिता हसे प्रभु येसु ख्रिस्टक विस्वासिसभके मुइ पावल, सिलास हसे तिमोथिसाङे इअ चिठिया लिखइ बडहिँ। 2 परमेस्वर पिता हसे प्रभु येसु ख्रिस्ट तोहराके अनुग्रह हसे सान्ति दिय। धन्यवाद हसे परथाना 3 प्रियसभ, तोहार तहिँया हमरा सबदिन परमेस्वरके धन्यवाद देवे परतइ हसे इअ ठिक फेनि हखइ, केहकेकि तोहार विस्वास खाँ बढल बडइ हसे तोहार जम्मे जनक प्रेम एक-दोसरि जनक तहिँया झन-झन बढते बडइ। 4 उहेसे, जम्मे सतावट हसे दुःखमा तोहार सहसान हसे विस्वासक बारेमा हमरा परमेस्वरक मन्डलियाहमा घमन्ड करसहुँ। 5 इहे परमेस्वरक धारमिक न्यायक परमान हखइ, ताकि तोहरा हुनेक राजक लाइक हखे सकह। वकरे तहिँया तोहरा दुःख भोगइ बडह। 6 हमार परमेस्वर न्यायिक परमेस्वर भेलेसे, हुने तोहराके दुःख देलहरवानिके दुःख देबसि, 7 हसे जब प्रभु येसुजि यापन सक्तिसालि स्वरगदुतवानिसाङे स्वरगसे बरइक यागिमा देखा परबसि, हुने तोहरा दुःख पउलहरानिके हमारसाङे सुख देबसि। 8 हुने परमेस्वरके हइने चिनलहरा हसे हमार प्रभु येसुजिक सुसमाचार स्विकार हइने करलहरानिके दन्ड देबसि। 9 हुनुका प्रभुजिक उपस्थिति हसे हुनेक सक्तिक महिमासे तनाउ भके अनन्त-विनासक दन्ड पउतइ। 10 जुन दिन प्रभुजि यबसि, हुने यापन पवितर जनसे महिमा हसे हुनेमा विस्वास करलहरासे प्रसंसा पउबसि। तोहरा फेनि वहवाँ रहबह, केहकेकि तोहरा हमार देलि गवाहि विस्वास करलह। 11 उहेसे परमेस्वर तोहराके यापन बोलावटक लाइक बनोसि कहके हमरा सबदिन तोहार तहिँया परथाना करसहुँ। हमार परमेस्वर तोहराके जम्मे यसल काम करेके हसे तोहार विस्वाससे याइल इछा पुरा करेके तहिँया सक्ति दिय, 12 ताकि हमार परमेस्वर हसे प्रभु येसुजिक अनुग्रह यनुसार, हमार प्रभु येसुजिक नाउँ तोहारमा हसे तोहरा हुनेमा महिमित हखइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.