२ पतरुस 2 - चितवनिया थारुझुठा सिछकसभ हसे हुनुकर विनास 1 जसने इस्राएलि मन्सावानिक बिचा झुठा अगमवक्तासभ रहलइ, वसने तोहार बिचा फेनि झुठा सिछकसभ देखा परतइ। हुनुका गुप्तरुपसे विनास करना झुठा बात सिखोतइ हसे मोल तिरके उद्धार करलाहर प्रभुके फेनि हुनुका इन्कार करतइ। यसने हुनुका यापनमा यरमरका विनास यनतइ। 2 बहुत जन हुनुकर नहिँया घिन लगना जिवन बितोतइ हसे हुनुकर कारनसे सत्य सिछाक बदनाम करतइ। 3 हुनुका लोभमा परके झुठा बात बनोतइ हसे तोहारसे फाइदा उठोतइ। हुनुकर न्याय पहिनहिँ भेसकल बडइ तके हुनुकर नास पाका हतइ। 4 केहकेकि परमेस्वर पाप करलहरा स्वरगदुतवानिके फेनि बाँकि हइने रखलसि, बाकि हुनुकाके नरकमा फाँकदेलसि हसे हुनुका न्यायक दिनवालइकि तहिँया पतालक यन्हारिमा रखाइल बडइ। 5 परमेस्वर पहिनेक संसारके त बाँकि हइने रखलसि, हुने अधरमि मन्सावानिके दाहासे नास करलसि, बाकि हुने धारमिकताक परचार करलाहर नोहा हसे वकरसाङे याको सात जनके बचोलसि। 6 हुने सदोम हसे गमोरा सहरवाके भस्म पारके हुनुकर नाउँ निसान मेटादेलसि तके यसनेकरके अधरमि मन्सावानिक कथि हसइ कहके देखावेके तहिँया हुनुकाके एगुडा उदाहरन बनादेलसि। 7 बाकि परमेस्वर लोतके सदोम सहरवासे बचोलसि, केहकेकि उअ धरमि रहलिय। उअ छाडा मन्सावानिक घिन लगना चालचलनक कारनसे दुःख पउले रहलिय। 8 लोत उअ मन्सावानिक बिचा रहइकि, हरेक दिन हुनुकर कुकरम स्वभाव देखके तके सुनके यापन धारमिक हृदयमा व्याकुल हखिय। 9 उहेसे धरमि मन्सावानिके परिछासे बचावेके हसे अधरमि मन्सावानिके न्यायक दिनवालइ दन्डक अदलमा राखे प्रभु जनले बडसि, 10 विसेस करके, जुने घिन लगना छाडा काम करइरहसइ हसे परमेस्वरक अधिकारके हेला करसइ। यसनुक झुठा सिछकसभ सहासि हसे घमन्डि रहसइ तके स्वरगमा रहलहरा प्रनियानिक यपमान करेके फेनि हुनुका हइने डेरेसइ। 11 स्वरगदुतवाह इअ झुठा सिछा देलहरानिसे बहुत सक्तिसालि हसे महान भेले ताफेनि प्रभुक यागा स्वरगमा रहलहरा याको प्रनियानिके निना हइने करसइ। 12 बाकि इअ झुठा सिछकसभ विवेक हइने भेल पसुसभ नहिँया बडइ, जुने पकडके मारेके तहिँया जरमल बडइ। हुनुका यापन हइने बुझलि बतवासभक निना करसइ हसे हुनुका पसुसभ नहिँया नास हतइ। 13 हुनुका दोसरे जनके दुःख देलेसे यपनहिँ फेनि दुःख भोगतइ। हुनुकर तहिँया मोजमाजाक बात त दिनहिँक इजोरमा यापन देहियाक अभिलासाके सन्तुस्ट पारेके हखइ। हुनुका दाग हसे खोट लागल मन्सेसभ हखइ तके हुनुका तोहारसाङे जेउना करइकि छल करके आनन्द लेतइ। 14 हुनुकर यखिया धुचुडसे भरल रहसइ हसे हुनुका पाप हइने करके रहे हइने सकसइ। हुनुका चनचल मन भेलि मन्सावानिके फसोसइ। हुनुकर हृदय लोभसे भरल रहसइ। उहेसे हुनुकरमा परमेस्वरक सराप परल बडइ। 15 हुनुका सत्य पइडा छाडके बोअरक बेटवा बालामक चालमा लागल बडइ, जुने खराब काम करके पइसा कमाएके दाउमा रहलिय। 16 बाकि वकर खराब काम तहिँया उअ गारि पउलिय। एगुडा गेडाह गदहा मन्से नहिँया फदकके उअ अगमवक्तावाके मुरुख काम करेकेसे रोकलिय। 17 इअ मन्सावाह त पानि हइने भेल मोहारसभ नहिँया हसे धुधुइ-बयारसे उडियाववाला कुइसा हखइ। हुनुकर तहिँया पतालक यन्हार ठउरि रखाइल बडइ। 18 हुनुका खालि हसे मुरख बात करके घमन्ड करसइ तके हुनुका काम वासनाक देहियाक अभिलासा लोभोना काम देखाके भरखे विस्वासमा याइल मन्सेके फसोसइ। 19 हमरा तोहराके पुरा रुपमा स्वतन्तर बनोबहुँ कहके प्रतिग्या त करसइ, बाकि हुनुका यपनहिँ पाप हसे भ्रस्ट बातक दास बडइ, केहकेकि मन्सावाह जुन चिजुक वसमा परसइ, हुनुका उहे चिजुक दास बनसइ। 20 बाकि हुनुका हमार प्रभु हसे मुक्तिदाता येसु ख्रिस्टके चिनके फेनि संसारक घिन लगना चिजुसे छुटकारा पउलेपर फेरि पापमा परके वकर बसमा परतइ जउँ, हुनुकर दासा पहिलासे झन खराब हतइ। 21 परमेस्वरक धारमिकताक पइडा जानके फेनि पवितर जिवन जिएके तहिँया हुनुकाके देलि आग्याके इन्कार करलिसे त, बरु हुनुका उअ बतवा कबहुँ हइने जनले हुनुकर तहिँया यसल हतिय। 22 कुकुरा यापन ढेकचलि फेरि फिरके खाए यसइ हसे लहादेलि सुवरवा फेरि फिरके हिलवामा नडभडढनमन करसइ, कहलि दृस्टान्त हिनिकरमा ठिक मिलसइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.