२ पतरुस 1 - चितवनिया थारु1 मुइ येसु ख्रिस्टक दास हसे प्रेरित सिमोन पतरुस, हमार परमेस्वर हसे मुक्तिदाता येसु ख्रिस्टक धारमिकतासे हमार नहिँया बहुमुल्य विस्वास पउलहरानिके इअ चिठिया लिखइ बडहिँ। 2 परमेस्वरक हसे प्रभु येसुक ग्यानसे, अनुग्रह तके सान्ति तोहारमा प्रसस्त रुपमा हखइ। ख्रिस्टक बोलावट हसे छनोट 3 जुने यापन महिमा हसे भलाइसे हमराके बलोले बडसि, उअ परमेस्वरके हमरा चिनलेसे, हुने यापन इस्वरिय सक्तिसे हमराके इस्वरिय जिवन जिएके जम्मे चाहिँ लगना चिजु देले बडसि। 4 हुनेक महिमा हसे भलाइक कारनसे हुने हमराके महान हसे बहुमुल्य प्रतिग्यासभ देले बडसि, ताकि वकरसे हुनेक इस्वरिय स्वभावमा सहभागि हखे सकुँ तके समाजमा मन्सावानि दुस्ट अभिलासा हखइकि भस्टचारसे बचे सकुँ। 5 उहेसे तोहरा सकइलइ यापन विस्वासमा यसल व्यबहार, यसल व्यबहारमा ग्यान थपिह, 6 ग्यानमा आत्मसंयम, आत्मसंयममा सहसान, सहसानमा भक्ति, 7 भक्तिमा ददेर-भाइसभक माया, ददेर-भाइसभक मायामा प्रेम थपिह। 8 यगर इअ गुडसभ तोहारमा प्रसस्त रुपमा बढते जेतइ जउँ, तोहरा हमार प्रभु येसु ख्रिस्टक ग्यानमा पुरनता पावेकेमा सक्रिय हखके फर फरोबह। 9 बाकि इअ गुडसभ हइने भेल मन्से यान्हर हखिय हसे धुनरार देखसिय। उअ यापन पुरनि पपवासभसे सुद्ध भेलि बतवा बिसरोले रहसिय। 10 उहेसे हेरह भयवाह, परमेस्वर तोहराके बलोले हसे छानले बडसि कहलि बतवा यापन जिवनमा परमानित करेके तहिँया सकभर कोसिस करिह। यसके करबह जउँ, तोहरा कबहुँ फेनि विस्वाससे पाछा नाहिँ हटबह। 11 तब हमार प्रभु हसे मुक्तिदाता येसु ख्रिस्टक अनन्त राज भितरा तोहार भव्य स्वागत हतइ। धरमसास्तरवाक अगमवाडि 12 हखेके त तोहराके इअ जम्मे बतवा थाह बडइ हसे तोहराके सिखोलि सत्य बतवामा तोहरा डटके बडह, ताफेनि इअ बतवा तोहराके मुइ सबदिन सम्झोइ रहबहिँ। 13 मुइ इअ देहियामा जियइलइ तोहराके इअ बतवा सम्झोइ रहबहिँ कहके मोर ठिक लगसइ। 14 केहकेकि मोर इअ मटियाक देहियाके हलहालि छाडके जाए परतइ कहके हमार प्रभु येसु ख्रिस्ट मोरके स्पस्टसे देखोले बडसि। 15 मुइ मरके गेले फेनि तोहरा इअ बतवासभ याद करह कहके सकभर मुइ कोसिस करइ बडहिँ। 16 जब हमार प्रभु येसु ख्रिस्टक सक्ति हसे आगमनक बारेमा तोहराके कहलहुँ, हमरा चलाखिसे किहो काथा बनाके तोहराके हइने सुनोलहुँ, बाकि हुनेक महिमा हमरा यपने यखियासे देखले रहलहुँ। 17 जब हुने पिता परमेस्वरसे यादर हसे महिमा पउलसि, तखनहिँ परमेस्वर तेजस्वि महिमासे यसके कहलसि, “इअ मोर सोगावल बेटा हखिय, यकरसे मुइ खाँ खुसि बडहिँ।” 18 जब हमरा हुनेसाङे पवितर पहडावामा रहलहुँ, तब स्वरगसे याइल इअ स्वर हमरा यपनहिँ सुनलहुँ। 19 उहे घटनावाक कारनसे अगमवक्तावानिक कहलि वचन सत्य हखइ कहके हमरा झन पाका भेल बडहुँ। तोहरा यकरमा ध्यान देवेके डउल हखइ, केहकेकि उअ वचनवा यन्हारि ठउरियामा डिबरि बरइकि नहिँया हखइ। बिहनाक इजोर नाहिँ हखइलइ हसे बिहनाक तरगनवा ख्रिस्ट तोहार हृदयमा नाहिँ चमकइलइ तोहरा उअ वचनमा ध्यान देके रहे परतइ। 20 तोहरा पहिला इअ बुझे परतइ कि, पवितर धरमसास्तरवाक कुनहुँ फेनि अगमवाडि अगमवक्तावानिक यापन हिसाबसे बनावल बात हइने हखइ। 21 केहकेकि अगमवाडि कुनहुँ मन्सेक इछासे बनावल बात हइने हखइ, बाकि पवितर-आत्मासे प्रेरना पाके परमेस्वरवरिसे फदकइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.