२ युहन्ना 1 - चितवनिया थारु1 मुइ मन्डलियाक एल्डरवा वरिसे, इअ चिठिया परमेस्वरक चुनलि जनिनिया हसे वकर बेटवा-बेटियानिके लिखइ बडहिँ, जकरेके मुइ सदि प्रेम करसहिँ, मुइ मतरे हइने बाकि सत्यके चिनलहरा जम्मे जन फेनि प्रेम करसइ। 2 जुन सत्य हमारमा रहतइ हसे हमारसाङे सबदिन रहबिय। 3 परमेस्वर पिता हसे हुनेक पुतर येसु ख्रिस्ट, हमरा सत्यता हसे प्रेममा रहइकि हमराके अनुग्रह, दाया हसे सान्ति दिय। 4 तोर बेटवा-बेटियाहमधे कतेक जन पिताक देलि आग्या यनुसार सत्यमा जिवन बितोइ देखके मोर खाँ खुसि लगलइ। 5 हेरहि बहिनिया, मुइ तोरके कुनहुँ लउठा आग्या हइने, बाकि जुन सुरुहिँसे हमारसाङे रहलइ उहे लिखइ बडहिँ। हमरा एक-दोसरि जनके प्रेम करु कहके मुइ तोरके बिन्ति करइ बडहिँ। 6 प्रेम करेके कहले परमेस्वरक आग्या यनुसार चलेके हखइ। तोहारा सुरुहिँसे सुनलि आग्या इहे हखइ कि, तोहरा जम्मे जन प्रेममा चले परतइ। 7 केहकेकि धोखा देलाहर बहुत जन संसारमा याइल बडइ, जुने येसु ख्रिस्टके मन्से भके याइल बडसि कहके स्विकार हइने करसइ। यसने मन्से धोखा देलाहर हसे ख्रिस्ट विरोधि हखइ। 8 उहेसे तोहरा चेतले रहिह, जुन चिजुक तहिँया तोहरा मेहनत करइबडह, उअ गुमावेके हइने बाकि पुरा इनाम पावे सकह। 9 जुने ख्रिस्टक सिछामा हइने रहके, दोसरे बातवरि लगसइ वकरसाङे परमेस्वर हइने रहससि। बाकि हुनेक सिछामा लगलहरानिसाङे पिता हसे पुतर दुन्हु जन रहसइ। 10 यगर कुनहुँ तोहार लघिना यतइ हसे इअ सिछा नाहिँ सिखोतइ जउँ, वकरेके घरवामा पेसे झिन दिह तके अभिवादन फेनि झिन करिह। 11 केहकेकि जुने वकरेके अभिवादन करसिय, उअ वकर दुस्ट काममा सहभागि हखसिय। 12 मुइ तोहराके लिखे परना बात त बहुत बडइ, बाकि कागत हसे मसिसे उअ लिखे नाहिँ चाहबहिँ। बरु तोहार लघिना जाके मुहा-मुहिँ बात करके हमार आनन्द पुरा करेके यसरा करइ बडहिँ। 13 परमेस्वरसे चुनाइल तोर बहिनियाक बेटवा-बेटियाह फेनि तोरके अभिवादन पठोले बडइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.