२ कोरिन्‍थि 9 - चितवनिया थारु

¹ वास्‍तवमा, प्रभुक जनक तहिँया देलि दानक बारेमा मुइ तोहराके लिखइ रहे नाहिँ परतइ।

² केहकेकि तोहरा मदत करेके तहिँया कतुरा तयार बडह कहके मोर थाह बडइ। तोहार बारेमा मुइ माकेडोनिया छेतरक मन्‍सावानिके घमन्‍ड करके कहलहिँ कि, परुकासे तोहरा अखइया छेतरमा भेलि मन्‍सावाह दान देवेके तयार बडह। तोहरा उत्‍साहित भेलेसे हुनुका फेनि बहुत जन उत्‍साहित भेल बडइ।

³ मुइ इअ भयवानिके तोहार लघिना इअ कारन पठोइ बडहिँ कि, तोहार बारेमा मोर घमन्‍ड करलि व्‍यरथ झिन हखइ हसे मोर कहलि यनुसार तोहराके सेवाक तहिँया तयार पवइ।

⁴ यगर कुनहुँ माकेडोनियाक मन्‍सावाह मोरसाङे तोहार लघिना यतइ हसे तोहराके दान देवेके तयार नाहिँ पउतइ जउँ, हमरा लजियामा परबहुँ तके तोहरा फेनि कम्‍ति लजियामा नाहिँ परबह, केहकेकि हमरा तोहारमा खाँ भरोसा रखले रहलहुँ।

⁵ उहेसे तोहरा देबहि कहके कहलि दान करकापसे हइने, बाकि राजिखुसिक दान हखइ कहके मुइ गेलिसे यागा इअ भयवानिके तोहार लघिना पठोले डउल हतइ कहके सोचलहिँ।

खुसिसे देल दानक परिनाम

⁶ बाकि इअ बतवा याद करिह कि, जुने इचिके बउसिय, उअ इचिके कटबिय हसे जुने बहुत बउसिय, उअ बहुत कटबिय।

⁷ उहेसे जुने यापन मनवामा जतेक देबहि कहके सोचले रहसइ, उअ मन्‍सावा उतुरे दिय। इछा हइने भके कि करकापमा परके झिन दिह, केहकेकि खुसिसे देलाहर मन्‍सेके परमेस्‍वर प्रेम करससि।

⁸ परमेस्‍वर तोहराके प्रसस्‍तसे आसिस देवे सकबसि, ताकि तोहारसाङे सबदिन हरेक चिजु प्रसस्‍त हखइ हसे हरेक यसल कामक तहिँया तोहारसाङे प्रसस्‍त हखइ।

⁹ धरमसास्‍तरवामा यसके लिखाइल बडइ, “जुने मनवा खोलके गरिबवानिके देसिय, वकर करलि यसल कमवा सबदिन रहतइ।”

¹⁰ परमेस्‍वर खेति करलहरानिके छिटेके बिया हसे खाएके जेउना देससि। वसने हुने तोहराके चाहिँ लगना जम्‍मे चिजु देबसि हसे बहुत बढा देबसि तके तोहार करलि यसल काम फेनि बहुत बढा देबसि।

¹¹ तोहरा जखनि फेनि खुसिसे दोसरे जनके देवे सकह कहके परमेस्‍वर तोहराके धनि बनोबसि। तोहार खुसिसे देलि दानक कारनसे बहुत जन परमेस्‍वरके धन्‍यवाद देतइ।

¹² तोहार देलि दानक सेवाक कामसे परमेस्‍वरक जनक खाँचो पुरा करेके मतरे हइने, बाकि इअ कमवासे हुनुका परमेस्‍वरके खाँ धन्‍यवाद देतइ।

¹³ इअ कमवासे तोहरा कसनुक बडह कहल बात मन्‍सावानिके देखोले बडह। तोहरा ख्रिस्‍टक सुसमाचार विस्‍वास करके आग्‍याकारि भेल बात हसे तोहरा खुल्‍ला हृदयसे देलि भेटिया परमेस्‍वरक महिमा हतइ।

¹⁴ परमेस्‍वर तोहराके यतुरा बहुत अनुग्रह देखोलेसे हुनुका मन खोलके तोहार तहिँया परथाना करसइ।

¹⁵ हुनेक बयान करे हइने सकना वरदानक तहिँया परमेस्‍वरके धन्यवाद हखइ।