२ कोरिन्थि 8 - चितवनिया थारुपरमेस्वरक मन्सावानिक तहिँया दान 1 प्रियसभ, माकेडोनिया छेतरक मन्डलियासभमा परमेस्वरक देलि अनुग्रहक बारेमा हमरा तोहराके कहे चाहइ बडहुँ। 2 हुनुका खाँ संकटक परिछाक समयमा फेनि प्रसस्त आनन्द देखोलइ हसे खाँ गरिबिमा फेनि हृदय खोलके दान देलइ। 3 केहकेकि मुइ पाका कहे सकबहि कि, हुनुका यापन अउकात यनुसार मतरे हइने, बाकि यापन अउकातसे बढता देलइ, उअ फेनि यापन राजिखुसिसे देलइ। 4 हुनुका यरुसलेममा भेलि परमेस्वरक जनसभक मदत करेके तहिँया मउका पाउ कहके हमराके काने-कान बिन्ति करलइ। 5 हमार यासा करलिसे फेनि हुनुका देलइ। बाकि हुनुका पहिला यपनहिँके प्रभुमा समरपन करलइ हसे वकरपाछा परमेस्वरक इछा यनुसार हमार हथवामा सपलइ। 6 तितस तोहार बिचा यसल काम सुरु करलेसे उअ पुरा करिय कहके हमरा वकरेके बिन्ति करलहुँ। 7 जसने तोहरा विस्वासमा, वचनमा, ग्यानमा, उत्साहमा हसे हमार पर प्रेममा बढते खाँ यागा गेल बडह, वसने करके तोहरा इअ यसल काममा फेनि खाँ यागा बढते जइह। 8 मुइ इअ आग्याक रुपमा हइने कहले हखहि, बाकि याको जनके उत्साहसाङे दाजके तोहार प्रेम सत्य हखइ कहके परमानित करेके तहिँया मुइ इअ कहले हखहि। 9 केहकेकि हमार प्रभु येसु ख्रिस्टक अनुग्रह तोहार थाहे बडइ, हुने धनि रहलसि, ताफेनि तोहार तहिँया हुने गरिब हखलसि, ताकि हुनेक गरिबिसे तोहरा धनि हखे सकह। 10 इअ बतवामा तोहराके मुइ यसके सल्लाह देबहिँ, परुका तोहरा देवेके सुरु करलि कमवा याबे पुरा करे सकबह जउँ यसल हतइ। केहकेकि तोहरा देवेके मतरे हइने, बाकि वसनुक मदत देवेके विचारमा फेनि सबसे यागा बडह। 11 याबे तोहार सुरु करलि काम पुरा करह। तोहरा देवेके खाँ इछा करले रहलह। उहे यनुसार यापन अउकात हेरके उअ कमवा पुरा करह। 12 यगर तोहार देवेके इछा बडइ जउँ, तोहारसाङे जथि चिजु बडइ, वकरेसे देले परमेस्वर स्विकार करससि, बाकि तोहारसाङे हइने भेलि चिजु परमेस्वर हइने खोजससि। 13 तोहराके बोझ बोकाके याको जनके हलुक बनावेके मोर इछा हइने, बाकि जम्मे जनक बराबर भार हखइ कहके मुइ इअ कहले हखहि। 14 यखना तोहार लघिना बहुत बडइ जउँ, जाकरसाङे हइने बडइ वकरेके देले डउल हतइ। तोहार पाछे खाँचो परइकि हुनुका तोहराके मदत करतइ। यसने एक-दोसरि जनमा बराबर हखबह। 15 धरमसास्तरवामा लिखाइल बडइ, “जुने यापन तहिँया बहुत जामा करलिय, वकर लघिना बहुत हइने भेलइ हसे जुने यापन तहिँया इचिके जामा करलिय, वकर तहिँया कमि हइने भेलइ।” तितसके कोरिन्थ सहरवामा पठोलइ 16 बाकि परमेस्वरके धन्यवाद हखइ, केहकेकि परमेस्वर तोहार तहिँया मोर नहिँया चिन्ता करना मन तितसके फेनि देले बडसि। 17 केहकेकि उअ हमार कहलि बिन्ति मतरे हइने मनले हखिय, बाकि उत्साहित भके यपने इछासे तोहार लघिना गेल हखिय। 18 हमारसाङे उअ भयवाके पठोइ बडहुँ, जाकर नाउँ जम्मे मन्डलियामा सुसमाचार परचारक कामक तहिँया चलल बडइ। 19 यतुरा मतरे हइने, जामा करलि पइसावा पुगावेके काममा हमारसाङे यातरा करेके तहिँया इअ भयवाके वकर मन्डलियासे वकरेके छानले बडइ। इअ काम हमरा प्रभुक महिमाक तहिँया हसे हमारमा मन्सावानिके मदत करेके मन बडइ कहके देखावेके तहिँया करले हखहुँ। 20 हमराके कुनहुँ दोस झिन लगोइ कहके उदार-चितसे देलि इअ दान हमरा हुसियारसे चलोसहुँ। 21 केहकेकि हमरा प्रभुक यागा मतरे हइने, बाकि मन्सावानिक यागा जथि यादरनिय बडइ उहे करेके ध्यान देसहुँ। 22 हुनुकरसाङे हमार दोसरे एक जन भाइके पठोइ बडहुँ, जकरेके हमरा बहुत पारि काम देलिमा जचइकि हमरा वकरेके बहुत चिजुमा मदत देवेके उत्साहित पउलहुँ। यखनि उअ तोहारमा जबड भरोसा रखलेसे उअ झन याको उत्साहित भेल बडिय। 23 मोर सङहतिया हसे तोहार सेवाक काममा मोर सहयोगि हखिय तके वकरसाङे यलहरवा भयवाह ख्रिस्टक महिमाक तहिँया मन्डलियासभ पठोले हखइ। 24 तोहरा यापन प्रेमक परमान हुनुकाके दिह हसे हमरा केहके तोहार बारेमा घमन्ड करसहुँ कहके मन्डलियाक मन्सावाह देखे सकइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.