२ कोरिन्‍थि 7 - चितवनिया थारु

¹ उहेसे प्रिय सङहतियवाह, परमेस्‍वर हमराके इअ प्रतिग्यासभ देलेसे, हमार देहिया हसे आत्‍माके असुद्ध परना जम्‍मे खलिक चिजुसे हमरा तनाउ रहुँ तके परमेस्‍वरक डर मनते याको पवितर हखते जाउँ।

पावलक आनन्‍द

² तोहरा यापन हृदयमा हमराके ठउरि दिह। हमरा ककरहुँके अन्याय हइने करले बडहुँ। हमरा ककरहुँके हइने डउल पइडा हइने देखोले बडहुँ, नत ककरहुँसे फाइदा उठोले बडहुँ।

³ तोहराके दोसि ठहरावेके तहिँया मुइ इअ हइने कहले हखहि, केहकेकि मुइ यगाहे कहले रहलहिँ, हमार हृदयमा तोहार तहिँया यतुरा प्रेम बडइ कि, हमरा तोहारसाङे मरे कि बचेके फेनि तयार बडहुँ।

⁴ तोहारमा मोर पुरा भरोसा बडइ। तोहारमा मुइ बहुत घमन्‍ड करसहि। मुइ तोहारसे पुरा उत्‍साह पउले बडहिँ हसे हमार जम्‍मे कस्‍टमा मुइ खाँ आनन्‍दित बडहिँ।

⁵ हमरा माकेडोनियामा यइलेपर बिसाएके मउका हइने पउलहुँ, बाकि चारिवरसे कस्‍ट यलइ, एकवरि मन्‍सावानिसाङे लडाइ हसे हृदय भितरा एकवरि डरेडर रहलइ।

⁶ बाकि परमेस्‍वर निरास भेलहरवानिके सान्‍त्‍वना देबसि, हुने तितसके पठाके हमराके फेनि सान्‍त्‍वना देलसि।

⁷ वकर उपस्‍थितिसे मतरे हइने, बाकि तोहारसे तितस जुन सान्‍त्‍वना पउलिय, वकरसे मुइ तोहार बारेमा सुनके सान्‍त्‍वना पउलहिँ। मोरके भेटेके तोहरा खाँ इछा करले बडह कहके उअ हमराके कहलिय। मोर बारेमा तोहार दुःख हसे चिन्‍ताक बारेमा फेनि उअ कहलिय। इअ सुनके मुइ खाँ खुसि भेलहिँ।

⁸ मोर पठोलि चिठिया तोहराके दुःखित बनोले ताफेनि मुइ हइने पछुताइल बडहिँ। सुरुमा मुइ पछुताइ त रहलहिँ, बाकि यखनि मोर चिठिया तोहराके किहो समयक तहिँया मतरे दुःखित बनोले बडिय कहके मोर लगइ बडइ।

⁹ उअ चिठिया तोहराके दुःखित बनोले कहके मुइ खुसि हइने भेल बडहिँ, बाकि इअ दुःखवा तोहराके पछतापवरि हसे जिवन बदलाउवरि लेले गेलिय कहके मुइ खुसि बडहिँ। तोहरा परमेस्‍वरक इछा स्‍विकार करलेसे दुःख पउलह, हमार कारनसे तोहार किहो हानि हइने भेलइ।

¹⁰ जुने परमेस्‍वरक इछा स्‍विकार करके दुःख मनसिय हसे पछताप करसिय, वकरेके हुने बचोससि। वसनुक दुःखमा पछुताउ त किहो फेनि हइने बडइ। बाकि संसारक मन्‍सावानि नहिँया दुःख मतरे लगतइ जउँ इअ मृत्‍युवरि लिगसिय।

¹¹ परमेस्‍वरक इछासे यइलि दुःखवा तोहारमा कथि बदलाउ यनलिय, उअ याद करह: उअ दुःखवा तोहराके कसनुक सत्‍य बनोलिय, तोहारमा यपनहिँके निरदोस परमानित करेके कसनुक इछा, पाप करलाहरसाङे कसनुक खिस लगलइ, कसनुक डर, मोरके भेटेके कसनुक चाहना, कसनुक जोससे मोर पछमा बडह कहके देखावे लगोलहिँ, पपियाके दन्‍ड देवेके कसनुक इछा! इअ जम्‍मेमा तोहरा यपनहिँके निरदोस कहके परमानित करले बडह।

¹² मानोकि मुइ तोहराके उअ चिठिया लिखलहिँ, बाकि अन्याय करलाहर मन्‍से कि, अन्‍याय सहलाहर मन्‍सेक कारनसे हइने लिखले हखहि, बरु परमेस्‍वरक यागा तोहरा हमराके कतुरा वास्‍ता करसह कहके तोहरा यपनहिँ देखे सकेके तहिँया लिखले हखहि।

¹³ हमरा इअ जम्‍मेसे बहुत सान्‍त्‍वना पउले बडहुँ। हमार पउलि सान्‍त्‍वनासाङे तितसक आनन्‍दमा फेनि हमरा झन खाँ खुसि भेलहुँ, केहकेकि हुनुकर व्‍यबहारसे वकर मनवाके सान्‍ति मिलल बडइ।

¹⁴ तितसक यागा मुइ तोहार बारेमा घमन्‍ड करले रहलहिँ, वकरमा मोर किहो लाज हइने भेलइ। जसने हमरा तोहराके कहलि बतवा सत्‍य रहलइ, वसने तितसक यागा हमार करलि घमन्‍ड फेनि सत्‍य ठहरलइ।

¹⁵ तोहरा जम्‍मे जन कस्‍के तितसक कहलि बतवा मनलह हसे कस्‍के डर तके यादरसे वकरेके स्‍वागत करलह, उअ याद करके तोहार तहिँया वकर प्रेम झन बढसइ।

¹⁶ मुइ खाँ खुसि बडहिँ, केहकेकि तोहारमा मोर पुरा भरोसा बडइ।