२ कोरिन्थि 6 - चितवनिया थारु1 हमरा परमेस्वरसाङे काम करलाहरसभ भेलेसे तोहराके इअ बिन्ति करइ बडहुँ कि, परमेस्वरसे पउलि अनुग्रहके व्यरथ हखे झिन दिह। 2 केहकेकि हुने धरमसास्तरवामा कहससि, “ठिक जुनमा मुइ तोहार पुकार सुनलहिँ हसे उद्धार देना दिनमा मुइ तोहराके मदत करलहिँ।” हेरह, परमेस्वरक ठिक जुन त यखना हखइ, उद्धार पउना दिन यजुहिँ हखइ। पावलक कस्ट 3 हमार करलि कमवाक कुनहुँ फेनि दोस लगावे झिन पवइ कहके हमरा ककरहुँके फेनि बाधा देना काम हइने करसहुँ। 4 बरु हमरा जम्मे अवस्थामा परमेस्वरक सेवक हखहुँ कहके देखोसहुँ। यसके हमरा दुःख पवइकि, गारहमा परइकि हसे कस्टमा जम्मे बात धिरजसे सहसहुँ। 5 हमरा पिटाइ खइले बडहुँ, झ्यालखानामा परल बडहुँ, हमार विरोधमा बहुत जन उठल बडइ। खाँ काम करे परलइ। खाए-पिए हसे सुते फेनि हइने पाके रहल बडहुँ। 6 हमरा सुद्ध भके, हमार ग्यानसे, सहना सक्ति हसे दयासे, पवितर-आत्मासे तके सदियो मायासे 7 सत्य समाद परचार करके परमेस्वरक सक्तिसे हमरा काम करसहुँ हसे आकरमन करे परना हथियार दहिनि हथवामा तके यापन रछा करना हथियार लबडि हथवामा बोकसहुँ। इअ हथियार धारमिकता हखइ। 8 मन्सावाह हमराके यादर करले फेनि यादर हइने करले फेनि, बदनाम बात फदकले फेनि, च्याबास कहले फेनि हमरा परमेस्वरक सेवा करसहुँ। हमरा इमान्दार बडहुँ बाकि मन्सावाह ठगहर कहसइ। 9 हमराके डउलसे चिनले फेनि हइने चिनल नहिँया करसइ, हमरा मरल नहिँया भेले फेनि हइने नहिँया हसहुँ हसे सजाय पउले फेनि हइने मरल बडहुँ। 10 सोकमा भेले फेनि सबदिन आनन्दमा बडहुँ, गरिब भेले ताफेनि बहुत जनके आत्मिकि रुपमा धनि बनोसहुँ हसे किहो हइने भेले फेनि हमारसाङे जम्मे चिजु बडइ। 11 कोरिन्थि सहरवाक सङहियावाह, हमरा तोहराके प्रस्टसे कहदेले बडहुँ कि, हमार हृदयमा तोहार तहिँया जबड ठउरि बडइ। 12 हमार प्रेम तोहारपर कम हइने भेल बडइ, बरु तोहार प्रेम हमार पर कम भेल बडइ। 13 याबे मुइ तोहराके यपने बेटा-बेटि नहिँया समझके इअ कहबहिँ कि, तोहरा फेनि यापन हृदय हमार तहिँया खोल दिह। जिउते परमेस्वरक मन्दिर 14 येसुमा विस्वास हइने करलहरानिसाङे एकसङहि नाहिँ ननहाउँ, केहकेकि धरमि हसे अधरमि कस्के मिले सकतइ? कि इजोरक यन्हारसाङे कस्के रहे सकतइ? 15 ख्रिस्ट हसे सइतानक बात कस्के मिले सकतइ? वसने ख्रिस्टमा विस्वास करलहराक हसे विस्वास हइने करलहराक बात कस्के मिले सकतइ? 16 परमेस्वरक मन्दिरमा मुरति राखे मिल्तइ? केहकेकि हमरा त जिउते परमेस्वरक मन्दिर हखहुँ, जसने परमेस्वर कहले बडसि, “मुइ हुनुकरमा बास करबहिँ हसे हुनुकर बिचा बुलफिर करबहिँ। मुइ हुनुकर परमेस्वर हखबहिँ, हसे हुनुका मोर मन्सेसभ हतइ।” 17 उहेसे प्रभु कहससि, “हुनुकरसे निकडके यउह, हसे हुनुकरसे यलग रहिह! असुद्ध चिजु किहो फेनि झिन छुइह, तब मुइ तोहराके स्विकार करबहिँ। 18 मुइ तोहार पिता हखबहिँ हसे तोहरा मोर बेटा-बेटिसभ हखबह कहके सरवसक्तिमान प्रभु कहससि।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.