२ कोरिन्थि 5 - चितवनिया थारुहमार स्वरगिय घर 1 हमार थाह बडइ कि, हमार देहिया पाल नहिँया हसइ, जाकरमा हमरा इअ संसारमा रहइकि बास करसहुँ। यगर हमार बास करलि पाल रुपि देहिया नास भके गेले फेनि स्वरगमा अनन्तलइ रहना परमेस्वरक देल हमार एगुडा स्वरगिय देहि घर जसने हतइ, जुन मन्सेक हाथसे हइने बनावल हखइ। 2 हमरा इअ संसारमा पाल रुपि देहियामा रहइकि छटपटेसहुँ हसे हमार स्वरगिय देहि लुगा नहिँया पेहरेके खाँ इछा करसहुँ। 3 केहकेकि, जब हमरा स्वरगिय देहि लुगा नहिँया पेहरबहुँ, हमरा लुगा बिना नाहिँ हखबहुँ। 4 हमरा इअ पाल रुपि देहियामा रहइलइ बोझमा दबाके छटपटेसहुँ। इअ देहियाके मरके त्यागबहुँ कहके छटपटाइल हइने हखहुँ, बरु कहिया स्वरगिय देहि लुगा नहिँया पेहरबहुँ कहके हखइ, ताकि नास हखनावा देहिया कहियो नास हइने हखना देहिमा बदलइ। 5 परमेस्वरहिँ हमराके स्वरगिय देहि पावेके तहिँया तयार करले बडसि, जुने पाका करेके तहिँया बइनाक रुपमा यापन पवितर-आत्मा देले बडसि। 6 उहेसे हमरा देहियामा इअ संसारमा बचइलइ प्रभुजि रहना ठउरिसे यलग बडहुँ कहके जनलेसे हमरा त कबहुँ फेनि हरेस हइने खेसहुँ। 7 हमरा यखियासे देखलि चिजुवाक यधारमा हइने, बाकि विस्वासक यधारमा जिवन बितोसहुँ। 8 हमरा हरेस हइने खेसहुँ हसे हमरा बरु इअ देहियासे यलग भके प्रभुसाङे स्वरगमा रहना ठउरियामा हमरा रहे चाहसहुँ। 9 उहेसे चाहे हमरा इअ देहियामा रहुँ कि, इअ देहियासे यलग भके रहुँ, हमरा हुनेके सन्तुस्ट पारे चाहसहुँ। 10 केहकेकि हमरा जम्मे जन एक दिन न्यायक तहिँया ख्रिस्टक यागा ठडियाए परतइ, ताकि हमरा हरेक जन इअ देहियामा करलि यसल कि खराब काम यनुसारक प्रतिफल पउबहुँ। मेलमिलापक सेवा 11 प्रभुक डर कथि हखइ कहके हमार थाह बडइ, उहेसे हमरा मन्सावानिके सम्झावेके कोसिस करसहुँ। हमरा कुने हखहुँ कहके परमेस्वरक डउलसे थाह बडइ हसे तोहरा फेनि मोरके हृदयसे जनसह कहके मुइ यासा करइ बडहिँ। 12 हमरा फेरि यपनहिँके तोहार यागा यापन बढाइ हइने करइ बडहुँ, बरु हमार बारेमा तोहराके घमन्ड करेके मउका देइ बडहुँ, ताकि जुने यापन हृदयक बातमा हइने बाकि बाहराक बातमा घमन्ड करसइ, हुनुकाके जवाफ देबे सकह। 13 यगर कुनहुँ हमराके होसमा हइने बडइ कहके कहतइ जउँ, इअ परमेस्वरक खातिर हखइ हसे यगर हमरा होसमा बडहुँ जउँ, इअ तोहार भलाइक तहिँया हखइ। 14 हमरा त ख्रिस्टक प्रेमक वसमा बडहुँ, केहकेकि हमरा निस्चित बडहुँ कि, जम्मे जनक तहिँया ख्रिस्ट मरलेसे जम्मे जनक मृत्यु भेलइ। 15 हुने जम्मे जनक तहिँया मरलसि, ताकि याबे हुनेक लउठा जिवन पउलहराह यापन तहिँया हइने, बाकि जुने हुनुकर खातिर मरके फेरि जियलसि, वकर तहिँया जियपरतइ। 16 याबेसे हमरा ककरहुँके फेनि मन्सेक दृस्टिसे हइने हेरसहुँ। हखेके त हमरा एक समयमा ख्रिस्टके मन्सेक दृस्टिसे हेरहुँ, बाकि याबेसे हमरा हुनेके वसके हइने हेरसहुँ। 17 उहेसे, कुनहुँ ख्रिस्टमा बडइ जउँ, उअ लउठा मन्से हखिय, पुरान जिवन बितके गेल बडइ, हेरह, याबे लउठा जिवन सुरु भेल बडइ। 18 इअ जम्मे करलाहर परमेस्वर हखसि, जुने हमराके ख्रिस्टसे यापनसाङे मिलापमा यनलसि हसे याको मन्सावानिके यापनसाङे मेलमिलाप यनना काम हमराके देले बडसि। 19 केहकेकि परमेस्वर यपनहिँ ख्रिस्टमा जम्मे संसारक मन्सावानिके हुनुकर यापन पाप नाहिँ लेके यापनसाङे मिलापमा यानेके काम करइ रहलसि। याबे इअ मेलमिलापक समाद हमराके देले बडसि। 20 उहेसे हमरा ख्रिस्टक राजदुत हखहुँ हसे परमेस्वर हमारसे तोहराके बिन्ति करइ बडसि। तोहरा परमेस्वरसाङे मेलमिलाप करह कहके हमरा फेनि ख्रिस्टवरिसे तोहराके बिन्ति करइ बडहुँ। 21 ख्रिस्टमा पापे हइने रहलइ, ताफेनि परमेस्वर ख्रिस्टमा हमराके यापन यागा ठिक ठहरावेके ख्रिस्ट वपरा हमार पाप राखदेलसि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.