२ कोरिन्थि 4 - चितवनिया थारुमाटिक भडियामा रखाइल धन 1 परमेस्वर दयगर भेलेसे हमराके इअ काम देले बडसि, उहेसे हमरा हरेस हइने खेसहुँ। 2 हमरा जम्मे खलिक लोकाके करना लाज लगना कामसभ त्यागले बडहुँ। हमरा धुरत काम हइने करसहुँ, नत परमेस्वरक वचनके गलत तरिकासे परयोग करसहुँ। बाकि परमेस्वरक यागा हमरा ख्रिस्टक बारेमा सत्य बात मतरे फदकसहुँ, ताकि जम्मे मन्सावाक मनवामा हमरा छल करइ बडहुँ कहके दोस लगावे झिन सकइ। 3 यगर हमार परचार करलि सुसमाचार घुघटिसे झपाइल नहिँया बडइ जउँ, इअ हुनुकर तहिँया मतरे झपाइल बडइ, जुने नास हखे जाइबडिय। 4 ख्रिस्ट जुने परमेस्वरक स्वरुप हखसि, हुनेक महिमित सुसमाचारक ज्योतिके झिन देखइ कहके इअ संसारक देउतवा सइतनवा, ख्रिस्टमा विस्वास हइने करलहरा मन्सावानिक बुझ्ना सक्तिके यान्हर बनादेले बडिय। 5 हमरा यापन बारेमा परचार हइने करसहुँ, बाकि येसु ख्रिस्ट प्रभु हखसि कहके परचार करसहुँ हसे हमरा येसुजिक तहिँया तोहार सेवक हखहुँ। 6 केहकेकि जुन परमेस्वर, “यन्हारसे इजोर चमकइ” कहके कहलसि, हुने ख्रिस्टक मोहडवामा प्रकास भेल परमेस्वरक महिमित ग्यानक ज्योति देखावेके तहिँया हमार हृदयमा इजोर चमकोले बडसि। 7 याबे हमार हृदयमा हुनेक ज्योति बडइ, बाकि हमरा त इअ बहुत मोल परना धन रखाइल मटिक भडिया नहिँया बडहुँ। उहेसे हमारमा इअ महान सक्ति यापनसे हइने, बाकि परमेस्वरसे यसइ कहके प्रस्ट हसइ। 8 हमरा चारिवरिसे कस्ट भोगइ बडहुँ, बाकि धुर-पिठा हइने भेल बडहुँ। यलमलमा परसहुँ, बाकि निरास हइने भेल बडहुँ। 9 हमार सतरुवाह हमराके सतोसइ, बाकि परमेस्वर हमराके हइने त्यागले बडसि। हमरा खाँ पिटाइ खाके ढलल बडहुँ, बाकि नास हइने भेल बडहुँ। 10 येसुजिक जिवन हमार देहियामा परकट हखइ कहके हुने दुःख भोगके मरल नहिँया हमरा फेनि सबदिन हमार देहियामा दुःख बोकके बुलसहुँ। 11 हमार इअ मरना देहियामा येसुजिक जिवन देखार हखइ कहके हमरा जिउते रहइकि फेनि हुनेक तहिँया सबदिन मृत्युक मुहमा परइ रहसहुँ। 12 यसने, हमरा मृत्युक मुहवाक लजिके जियसहुँ, जाकर कारनसे तोहरा अनन्त जिवन पउले बडह। 13 “मुइ विस्वास करलहिँ, उहेसे मुइ फदकलहिँ” कहके धरमसास्तरवामा लिखइलि मन्सेक नहिँया हमारमा फेनि विस्वासक आत्मा भेलेसे हमरा फेनि विस्वास करसहुँ, उहेसे हमरा फदकसहुँ। 14 हमार थाह बडइ कि, जुन परमेस्वर प्रभु येसुजिके मरलिसे जिउतोलसि, उहे परमेस्वर हमराके फेनि येसुजिसाङे जिउताके तोहरा हसे हमराके यापन लघिना लिगबसि। 15 इअ जम्मे तोहार तहिँया भेल हखइ, केहकेकि जतुरा बहुत मन्सेसभ परमेस्वरक अनुग्रह पउतइ, उतुरे बहुत परमेस्वरक महिमाक तहिँया हुनेके धन्यवाद देवेके काम हतइ। 16 उहेसे हमरा हरेस हइने खेसहुँ। हमार बाहराक देहियाक बोल्ह घटते गेले, ताफेनि हमार भितराक आत्मिकि बोल्ह दिन-दिन लउठा हखते जाइरहसइ। 17 इअ झिन-झिन हसे यघरिक कस्ट त हमराके कबहुँ फेनि हइने वरइना जबड महिमा पावेके मदत करसिय हसे इअ सम्झइकि त याजुक कस्टसे त सदियो किहो फेनि हइने हखइ। 18 हमरा देखार हखना चिजुसभ हइने, बाकि हइने देखार चिजुसभके मन लगोसहुँ, केहकेकि जुन चिजुसभ देखार हसइ, उअ यघरिक तहिँया रहसइ, बाकि जुन चिजुसभ हइने देखार हसइ उअ सबदिनक तहिँया रहतइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.