२ कोरिन्थि 3 - चितवनिया थारु1 कथि हमरा फेरि यपने बखान करेके सुरु करलहुँ? कि याको मन्सावानिक नहिँया हमरा तोहराके हसे तोहरा हमराके “इअ मन्सावाह यसल बडइ” कहल चिठि देवे परतइ त? 2 तोहराहिँ हमार चिठि हखह, जुन जम्मे मन्सावानिक तहिँया चिने हसे पढे सके जोकर हमार हृदयमा लिखाइल नहिँया बडइ। 3 सदि तोहराहिँ ख्रिस्टक लिखल चिठि हखह हसे चिठि यनलाहर हमरहिँ हखहुँ। उअ चिठिया पत्थराक पाटिमा हइने, मसिसे लिखाइल फेनि हइने, बाकि जिउते परमेस्वरक आत्मासे तोहार हृदयमा लिखदेल चिठि हखइ। 4 तोहरा हमार चिठिसभ हखह कहके कहे सकबहुँ, केहकेकि ख्रिस्टसे परमेस्वरमा हमार पुरा भरोसा बडइ। 5 इअ काम करेके बोल्ह हमारमा बडइ कहके दाबि करे नाहिँ सकबहुँ, बाकि इअ काम करेके बोल्ह त परमेस्वरसे यसइ। 6 हुनेहिँ हमराके लउठा करारक सेवकसभ बनेके तहिँया योग्य बनोले बडसि। इअ करार लिखित व्यवस्थाक हइने, बाकि परमेस्वरक आत्माक करार हखइ, केहकेकि पुरनि लिखलि व्यवस्थाक करार मृत्यु यनसिय, बाकि लउठा करारमा पवितर-आत्मा जिवन देससि। लउठा करारक महिमा 7 जब मृत्यु यनना व्यवस्था पत्थराक पटियामा खोपके दियलइ, तब परमेस्वरक जबड महिमा देखा परलइ। मोसाक मोहडवामा तेज हेरइते गेले ताफेनि इस्राएलक मन्सावाह वकर तेज चमकलेसे वकर मोहडावा हेरे हइने सकलइ। यगर मृत्यु यनना व्यवस्था यवइकि यसनुक चहकार रहलइ जउँ, 8 पवितर-आत्माक सेवाकाइ झन कतुरा बहुत महिमित नाहिँ हतइ त? 9 यगर दोसि ठहरोना व्यवस्था यसनुक महिमित रहलइ जउँ, मन्सावानिके धरमि बनोना सेवाकाइ झन याको महिमित नाहिँ हतइ त? 10 वास्तवमा, जुन पहिला महिमित रहलिय, यखनिक महान महिमाक यागा वकर किहो महिमा हइने रहलइ। 11 यगर एघरिक रहना पुरान व्यवस्था त यसनुक महिमित रहलिय जउँ, सबदिन रहना लउठा व्यवस्था कतुरा बहुत महिमित नाहिँ हतइ त! 12 हमार यसनुक यासा भेलेसे हमरा एकदम सहासि भेल बडहुँ। 13 हमरा मोसा नहिँया हइने हखहुँ, जुने यापन मोहडवाक घटते गेलि महिमाक अन्तिम झलक इस्राएलिक मन्सावाह झिन देखइ कहके यापन मोहडवा घुघटिसे झपिय। 14 बाकि हुनुकर मनवा कठोर भेलेसे हसे याजुलइ उअ पुरान करारमा भेल व्यवस्था पढइकि हुनुकर मनवा घुघटियासे झपाइल रहसइ, उहेसे हुनुका सत्य बात बुझे हइने सकसइ। याबे उअ घुघटिया येसु ख्रिस्टमा विस्वास करके मतरे होटावे सकेतइ। 15 सदि, मोसाक देलि व्यवस्था पढइकि यखना फेनि हुनुकर मनवा उअ घुघटियासे झपाइल रहसइ हसे हुनुका हइने बुझसइ। 16 बाकि, जब एक जन मन्से प्रभुमा विस्वास करसिय, तब वकरसे उअ घुघटिया हटसइ। 17 प्रभु कहले पवितर-आत्मा हखसि हसे जाकरमा प्रभुक आत्मा बडसि, उअ बन्धनमा हइने रहसिय। 18 हमरा जम्मे जन घुघटिया होटावल मोहडासे यइनामा देखल नहिँया प्रभुक महिमा देखसहुँ। प्रभु आत्मा हखसि हसे हुनेसे याइल उअ महिमा हमराके हुनेक नहिँया बनोसिय तके पहिलासे याको महिमित बनोते लिगसिय। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.