२ कोरिन्थि 2 - चितवनिया थारु1 उहेसे तोहार चितवा दुःखावे जोकर मुइ फेरि तोहार लघिना नाहिँ यबहिँ कहके निरनय करले बडहिँ। 2 केहकेकि मोरके खुसि बनोलहर मन्से तोहरा मतरे हखह, मुइ तोहार चितवा दुखोबहिँ जउँ कुने मोरके खुसि बनोबिय? 3 हसे मुइ यवइकि मोरके खुसि देलहरवा मन्सावासे मोर चित झिन दुखइ कहके मुइ उअ चिठिया लिखले रहलहिँ, केहकेकि मुइ आनन्द हखइकि तोहरा जम्मे जन फेनि आनन्द हखबह कहके मोर पाका विस्वास रहलइ। 4 तोहार चितवा दुखावेके तहिँया हइने, बाकि मुइ तोहराके खाँ प्रेम करसहिँ जनह कहके हृदयमा खाँ दुःख-कस्ट लेके रोर बहोते मुइ तोहराके इअ चिठिया लिखले बडहिँ। पाप करलहरानिके छमा दिह 5 यगर कुनहुँ चित दुखोले बडइ जउँ उअ मोर हइने, बाकि बहुत काडासे नाहिँ कहले जउँ, तोहार जम्मे जनके फेनि किहो मतरामा चित दुखोले बडिय। 6 तोहारमधे बहुत जनसे जुन सजाय उअ मन्सावा पउले बडिय, उअ वकर तहिँया प्रसस्त बडइ। 7 बरु याबे तोहरा वकरेके छमा देके सान्त्वना देवे परतइ, नत उअ खाँ निरास हखबिय। 8 उहेसे मुइ तोहराके बिन्ति करबहिँ कि, उअ मन्सावाके तोहरा सदिसे प्रेम करसह कहलि बतवा देखोइह। 9 तोहरा जम्मे बिसयमा आग्याकारि बडह कि हइने कहके जाँचेके तहिँया मुइ उअ चिठिया तोहराके लिखले रहलहिँ। 10 जकरेके तोहरा छमा देबह, मुइ फेनि वकरेके छमा देबहिँ। यगर मुइ ककरहुँके छमा देबहिँ जउँ, ख्रिस्टके साछि राखके तोहार हितक तहिँया छमा देले हखहि। 11 ताकि सइतनवा हमराके फसावे झिन पाओ, केहकेकि वकर योजनाक बारेमा हमरा अन्जान हइने बडहुँ। लउठा करारक सेवकसभ 12 जब तरोआस सहरवामा मुइ ख्रिस्टक बारेमा सुसमाचार परचार करे यलहिँ, वहवाँ प्रभु मोरके मउका देलसि। 13 बाकि मुइ हमार भयवा तितसके वहवाँ हइने पउलहि, तब मोर मनवा व्याकुल भेलइ। उहेसे हुनुकरसे बिदा भके मुइ माकेडोनिया छेतरवरि गेलहिँ। 14 बाकि परमेस्वरक धन्यवाद हखइ, हुने सबदिन हमराके ख्रिस्टमा जितक तहिँया डोरयोबसि हसे ख्रिस्टक बारेमा समादक सवाद हमारसे हरेक ठउरिमा फइलोबसि। 15 केहकेकि हमरा मुक्ति पउलहरानिक हसे नास हखलहरानिक बिचा ख्रिस्ट परमेस्वरमा चढावल सवाद बसान यउना महकाह तेल नहिँया बडहुँ। 16 जुने नास हखे जाइबडिय, हुनुकर तहिँया हमरा मृत्युक हइने डउल बसान, बाकि मुक्ति पउलहरानिक तहिँया हमरा जिवन देना सवाद बसान नहिँया हखहुँ। यसनुक जबड कामक तहिँया कुने योग्यक बडइ त? 17 कतेक मन्सेसभ नहिँया हमरा नाहिँ हखुँ, जुने परमेस्वरक वचन यापन व्यक्तिगत फाइदाक तहिँया परचार करसइ, बाकि हमरा त इमान्दार भके ख्रिस्टक सेवकक रुपमा परमेस्वर हमराके हेरइ बडसि कहके परचार करसहुँ, केहकेकि हमराके परमेस्वर पठोले बडसि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.