२ कोरिन्थि 12 - चितवनिया थारुपावलक देखल दर्सन 1 मोर किहो फाइदा नाहिँ भेले ताफेनि मुइ घमन्ड करते जाए परतइ। प्रभुसे पउलि मोर दर्सनसभ हसे परमेस्वरसे जनावल बात फदकइ बडहिँ। 2 मोर थाह बडइ, ख्रिस्टमा विस्वास करलाहर एक जन मन्सेके चिनसहिँ, जुने चउदह बरस यागा तिसरि स्वरगमा उठाके लिगेलिय। उअ देहियामा कि देहि बिना उठाके लिगेलिय, उअ मुइ हइने जनसहिँ, बाकि परमेस्वर मतरे जनससि। 3 मुइ फेरि कहे चाहसहिँ कि, उअ मन्सावा स्वरगमा लिगेलिय। बाकि उअ देहियामा कि देहि बिना उठाके लिगेलिय, उअ मुइ हइने जनसहिँ, परमेस्वर मतरे जनससि। 4 उअ स्वरगलोकमा उठाके लिगेलिय हसे उअ वहवाँ कहे हइने मिलना बातसभ सुनलिय, जुन ककरहुँके फेनि कहेके अनुमति हइने दियाइल बडइ। 5 बाकि मोर बारेमा कहइकि मुइ यापन कमजोरि बाहेक मुइ उअ मन्सावाक बारेमा घमन्ड करबहिँ, बाकि मोर बारेमा मोर कमजोरि बाहेक याको बातमा घमन्ड नाहिँ करबहिँ। 6 यगर मुइ घमन्ड करेके इछा करबहिँ जउँ मुइ फेनि मुरुख नाहिँ हखबहिँ, केहकेकि मुइ सत्य बात फदकसहिँ। बाकि मन्सावाह मोर जिवनमा देखलि हसे मोरसे सुनलिसे बढि झिन सम्झइ कहके मुइ चाहसहिँ। 7 मोरमा यचम्मक बातसभ परकट करइलेसे मुइ घमन्डमा नाहिँ फुलहिँ कहके मोरके सतावेके हसे घमन्डसे रोकेके तहिँया मोर देहियामा एगुडा काँट नहिँया, सइतनवाक दुत दियलइ। 8 उअ मोरसे होटा देहुँ कहके मुइ तिन पारि प्रभुसे बिन्ति करलहिँ। 9 बाकि हुने मोरके कहलसि, “मोर अनुग्रह तोर तहिँया प्रसस्त बडइ, केहकेकि तुइ कमजोर हखइकि मोर सक्ति तोरमा पुरा काम करसिय।” उहेसे ख्रिस्टक सक्ति मोरसाङे रहइ कहके मोर कमजोरिमा झन खुसि भके मुइ घमन्ड करसहिँ। 10 उहेसे ख्रिस्टक तहिँया कमजोरिसभमा, बदनामसभमा, दुःख-कस्टसभमा, सतावटसभमा, यापत-विपतसभमा मुइ खुसि हसहिँ, केहकेकि जब मुइ कमजोर हसहिँ, तब मुइ सक्तिसालि हसहिँ। कोरिन्थिक मन्सावानिक तहिँया पावलक चिन्ता 11 मुइ त मुरुख मन्से नहिँया भेलहिँ, बाकि तोहराहिँ मोरके यसनुक करेके कर लगोलह। हखेके त तोहराहिँ मोरके यादर देवेके रहलइ, केहकेकि मुइ किहो हइने भेले ताफेनि यपनहिँके “सबसे जबड प्रेरित” ठानलहरानिसे फेनि कम हइने बडहिँ। 12 मुइ पुरा धिरजसे सक्तिसालि हसे यचम्मक कामसभ करके तोहार बिचा ख्रिस्टक सदि प्रेरित भेल परमान देले बडहिँ। 13 याको मन्डलियानिसे मुइ तोहराके कुन बातमा हइने डउल व्यबहार करलहिँ त? हँ, मुइ तोहार तहिँया बोझ हइने भेलहिँ। इअ मोर गल्ति हखइ, इअ बतवामा मोरके माफ करिह। 14 याबे तिसरि पारि तोहार लघिना यावेके मुइ तयार बडहिँ हसे इअ पारि फेनि मुइ तोहार तहिँया बोझ नाहिँ हखबहिँ। मुइ तोहारसे पइसा हइने, बाकि तोहराके चाहसहिँ, केहकेकि दाओ-बाबासभक तहिँया बेटवा-बेटियाह हइने, बाकि बेटवा-बेटियानिक तहिँया पो दाओ-बाबा साँचे परसइ। 15 मुइ तोहार आत्मिक भलाइक तहिँया खुसिसे जम्मे देबहिँ हसे यपनहिँके फेनि देबहिँ। मुइ तोहराके बढता प्रेम करइ, तोहरा केहके मोरके इचिके मतरे प्रेम करबह त? 16 मुइ तोहार बोझ हइने भेलहिँ, इअ बतवा तोहार थाह बडइ। हखेके त कुनहुँ-कुनहुँ मुइ चलाखि करके तोहरासे फाइदा उठोलहिँ कहके सोचे सकतइ। 17 तोहराहिँ कहह, कथि मुइ तोहार लघिना मन्सावानिके पठाके तोहारसे किहो फाइदा उठोलहिँ त? 18 मुइ तितसके तोहार लघिना जायके बिन्ति करलहिँ हसे दोसरि भयवाके फेनि वकरसाङे पठोलहिँ। कथि तितस तोहारसे किहो फाइदा उठोलिय त? कथि हमरा एके भावनामा हइने चललहुँ? कथि हमरा एके पइडामा हइने बुललहुँ? 19 हखे सकतइ, हमरा इअ जम्मे यापन बचाउक तहिँया फदकइ बडहुँ कहके तोहरा यापन मनवामा विचार करइबडह। बाकि यसनुक हइने हखइ! प्रियसभ, हमरा इअ त ख्रिस्टमा भके परमेस्वरक यागा फदकइ बडहुँ। हमरा इअ जम्मे तोहार आत्मिकि उन्नतिक तहिँया करइ बडहुँ। 20 केहकेकि मुइ तोहार लघिना यवइकि मोर सोचलि नहिँया तोहरा हसे तोहार सोचलि नहिँया मुइ नाहिँ हखबहिँ कि कहके डेरेसहिँ। तोहार बिचा झगडा, डाहा, खिस, स्वारथ, निना, चुगलि बात, घमन्ड हसे गोलमाल हखे सकतइ। 21 मोर इअ फेनि डर बडइ कि, मुइ तोहार लघिना फेरि यवइकि परमेस्वर मोरके तोहार यागा झिनमिन बनोबसि हसे तोहार तहिँया मुइ सोक करे परतइ, केहकेकि तोहरा बहुत जन पहिला करल पुरान पाप करेके हइने छडले बडह तके तोहरा यापन करलि असुद्ध काम, धुचुड, घिन लगना छाडा काम करेके पछताप हइने करले बडह। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.