२ कोरिन्थि 11 - चितवनिया थारुपावल हसे झुठा प्रेरितसभ 1 मोर इचिका मुरखताके तोहरा सहदेह कहके मुइ चाहसहिँ, बाकि वास्तवमा तोहरा सहइ बडह। 2 परमेस्वर तोहराके डाह करले नहिँया मुइ फेनि तोहराके डाह करइ बडहिँ, केहकेकि मुइ त एक मतरे दुलहा ख्रिस्टसाङे मतरे तोहार बियाह करदेवेके प्रतिग्या करले बडहिँ। उहेसे तोहराके हुनेक पवितर कुवारि-कन्या दुलहिक रुपमा देवे सकुँ कहके सोच करले बडहिँ। 3 जसने सइतनवा सपवा यापन चलाखिसे हव्वाके छलोलिय, वसने ख्रिस्टपर भेलि तोहार सदियो हसे सुद्ध भक्तिसे तोहार मनवा फेनि बहकतइ कि कहके मोर डर लगइ बडइ। 4 केहकेकि यगर कुनहुँ याके हमार परचार करलि येसुजिसे दोसरे येसुक बारेमा परचार करतइ जउँ, तोहार पउलि आत्मासे दोसरे आत्मा तोहरा गरहन करबह जउँ कि, तोहार पउलि सुसमाचारसे दोसरे सुसमाचार गरहन करबह जउँ, तोहरा इअ जम्मे उसारेसे स्विकार करसह। 5 यपनहिँके “वरिस्ट प्रेरितसभ” समझलहरा ककरोसे फेनि झिनिक बडहिँ कहके मुइ हइने सोचसहि। 6 मुइ फदकेके सलारि मन्से हइने भेले ताफेनि ग्यानमा त कम हइने बडहिँ। इअ बतवा हमरा तोहराके हरखलिसे जम्मे बिसयमा स्पस्टसे देखा देले बडहुँ। 7 तोहराके जबड बनावेके तहिँया मुइ यपनहिँके झिनमिन बनाके परमेस्वरक सुसमाचार किहो हइने लेके सुनोइकि कथि मुइ पाप करलहिँ त? 8 मुइ तोहार सेवा करइकि याको मन्डलियानिसे मदत पउलहिँ। यसनुक मदत लेइकि उअ मन्डलियाके लुटल नहिँया भेलइ। 9 तोहारसाङे रहइकि जब मोर खाँचो परलइ, मुइ ककरो बोझ हइने भेलहिँ, केहकेकि माकेडोनिया छेतरसे यइलि भयवाह मोर खाँचो पुरा करदेलइ। मुइ तोहार बोझ पहिला फेनि हइने भेलहिँ हसे पाछे फेनि नाहिँ हखबहिँ। 10 ख्रिस्टक सत्य बात मोरमा रहइकलइ अखइया छेतरभरक कुनहुँ फेनि मोर इअ घमन्ड करना बातसे मोरके रोके नाहिँ सकतइ। 11 मुइ केहके यसके कहइ बडहिँ त? कथि मुइ तोहराके प्रेम हइने करसहिँ? मुइ तोहराके प्रेम करसहिँ कहके परमेस्वरक थाह बडइ। 12 मुइ जथि काम करइ बडहिँ उअ कमवा करइ रहबहिँ, ताकि हमार करलि कमवा नहिँया “हमरा करलहुँ” कहके दाबि कहलहरा यपनहिँके जबड प्रेरित सम्झलहरासभ घमन्ड करे झिन पवइ। 13 केहकेकि यसनुक मन्सेसभ झुठा प्रेरितसभ हसे छलि काम करलाहर हखइ। हुनुका हमरा ख्रिस्टक प्रेरितसभ हखहुँ कहके छल करसइ। 14 इअ कुनहुँ यचम्मक बात हइने हखइ, केहकेकि सइतनवा फेनि यपनहिँ इजोरक स्वरगदुत नहिँया भेस धारन करसिय। 15 उहेसे सइतानक सेवकसभ फेनि परमेस्वरक यागा धरमि सेवक नहिँया देखा परेके कुनहुँ यचम्मक बात हइने हखइ। याखिरमा हुनुका यापन करलि कामक सजाय पउतइ। पावलक भोगल दुःख-कस्ट 16 मुइ फेरि कहइ बडहिँ, कुनहुँ मन्से फेनि मोरके मुरुख झिन सम्झइ। बाकि तोहरा मोरके मुरुख सम्झबह जउँ फेनि मोर बतवा सुनिह, ताकि मुइ फेनि किहो घमन्ड करे सकुँ। 17 मुइ घमन्ड करके जथि बात फदकइ बडहिँ, इअ बतवा प्रभु फदके हइने लगोले हखसि, बाकि मुइ मुरुख नहिँया बात करइ बडहिँ। 18 तोहार बिचा बहुत जन मन्से यापन करलि कमवामा घमन्ड करलेसे मुइ फेनि मोर कमवामा घमन्ड करसहिँ। 19 वास्तवमा तोहरा यपनहिँ यतुरा बुद्धियार भेल बडह कि, खुसिसे मुरुखवानिक व्यबहार फेनि सहसह! 20 केहकेकि कुनहुँ तोहराके कमारा बनोले फेनि, तोहराके सोसन करले फेनि, तोहारसे फाइदा उठोले फेनि, तोहार यागा धाक लगोले फेनि, तोहार गलवामा थपरोले फेनि तोहरा जम्मे सहसह। 21 मुइ लजाके स्विकार करइ बडहिँ कि, हमरा हुनुकर करलि व्यबहार नहिँया करेके कमजोर बडहुँ। बाकि मुइ मुरुख मन्से कहइ बडहिँ कि, कुनहुँ किहो बातमा घमन्ड करतइ जउँ, मुइ फेनि उअ बतवामा घमन्ड करबहिँ। 22 कथि हुनुका हिब्रु हखइ? मुइ फेनि हखहि। कथि हुनुका इस्राएलि हखइ? मुइ फेनि हखहि। कथि हुनुका अब्राहमक सन्तान हखइ? मुइ फेनि हखहि। 23 कथि हुनुका ख्रिस्टक सेवक हखइ? मुइ सनकल मन्से फदकइकि नहिँया लागे सकतइ, बाकि मुइ हुनुकरसे याको यसल सेवक हखहि। हुनुकरसे त मुइ झन बहुत मेहनत करले बडहिँ। कइपारि त मुइ झ्यालखानामा परलहिँ, बहुत पारि कोडासे पिटाइ खेलहिँ हसे बहुत पारि कालक मुहसे बचल बडहिँ। 24 मुइ यहुदियानिक हथवासे पाँच पारि एक कम चालिस कोडा पिटाइ खेलहिँ। 25 तिन पारि त मुइ लाठिसे पिटाइ खेलहिँ। एकपल्टा मोरके मारेके तहिँया पत्थरासे ढोकहारके पिटलइ। तिन पारि त मोर चढलि पानि जहजवा ध्वस्त भेलइ। एक दिन हसे एक रात त मुइ समुनदरवामा बितोलहिँ। 26 मुइ घर-घराहे यातरा करइकि लदिसभसे, डकुवानिसे, यपने यहुदि जतियाक मन्सावानिसे, अयहुदि मन्सावानिसे खतरामा परलहिँ हसे सहरवामा, उराठ-ठउरियामा, समुनदरमा तके झुठा भयवानिसे यइना खतरामा परलहिँ। 27 मुइ बहुत रात हइने सुतके खाँ मेहनत करलहिँ। मुइ बहुत पारि भुखे हसे प्यासे रहलहिँ हसे बहुत पारि खाए-पिए हइने पउलहिँ। लुगाफाटा हइने भके जाडे मरलहिँ। 28 यतुरा मतरे हइने, जम्मे मन्डलियानिक चिन्ता-फिकरि फेनि मोरके सबदिन सतोसिय। 29 कुनहुँ विस्वासमा कमजोर हखइकि, कथि मुइ फेनि कमजोर भेल महसुस हइने करसहिँ त? कुनहुँ पापमा परइकि, कथि मुइ चिन्तित हइने हसहिँ त? 30 यगर मुइ घमन्ड करे परतइ जउँ, मुइ यापन कमजोरि देखोना बातमा घमन्ड करबहिँ। 31 प्रभु येसुक पिता परमेस्वर सबदिन स्तुतिक योग्य बडसि, हुनेक थाह बडइ कि मुइ हइने ठगसहिँ। 32 मुइ दमस्कस सहरवामा रहइकि आरितस रजवाक बडकि हकिमवा मोरके पकडेके तहिँया दमस्कस सहरवामा सिपहियवानिके वगरे लगोलिय। 33 बाकि मोरके टोकरियामा राखके परखलवाक एगुडा झेलवासे तर झारदेलइ हसे मुइ वकर हथवासे बचलहिँ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.