२ कोरिन्थि 10 - चितवनिया थारुपावल यापन सेवकाइक बचाउ करसिय 1 मुइ पावल, तोहारसाङे रहइकि नम्र हसहिँ, बाकि तोहारसे तनाउ हखइकि तोहार तहिँया सहासि हसहिँ कहके तोहार बिचा हाला चलल बडइ। याबे मुइ पावल ख्रिस्ट नहिँया नम्र भके दाया देखोते तोहराके बिन्ति करइ बडहिँ कि, 2 मुइ तोहार लघिना यवइकि हमारसाङे सांसारिक मन्से नहिँया चलसहुँ कहके सक करलहरानिसाङे जसके फदकेके मन बनोले बडहिँ, वसने तोहारसाङे सहाससे डटेके मन बनावे मोरके झिन लगोइह। 3 हमरा त मन्से हखहुँ, ताफेनि संसारिक मन्सावानि नहिँया हमरा यापन सतरुवानिसाङे लडाइ हइने करसहुँ। 4 हमार हाथ-हथियारवाह संसारक हाथ-हथियार नहिँया हइने हसइ, बाकि हमरा परमेस्वरक सक्तिसे किल्ला नहिँया बरियार चिजुसभके नास करसहुँ। 5 हमरा उअ सक्तिसे काम हइने लगना ठोरा-बोलिके हसे परमेस्वरक ग्यानक विरोधमा उठना विवाद तके घमन्डके हमरा नास करसहुँ। हमरा जम्मे खराब विचारके ख्रिस्टक आग्या पालन करेके तहिँया यापन वसमा पारसहुँ। 6 तोहरा पुरा रुपमा ख्रिस्टक आग्या मनलाहर भेलेपर, हमरा आग्या हइने मनलहरानिके दन्ड देवेके तयार बडहुँ। 7 तोहरा त बाहराक देखारि चिजुवा मतरे हेरसह। यगर तोहारमधे कुनहुँ मुइ ख्रिस्टक हखहि कहके विस्वास करसिय जउँ, हमरा फेनि ख्रिस्टक हखहुँ कहके उअ मन्सावा बुझिय। 8 हमार अधिकारक बारेमा खाँ घमन्ड करले ताफेनि मुइ लजियामा नाहिँ परबहि, केहकेकि इअ अधिकार तोहराके बिगडावेके तहिँया हइने, बाकि तोहराके सुधारेके तहिँया प्रभु हमराके देले हखसि। 9 मुइ इअ चिठियाह लिखके तोहराके डर देखावे खोजइ हइने बडहिँ। 10 केहकेकि कतेक जन कहसइ, “पावलक चिठियाह खरखरवा हसे काडा हसइ, बाकि उअ हमार लघिना हखइकि उअ कमजोर हसिय हसे वकर फदकावा किहो महत्व हइने हसइ।” 11 वसनुक मन्सेसभ इअ बात बुझे परतइ कि, हमरा तनाउ भके चिठियामा जथि लिखके पठोसहुँ, हुनुकर बिचा हखइकि फेनि उहे करसहुँ। 12 यपनहिँके जबड समझलहरा मन्सावानिसाङे हमरा यपनहिँके एके हारा-हारि कि दाजेके सहास हइने करसहुँ, बाकि यपने यपनहिँके एक-दोसरि जनसाङे नापके हेरके दजइकि हुनुका मुरुख मन्से नहिँया हसइ। 13 हमरा यापन मरयादासे बाहरा जाके घमन्ड हइने करसहुँ, बाकि परमेस्वरक तोकलि मरयादामा रहके घमन्ड करसहुँ हसे तोहार बिचा काम करेके तहिँया उहे मरयादा भितरा रहके करसहुँ। 14 हमरा यापन काम करना छेतरसे बाहरा जाके घमन्ड हइने करसहुँ, केहकेकि सबसे पहिला तोहार लघिना ख्रिस्टक बारेमा सुसमाचार यनलाहर हमरहिँ हखहुँ। 15 हमरा याको जनक करलि परिसरममा मरयादासे बाहरा जाके घमन्ड हइने करसहुँ, बाकि हमार यासा इअ बडइ कि, तोहार विस्वास बढते जाइकि तोहार बिचा हमार काम करना छेतर फेनि झन फइलते जाइ। 16 तब हमरा तोहारसे तनाउ-तनाउक छेतरसभमा फेनि सुसमाचार परचार करे सकबहुँ, केहकेकि याको जनक काम करलि ठउरियामा जाके हमरा काम करले बडहुँ कहके घमन्ड करे नाहिँ चाहबहुँ। 17 धरमसास्तरवामा यसके लिखाइल बडइ, “जुने घमन्ड करबिय, उअ प्रभुक करलि कमवामा मतरे घमन्ड करिय।” 18 केहकेकि जुने यापन बखान यपनहिँ करसिय, उअ महत्वक बिसय हइने हखइ, बाकि जाकर बखान प्रभु करससि उअ महत्वक बात हखइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.