२ कोरिन्थि 1 - चितवनिया थारु1 मुइ पावल, परमेस्वरक इछासे येसु ख्रिस्टक एक जन प्रेरित भाइ तिमोथिसाङे मिलके, कोरिन्थ सहरवामा भेलि परमेस्वरक मन्डलियाके तके अखइया छेतरमा भेलि जम्मे पवितर जनसभके इअ चिठिया लिखइ बडहुँ। 2 हमार परमेस्वर पिता हसे प्रभु येसु ख्रिस्ट तोहराके अनुग्रह तके सान्ति देइ। दुःख-कस्टमा परमेस्वरक सान्त्वना 3 हमार प्रभु येसु ख्रिस्टक परमेस्वर हसे पिता स्तुतिक योग्य बडसि। हुने दयगर पिता हसे पुरा सान्त्वना देलाहर परमेस्वर हखसि, 4 परमेस्वरसे हमरा पउलि सान्त्वनासे दुःखमा परलहरानिके फेनि सान्त्वना देवे सकुँ कहके हुने हमराके जम्मे खलिक दुःखवामा सान्त्वना देससि। 5 हमरा जतुरा बहुत ख्रिस्टक तहिँया दुःख भोगसहुँ, परमेस्वर हमराके ख्रिस्टसे उतुरे बहुत सान्त्वना देससि। 6 जब हमरा दुःख भोगसहुँ, उअ तोहार सान्त्वना हसे मुक्तिक तहिँया हखइ। यगर हमरा सान्त्वना पउसहुँ जउँ, तोहरा फेनि सान्त्वना पउबह। हमरा जुन दुःखवा भोगसहुँ उहे दुःखवा तोहरा सहसानसे सहइकि तोहरा फेनि उहे सान्त्वनाक अनुभव करसह। 7 तोहार बिसयमा हमार यासा यटल बडइ, केहकेकि हमार थाह बडइ कि, तोहरा हमार भोगलि नहिँया दुःख भोगसह, वसने हमार पउलि सान्त्वना नहिँया तोहरा फेनि सान्त्वना पउबह। 8 प्रियसभ, एसिया छेतरमा हमार भोगलि दुःखवाक बारेमा तोहरा फेनि थाह पउह कहके हमरा चाहसहुँ। केहकेकि हमरा सहे हइने सकना तरिकासे यतुरा दुःख पउलहुँ कि हमरा बचबहुँ कहके फेनि यसरा हइने रहलइ। 9 हमार यसनुक लगइ रहलइ कि, हमरा मृत्यु दन्ड पउले बडहुँ। इअ हमरा यपनेमा भरोसा राखेके तहिँया हइने, बाकि मरलिनके जिउतोलहर परमेस्वरमा भरोसा राखे सकुँ कहके इअ भेल हखइ। 10 हुने हमराके मृत्युक खतरासे बचोले बडसि हसे बचोबसि तके हुनेमा हमरा फेरि बचबहुँ कहके यासा करले बडहुँ। 11 तोहरा परथानासे हमराके मदत करे परतइ, यसने बहुत जनक परथानाक उतरक रुपमा हमरा जुन आसिस पउले बडहुँ, वकर तहिँया बहुत जन परमेस्वरके धन्यवाद देतइ। पावलक योजना बदलेलइ 12 इअ बतवामा हमरा गरव करसहुँ हसे हमार मनवा फेनि साछि देसिय कि, इअ संसारमा बिसेस करके तोहारसाङे सम्बन्धमा हमरा इमान्दार, पवितर हसे परमेस्वरक मन परना जिवन बितोलहुँ। इअ हमरा संसारिक ग्यानसे हइने बाकि परमेस्वरक अनुग्रहसे पउले बडहुँ। 13 तोहरा पढके बुझे हइने सकना किहो बात हमरा तोहराके हइने लिखइ बडहुँ, बाकि मुइ यासा करइ बडहिँ कि 14 यखनि तोहरा हमार बारेमा पुरा हइने बुझले बडह, बाकि तोहरा पुरा बुझबह कहके यासा करसहिँ। प्रभु येसु ख्रिस्ट यइलि दिनवामा तोहरा हमार बारेमा गरव करबह, जसने हमरा तोहार बारेमा गरव करसहुँ। 15 हमरा एक-दोसरि जनके बुझसहुँ कहलि बतवामा मोर पाका भरोसा भेलेसे, मुइ तोहराके सबसे पहिला भेटे यावेके इछा करले रहलहिँ। यसके तोहार दोबर फाइदा हतिय। 16 मुइ माकेडोनिया छेतरमा जाइकि तोहराके भेटके जेबहिँ हसे माकेडोनियासे फिरके यवइकि फेनि तोहार लघिना यबहिँ तके मुइ वहवाँसे यहुदिया छेतरमा जायके तहिँया तोहरा मदत करबह कहके मोर विचार रहलइ। 17 कथि मुइ स्थिर हइने भके इअ योजना बनोले बडहिँ कहके तोहार लगसइ? कथि मुइ योजना बनोइकि संसारिक मन्से नहिँया एके समयमा “हतइ” हसे “नाहिँ हतइ” कहके कहसहि त? 18 परमेस्वर विस्वासयोग्य भेल नहिँया, हमार बतवा फेनि विस्वासयोग्य बडइ हसे “हतइ” कहके कहे परना बातमा “नाहिँ हतइ” कहके हइने कहसहुँ। 19 केहकेकि सिलास, तिमोथि हसे मुइ तोहार बिचा परचार करलि परमेस्वरक पुतर येसु ख्रिस्टक एगुडे मुहसे “हतइ” हसे “नाहिँ हतइ” कहके कहे नाहिँ बनतइ, बाकि हुने जम्मे बतवामा विस्वासयोग्य बडसि। 20 केहकेकि परमेस्वरक जम्मे प्रतिग्यासभ येसु ख्रिस्टमा “हँ” हसइ। उहेसे येसु ख्रिस्टसे परमेस्वरक यादरक तहिँया हमरा “आमेन” कहसहुँ। 21 परमेस्वरहिँ हमरा हसे तोहराके ख्रिस्टमा स्थिर बनोबसि तके हमराके नियुक्त करलाहर हुनेहिँ हखसि। 22 हुने हमराके यापन कहके देखावेके तहिँया बइनाक रुपमा यापन पवितर-आत्मा हमराके देले बडसि हसे उहेसे हुनेक जम्मे प्रतिग्यासभ पउबहुँ। 23 मुइ परमेस्वरके साछि राखके कहबहिँ कि, तोहार गारह झिन हखइ कहके मुइ कोरिन्थ सहरवामा फेरि हइने यलहिँ। 24 हमरा तोहार विस्वासमा अधिकार जमावे हइने चाहइ बडहुँ, बाकि तोहार आनन्दक तहिँया हमरा तोहारसाङे मिलके काम करसहुँ, केहकेकि तोहरा यापन विस्वासमा स्थिर बडह। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.