१ तिमोथि 6 - चितवनिया थारु1 जतेक जन कमाराह यापन मलिकावानिक अदलमा बडइ, हुनुका यापन-यापन मलिकावानिके पुरा यादर देवे परतइ, ताकि कुनहुँ फेनि परमेस्वरक नाउँ हसे हमार देलि सिछाक बदनाम करे नाहिँ सकतइ। 2 जुन कमरवानिक मलिकावासभ विस्वासि बडइ, हुनुका यापन-यापन मलिकावानिके ख्रिस्टमा ददेर-भाइ हखइ कहके कम यादर झिन करइ, बरु डउलसे हुनुकर सेवा करइ, केहकेकि सेवा पउलाहर मलिकावासभ हुनुकर यापन प्रिय विस्वासि ददेर-भाइ हखइ। तुइ इहे बतवा मन्डलियामा विस्वासिसभके सिखोसि हसे पालन करेके तहिँया उत्साह देसि। झुठा सिछा हसे सदि धन 3 यगर कुनहुँ मन्से झुठा सिद्धान्तसभ सिखोबिय हसे हमार प्रभु येसु ख्रिस्टक देलि सदि सिछा तके परमेस्वरक भक्तिक सिछामा सहमति नाहिँ हखबिय, 4 उअ मन्सावा घमन्डसे फुलल हसे किहो फेनि हइने जनले रहसिय। यसनुक मन्सेक सबदसभक बारेमा ठोरा-बोलि हसे दोसरि जनसे झगडा करेके खराब बानि रहसइ। यसनुक बातसे त डाह, फुट, बदनाम हसे सक मतरे यसइ, 5 हसे यसनुक मन्सेसभक बिचा सबदिन झगडा हतइ। हुनुकर बुद्धिया बिगडल बडइ। हुनुका सत्य बातसे तनाउ भेल रहसइ हसे परमेस्वरक भक्ति धनि हखेके तहिँया पइडा हखइ कहके सोचसइ। 6 बाकि सन्तोखि भके परमेस्वरक भक्ति करले जबड धन हखइ। 7 केहकेकि हमरा इअ संसारमा नत किहो यनले बडहुँ? न यहवाँसे किहो लेले जेबहुँ? 8 यगर हमराके खाए हसे लगावेके पुगतइ, यकरेमा हमरा सन्तोखि हखे परतइ। 9 बाकि धनि हखे खोजलहरा परिछा हसे फानामा परसइ हसे यसने हुनुका बहुत खलिक मुरुख तके हानिकारक चाहनामा फससइ। उहे चाहना हुनुकाके दुःख हसे सर्वनासमा पुगोसइ। 10 केहकेकि धनक लोभ जम्मे खलिक खराबक जरि हखइ। कतेक जन यकरपाछा लागके विस्वाससे पाछा हटल बडइ हसे हुनुका यापन वपरा बहुत दुःख यनले बडइ। पावलक तिमोथिके चेतवनि 11 बाकि तुइ परमेस्वरक जन भेलेसे यकरसे तनाउ रहसि। तुइ परमेस्वरक मन परना धारमिक जिवन बितोसि हसे परमेस्वरक भक्ति, विस्वास, प्रेम, सहसान तके नम्रतामा यापन मन लगोसि। 12 विस्वासक यसल लडाइ लडसि। अनन्त जिवनके पकडले रहसि, केहकेकि इहे जिवनक तहिँया परमेस्वर तोरके बलोले हखसि हसे यकरे तहिँया तुइ बहुत जनक यागा यापन यसल साछि देले बडहि। 13 जम्मे चिजुवाके जिवन देलाहर परमेस्वर हसे पन्तियस पिलातसक यागा यसल साछि देलाहर येसु ख्रिस्टक यागा, 14 मुइ तोरके इअ आग्या देइ बडहिँ, हमार प्रभु येसु ख्रिस्ट नाहिँ यवइलइ इअ आग्याके सुद्ध रुपसे पालन करसि, ताकि कुनहुँ फेनि तोरके दोस लगावे नाहिँ सकतइ। 15 परमधन्य परमेस्वर जुने जम्मे सक्तिक मालिक, रजवानिक राजा हसे प्रभुसभक प्रभु हखसि। हुने ठिक जुनवामा येसु ख्रिस्टके परकट करबसि। 16 हुने मतरे कबहुँ नाहिँ मरबसि हसे हुने यसनुक चहकार इजोरमा बास करससि कि, उअ चहकारि इजोरवाक लजिके कुनहुँ फेनि जाए नाहिँ सकतइ। हुनेके कुनहुँ फेनि कबहुँ हइने देखले बडइ, न त देखे सकतइ। जम्मे यादर हसे जम्मे सक्ति सबदिन हुनेक हखइ। आमेन। 17 इअ संसारमा भेलि धनि मन्सावानिके घमन्डि झिन हखिह हसे अनिस्चित धन-सम्पतियामा यापन यासा झिन रखिह कहके आग्या देसि, बाकि जम्मे चिजुवा बहुताहेसे हमराके उपभोग करे देलाहर परमेस्वरमा भरोसा राखेके हुनुकाके सिखोसि। 18 दोसरे जनके भलाइ करे परतइ, यसल काममा धनि हखे परतइ, अभावमा परलहरानिके मदत करे परतइ हसे यापनसाङे भेलि चिजुवा याको जनसाङे बाँटे परतइ कहके हुनुकाके आग्या देसि। 19 इअ करके हुनुका यापन तहिँया एगुडा पाका जगक सदि धन भविस्यक तहिँया जामा करसइ, ताकि हुनुका सदि जिवनके पकडले रहे सकतइ। 20 तिमोथि, जथि परमेस्वर तोरके सपले बडसि उअ डउलसे देखभाल करसि। तुइ परमेस्वरक निना हखना मुरुख बातसे हसे परमेस्वरक विरोध करल जुन झुठा बातके कतेक मन्सेसभ “ग्यान” कहके मनसइ उअ बातसे तनाउ रहसि। 21 केहकेकि यसने बातक पाछा लागके कतेक जन विस्वाससे पाछा हटल बडइ। तोहार जम्मे जनसाङे परमेस्वरक अनुग्रह रहइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.