१ तिमोथि 5 - चितवनिया थारु

विधुवा, एल्‍डर हसे कमारासभके निरदेसन

¹ तुइ बुढ मन्‍सेके झिन घोघटसि, बरु यापन बाबाक नहिँया यादरसे बिन्‍ति करसि हसे यापनसे झिनिकके भाइ जोगके व्‍यबहार करसि।

² वसने करके बुढि जनियानिके यापन दाओ हसे यापनसे छोटे उमेरक जनियानिके बहिन जोगके सुद्ध मनसे व्‍यबहार करसि।

³ जुन विधुवासभक कुनहुँ फेनि हइने बडइ, हुनुकर देखभाल करिह।

⁴ बाकि जुन विधुवासभक बेटा-बेटिह कि नाति-नातिनिसभ बडइ, हुनुका सबसे पहिला यापन परिवारमा जिम्‍मेवारि पुरा करेके सिखे परतइ, ताकि हुनुका यापन दाओ-बाबाक उपकार करलिक रिन तिरे सकइ। केहकेकि परमेस्‍वरक यागा इअ गरहनयोग्‍य बडइ।

⁵ जुन विधुवाक कुनहुँ फेनि हइने बडइ हसे यसकरे बडिय, उअ परमेस्‍वरमा यासा रखसिय। उअ दिन-रात परथाना करसिय हसे परमेस्‍वरसे मदत खोजसिय।

⁶ बाकि जुन विधुवा सुख-विलासक तहिँया यापन जिन्‍गि बितोसिय, उअ जिउते भेले फेनि मरल नहिँया हखिय।

⁷ तुइ विस्‍वासिसभके इअ निरदेसन देसि, ताकि हुनुकाके कुनहुँ फेनि दोस लगावे झिन सकइ।

⁸ यगर कुनहुँ यापन हितनात हसे खास करके यापन परिवारक देखभाल नाहिँ करतइ, हुनुका सदि विस्‍वाससे पाछा हटल बडइ हसे अविस्‍वासिसभसे फेनि खराब बडइ।

⁹ जुन विधुवा एक जन मरदाना मन्‍सेसे मतरे बियाह करले बडिय हसे साठि बरससे बढि उमेर पुगल बडइ, वकर नाउँ मतरे विधुवाक-सुचिमा लिखसि।

¹⁰ वसने करके, उअ यसल काम करलेसे जम्‍मे जनसे यादर पावल हखे परतइ। उअ बचवानिके पालन-पोसन करल हसे पहुनावानिक सेवा-सत्‍कार करल हखे परतइ। उअ परमेस्‍वरक पवितर जनसभक टङवा धोउले हसे दुःखमा परलहरानिक मदत करल हखे परतइ। यसने याको यसल कामसभ करल हखे परतइ।

¹¹ बाकि कम उमेरक विधुवानिक नाउँ विधुवा-सुचिमा झिन लिखसि, केहकेकि जब हुनुकर बियाहक चाहना बढतइ, तब हुनुकर ख्रिस्‍टक तहिँया रहल भक्‍ति कमजोर हतइ हसे हुनुका फेरि बियाह करे सकतइ।

¹² यसनेकरके हुनुका ख्रिस्‍टसाङे करल यापन पहिलाक वाचा बिसरोलेसे दोसि ठहरतइ।

¹³ वसने, हुनुकर घर-घर बुलाह बानि परके यल्‍छि हतइ। हुनुका यल्‍छि मतरे नाहिँ भके, चुगलेहर हतइ हसे दोसरि जनक काममा बेकारमा हाथ घालके काम हइने लगना बात मतरे फदकतइ।

¹⁴ उहेसे मुइ कम उमेरक विधुवानिके फेरि बियाह करके बेटा-बेटिह जरमोइ हसे घर-गृहस्‍थि चलोइ कहके सल्‍लाह देबहि। तब मतरे हमार विरोधियाह हमार बदनाम करेके मउका नाहिँ पउतइ।

¹⁵ केहकेकि कतेक जन कम उमेरक विधुवासभ पहिलासे बहकके सइतनवाक पाछा लागि सकल बडइ।

¹⁶ यगर कुनहुँ ख्रिस्‍टमा विस्‍वास करलाहर जनियानिक घरवामा विधुवासभ बडइ, उअ हुनुकर मदत करिय। वसने करले मन्‍डलियामा भार नाहिँ परतइ हसे यसने जुने सदि विधुवासभ बडइ हुनुकर मदत मन्‍डलिया करे सकतइ।

¹⁷ यसल तरिकासे मन्‍डलियामा यगुवाइ करलाहर एल्‍डरवानिके दोबर यादर देवे परतइ हसे बिसेस करके जुन एल्‍डरवाह वचन परचार हसे सिखावेके काम मेहनतसे करसइ।

¹⁸ केहकेकि धरमसास्‍तरवामा यसके लिखाइल बडइ, “दउरि दवइखुनि गोरुवाक मुहवामा तोबडा झिन लगोइह” हसे “काम करलहरा यापन बनिहारि पावे परतइ।”

¹⁹ यगर कुनहुँ मन्‍से, एल्‍डरवाक वपरा किहो दोस लगोतइ जउँ, दु तिन जन साछि नाहिँ हखइलइ वकर विरोधमा लगोलि दोसवा सुनबे झिन करिह।

²⁰ घर-घराहे पाप करलहरानिके जम्‍मे जनक यागा घोघटसि, ताकि दोसरि जन फेनि डेरेतइ।

²¹ मुइ तोरके परमेस्‍वर, येसु ख्रिस्‍ट हसे चुनलि स्‍वरगदुतवानिक यागा काडा आग्‍या देके इअ कहइ बडहिँ कि, तुइ एकोरियाहे व्‍यबहार नाहिँ करके इअ जम्‍मे निरदेसन पालन करसि हसे कुनहुँ मन्‍सेके फेनि पछपात झिन करसि।

²² तुइ मन्‍डलियामा यगुवा नियुक्‍ति करेके तहिँया ककरो वपरा हदफदाके हथवा झिन रखसि हसे दोसरि जनक पापमा सहभागि झिन हखसि। तुइ यपनहिँके सुद्ध रखसि।

²³ तुइ पानि मतरे झिन पियसि, बाकि तोर पेटवाक समस्‍या भके तुइ घर-घराहे मनियलेसे इचिका-इचिका अंङगुरक रस फेनि पियसि।

²⁴ कुनहुँ-कुनहुँ मन्‍सावानिक पापसभ डउलसे देखार हसइ हसे हुनुका न्‍यायसे यागा दोसि ठहरतइ, बाकि कतेक जन मन्‍सेक पापसभ पाछा मतरे देखार हसइ।

²⁵ यसनेकरके, कतेक यसल कामसभ पहिलासे डउलसे देखार हसइ हसे जुन यसल काम देखार नाहिँ हतइ, उअ कबहुँ फेनि लोकाइल रहे नाहिँ सकतइ।