१ तिमोथि 4 - चितवनिया थारु

झुठा सिछा

¹ पवितर-आत्‍मा हमराके स्‍पस्‍ट रुपसे यसके कहले बडसि कि, अन्‍तिम दिनमा कतेक जन मन्‍से छलि आत्‍माक बात सुनतइ हसे भुतवाक देलि सिछामा मन लगाके विस्‍वाससे पाछा हटतइ।

² यसनुक सिछा झुठा फदकलहर कपटि मन्‍सेसभसे यसइ। हुनुकर सुद्ध विवेक धिकावल लोहसे डामके मरल हसइ।

³ हुनुका बियाह झिन करिह कहके मन्‍सावानिके कहसइ हसे कतेक खइना चिजुवा फेनि खाए नाहिँ मिलतइ कहके मन्‍सावानिके सिखोसइ। बाकि विस्‍वास करलाहर हसे सत्‍य बात जनलहरासभ धन्‍यवाद देके परमेस्‍वरक बनोलि चिजुवा खाए सकतइ।

⁴ परमेस्‍वरक बनोलि जम्‍मे चिजुवा यसल बडइ हसे किहो चिजुवाके फेनि निसेध करे नाहिँ बनतइ, बरु धन्‍यवाद देके उअ खाए मिलसइ।

⁵ केहकेकि उअ परमेस्‍वरक वचन हसे परथानासे सुद्ध भेल बडइ।

⁶ यगर तुइ दोसरि विस्‍वासि भयवानिके इअ बतवा सिखोबहि जउँ, तुइ विस्‍वासक वचनमा हुरकल हसे यसल सिछा पालन करके याइल येसु ख्रिस्‍टक एक जन यसल सेवक हखबहि।

⁷ तुइ परमेस्‍वरक बदनाम करना बातसभ हसे पहिलासे चलल याइल बुढवानिक झुठा कहानिसे तनाउ रहके, बरु परमेस्‍वरक मन परना जिन्‍गि जिएके अभ्‍यास करसि।

⁸ देहियाक कसरत त किहो मतरे फाइदा देसइ, बाकि परमेस्‍वरक भक्‍ति झन यसल हखइ, केहकेकि इअ यखनिक जिवनसाङे यावेवाला जिवनमा फेनि फाइदाक यसरा देसइ।

⁹ इअ बात सदियो हखइ हसे यकरेके हमरा जम्‍मे जन स्‍विकार करे परतइ।

¹⁰ उहेसे हमरा खाँ मेहनत करसहुँ हसे लगातार परयास करइ बडहुँ। केहकेकि हमार यासा जिउते परमेस्‍वरमा बडइ। हुने जम्‍मे मन्‍सावानिक हसे खास करके हुनेमा विस्‍वास करलहरानिक मुक्‍तिदाता हखसि।

¹¹ तुइ इअ बतवा विस्‍वासिसभके सिखोसि हसे पालन करेके आग्‍या देसि।

¹² तुइ ढोठनिया भेलेसे कुनहुँ फेनि तोरके तुच्‍छ झिन सोचइ। बाकि तोर बोलि-वचनमा, व्‍यबहारमा, प्रेममा, विस्‍वासमा हसे पवितरतामा विस्‍वासिसभक तहिँया तुइ एगुडा नमुना बनहि।

¹³ मुइ नाहिँ यवइलइ, तुइ मन्‍सावानिके धरमसास्‍तरवा पढके सुनोसि, हुनुकाके उत्‍साह देसि हसे परचारक काममा लागल रहसि।

¹⁴ जुन वरदान तुइ अगमवाडिसे एल्‍डरवाह तोर वपरा हथवा रखइकि पउले रहलह, वकरेके हेला झिन करसि।

¹⁵ तुइ इअ बिसयमा यापन पुरा ध्‍यान लगोसि हसे जम्‍मे सक्‍तिसे इअ पालन करसि, ताकि तोर करल प्रगति जम्‍मे जन देखे सकइ।

¹⁶ तुइ यापन जिवन हसे यापन देलि सिछाक बारेमा चेतले रहसि। इअ करके, तुइ यापन हसे तोर बतवा सुनलहरानिक जिवन बचोबहि।