१ तिमोथि 3 - चितवनिया थारुमन्डलियाक यगुवासभ 1 इअ बात सदियो हखइ कि, “यगर कुनहुँ मन्से मन्डलिक यगुवा हखे खोजतइ जउँ, वकर विचार यसल हखइ।” 2 उहेसे मन्डलिक एगुडा यगुवा निरदोस, एगुडा मतरे जनि भेल, यपनहिँके वसमा धरलाहर, समझदार, यसल चालचलन भेल, पहुनाक सेवा-सत्कार करलाहर हसे मन्सावानिके डउलसे सिछा देवे सकलाहर हखे परतइ। 3 उअ मोदहरिया कि खिसियाह हइने भके, बरु सान्त स्वभावक मन्से हखे परतइ। उअ झगडेहर कि धनक लोभ हइने करलाहर मन्से हखे परतइ। 4 उअ यापन घरवा डउलसे चलावे सकलाहर हसे वकर बेटवा-बेटियाह वकरेके यादर करलाहर हखे परतइ। 5 केहकेकि यापन घर-परिवारके डउलसे हइने चलावे सकलाहर मन्से परमेस्वरक मन्डलि कस्के देखभाल करे सकबिय? 6 उअ भरखे विस्वास करल लउठा विस्वासि नाहिँ हखे परतइ। नत उअ घमन्डि भके सइतनवाक नहिँया दन्ड पउबिय। 7 उअ मन्सावा मन्डलियाक बाहराक मन्सावानिसे फेनि यादर पावल हखे परतइ। तब मतरे वकर निना नाहिँ हतइ हसे सइतनवाक जालमा फेनि नाहिँ परतिय। 8 वसने करके, मन्डलियामा सेवा करलाहर डिकन फेनि इमान्दार हसे यादर पावेके लाइक हखे परतइ। हुनुका मोदहरिया कि धनक लोभ करलाहर नाहिँ हखे परतइ। 9 बाकि हुनुका विस्वासक गहिर सत्य बातके सुद्ध विवेकमा धरे परतइ। 10 पहिला हुनुकर जाँच हखे परतइ। यगर ठिक ठहरतइ जउँ, हुनुका डिकन भके सेवा करे सकतइ। 11 वसनेकरते डिकनसभक जनियावाह फेनि यादर पावेके लाइक हखे परतइ। हुनुका दोसरे जनक निना करलाहर हइने, बरु यपनहिँके वसमा धरलाहर हसे जम्मे बतवामा विस्वासिलो हखे परतइ। 12 मन्डलियामा सेवा करलाहर डिकनवा एगुडा मतरे जनि भेल, यापन बेटवा-बेटियानिके हसे घर-परिवारवाके डउलसे चलावे सकलाहर हखे परतइ। 13 केहकेकि जुने डिकन भके डउलसे सेवा करतइ जउँ, हुनुका यादर पउतइ हसे येसु ख्रिस्टमा भेलि यापन विस्वासक बारेमा दोसरि जनके कहेके सहास पउतइ। 14 मुइ तोर लघिना हल-हालि यबहिँ कहके यासा करले बडहिँ, ताफेनि मुइ इअ निरदेसन तोर तहिँया लिखइ बडहिँ। 15 यगर मुइ यावेके ढिला करबहिँ जउँ, परमेस्वरक परिवारमा एक-दोसरि जनसाङे हमार चालचलन कस्नुक हखे परसइ कहके इअ चिठियामाहे तुइ थाह पउबहि। इअ परिवार जिवित परमेस्वरक मन्डलि जुन सत्यक खामा हसे जग हखइ। 16 परमेस्वरमा भेल हमार भक्तिक रहस्य महान बडइ हसे कुनहुँ फेनि यकरेके इन्कार करे नाहिँ सकतइ। ख्रिस्ट मन्से भके परकट हखलसि हसे पवितर-आत्मासे निरदोस ठहरलसि। स्वरगदुतवाह हुनेके देखलइ हसे जाति-जातिक बिचा हुनेक बारेमा परचार भेलइ। संसारक जम्मे मन्सावाह हुनेमा विस्वास करलइ, हसे महिमामा स्वरगमा लिगेलसि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.