१ तिमोथि 2 - चितवनिया थारुआराधनाक बारेमा सिछा 1 याबे सबसे पहिला मुइ तोहराके जम्मे मन्सावानिक तहिँया बिन्ति, परथाना, अन्तरबिन्ति हसे धन्यवाद परमेस्वरमा चढोइह कहके बिन्ति करइ बडहिँ। 2 बिसेस करके राजा हसे जम्मे बडकि सरकारि हकिमवानिक तहिँया परथाना करिह, ताकि हमरा सुख-सान्तिसे परमेस्वरक भक्ति हसे यादरनिय जिन्गि बितावे सकुँ। 3 इअ हमार मुक्तिदाता परमेस्वरक लजरियामा यसल हसे गरहनयोग्य हसइ। 4 जम्मे मन्सावाह मुक्ति पवइ हसे हुनुका सत्य बात बुझइ कहके हुनेक इछा बडइ। 5 केहकेकि परमेस्वर एगुडा मतरे बडसि। परमेस्वर हसे मन्सावानिक बिचा मिलाप करलाहर एक जन मतरे बडसि। उअ मन्से येसु ख्रिस्ट हखसि, 6 जुने जम्मे मन्सावानिक छुटकाराक तहिँया यपनहिँके मोलक रुपमा तिरलसि। इअ बतवाक साछि परमेस्वर ठिक जुनवामा देलसि। 7 इअ कारनसे परमेस्वर मोरके अयहुदि मन्सावानिके विस्वास हसे सत्यक समाद सिखावेके तहिँया एगुडा परचारक हसे प्रेरित बनोले बडसि। मुइ सदियो बात फदकसहिँ, झुठा हइने। 8 जम्मे ठउरियामा, अराधनाक समयमा मरदनवा मन्सावाह नाहिँ खिसियाके हसे विवाद नाहिँ करके यापन पवितर हथवा उठोते परथाना करइ कहके मोर इछा बडइ। 9 वसने करके जनिनियाह फेनि सोभइना हसे यादर योग्य लुगासे कछाइ कहके मोर इछा बडइ। हुनुका यापन केसवा यनोनि खलिकसे बिरनि बोटके, सोन, मोतिक गहना-गुरिया हसे बहुत मोल परना लुगासे झिन कछाइ। 10 बरु परमेस्वरक सेवा करलाहर जनियानिसभ यसल कामसे यपनहिँके कछोइह। 11 जनिनियाह सान्तसे यगुवानिक अदलमा रहेके सिखे परतइ। 12 मुइ जनियानिके सिखावेके हसे मरदनवानिक वपरा अधिकार करेके अनुमति नाहिँ देबहिँ। हुनुका सान्त रहे परतइ। 13 केहकेकि परमेस्वर पहिला आदमके हसे वकरपाछा हव्वाके सिरिस्टि करलसि हसे, 14 आदम सइतानक छलमा हइने परलिय, बरु हव्वा छलमा परके पाप करलिय। 15 ताफेनि जनिनियाह विस्वास, प्रेम हसे पवितरतामा रहतइ जउँ, हुनुका छोकनि जरमोइकि उद्धार पउतइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.