१ तिमोथि 1 - चितवनिया थारु1 मुइ पावल, येसु ख्रिस्टक एक जन प्रेरित हमराके मुक्ति देलाहर परमेस्वर हसे यसरा देलाहर येसु ख्रिस्टक आग्या यनुसार, 2 विस्वासमा मोर सदि बेटा तिमोथिके इअ चिठिया लिखइ बडहिँ। हमार पिता परमेस्वर हसे प्रभु येसु ख्रिस्टसे तोरके अनुग्रह, दाया हसे सान्ति मिलइ। झुठा सिछासे हुसियार 3 मुइ माकेडोनियामा जाइखुनि तोरके एफिसस सहरवामा रहसि कहके बिन्ति करले रहलहिँ। याबे फेरि मुइ कहइ बडइ कि, तुइ वहवाँहिँ रहहि हसे झुठा सिछा सिखोलहरानिके काडा आग्या देसि। 4 हुनुकाके पहिलाक मन्सावानिक बनावल काथा हसे कबहुँ हइने वरइना वंसावलिमा झिन यलमलइह कहके आग्या देसि। केहकेकि यसनुक बातसे ठोरा-बोलि मतरे हसइ हसे परमेस्वरमा विस्वासक जिन्गि बितोलहरानिके किहो मदत फेनि हइने करसइ। 5 बरु इअ आग्याक उदेस्य जम्मे विस्वासिवाह एक-दोसरि जनके माया करइ कहके हखइ, जुन माया सुद्ध हृदय, यसल विवेक हसे सदि विस्वाससे मतरे यसइ। 6 बाकि कतेक जन इअ बतवा बिसराके फोकटिया बातमा यलमलाइल बडइ। 7 हुनुका व्यवस्था सिखोलहर गुरु हखे खोजसइ, बाकि यपनहिँ कथि फदकइ बडइ हसे कथिक बारेमा जोड देके सिखोइ बडइ कहके फेनि हइने बुझसइ। 8 बाकि ठिकसे चलोले जउँ, व्यवस्था यसल हखइ कहके हमार थाह बडइ। 9 यकर यरथ इअ हखइ कि, व्यवस्था धरमि मन्सेक तहिँया हइने, बरु कानुन हइने मनलहरा हसे विद्रोहि, परमेस्वरके यादर हइने करलहराह हसे पपियानि, यापन दाओ-बाबाके हत्या करलहरानि हसे मन्से मारलहरानि, 10 धुचुड करलहरानि, समलिङ्गियानि, अपहरन करलहरानि, झुठा फदकेलहरानि, झुठा साछि देलहरानि हसे सदि सिछाक विरोध करलहरानिक तहिँया बनल हखइ। 11 इअ सदि सिछासभ परमधन्य परमेस्वरक महिमित सुसमाचार यनुसार बडइ हसे उअ सुसमाचार परचार करेके जिम्मा मोरके सपाइल बडइ। पावल वपरा परमेस्वरक अनुग्रह 12 मोर कमवामा मोरके बोल्ह देलाहर हमार प्रभु येसु ख्रिस्टके मुइ धन्यवाद देबहि, केहकेकि हुने मोरके विस्वास करके यापन सेवाक काममा लगोले बडसि। 13 एक समयमा त मुइ परमेस्वरक निना करलाहर हसे हुनेमा विस्वास करलहरानिके सतोलहर तके यत्याचार करलाहर मन्से रहलहिँ। बाकि परमेस्वर मोरके दाया करलसि, केहकेकि तखनहिँ मुइ विस्वास हइने करलेसे इअ जम्मे कमवा हइने जानके करले रहलहिँ। 14 हमार प्रभुक अनुग्रह मोर वपरा बहुत बडइ हसे हुने यापन विस्वास तके माया मोरके देलसि। 15 येसु ख्रिस्ट पापि मन्सावानिके बचावेके तहिँया इअ संसारमा यइलि बतवा सदि हखइ हसे यकरेके जम्मे जन स्विकार करे परतइ। उअ पपियानिमधे सबसे जबड पापि मोहिँ हखहि। 16 इहे कारनसे मुइ दाया पउले बडहिँ, ताकि येसु ख्रिस्ट मोरके एगुडा नमुना बनावेके तहिँया मोर नहिँया जबड पापिमा यापन पुरा सहसान देखोले बडसि। यसने याको जन फेनि विस्वास करके परमेस्वरसाङे सबदिन रहना जिवन पउतइ। 17 याबे हमार सबदिनक राजा, अमर हसे हइने देखार एक मतरे परमेस्वरक इज्जत यादर तके महिमा सबदिन हखइ! आमेन। 18 मोर बेटवा तिमोथि, तोर बारेमा पहिलेसे कहलि अगमवाडि यनुसार मुइ इअ निरदेसन देइ बडहिँ, ताकि तुइ इअ पालन करके यसल लडाइ लडे सकहि, 19 हसे यापन विस्वासमा यटल भके सुद्ध विवेक राखे सकहि। कतेक जन विवेक यनुसार हइने चललेसे हुनुका यापन विस्वास अस्विकार करले बडइ। 20 हुनुकरमधे हुमेनियस हसे अलेक्जेन्डर हखइ। हुनुका परमेस्वरक निना झिन करइ कहके मुइ हुनुकाके सइतनवाक हथवामा सपदेले बडहिँ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.