१ थेसलोनिकि 5 - चितवनिया थारु

प्रभुक तहिँया तयार रहिह

¹ हेरह प्रियसभ, प्रभु कहिया हसे कुन समयमा यबसि कहलि बारेमा तोहराके लिखे नाहिँ परतइ,

² केहकेकि तोहरा डउलसे जनले बडह कि, जसने चोरवा राति यसइ, प्रभुक दिन फेनि वसने यतइ।

³ जब मन्‍सावाह “सान्‍ति हसे सुरछा” कहके कहइ रहतइ, तखनहिँ भारदेहि जनिके बेथा लागल नहिँया यरमरका हुनुकर वपरा यापत यतइ हसे हुनुका बचे नाहिँ सकतइ।

⁴ बाकि हेरह प्रियसभ, तोहरा यन्‍हारमा हइने बडह, उहेसे प्रभुक यइना दिन तोहराके चोर नहिँया छक नाहिँ पारतइ।

⁵ केहकेकि तोहरा जम्‍मे जन इजोर हसे दिनक सन्‍तान हखह। हमरा रात हसे यन्‍हारक सन्‍तान हइने हखहुँ।

⁶ उहेसे दोसरि जन नहिँया हमरा नाहिँ सुतु, बाकि जगले हसे चेतले रहुँ।

⁷ केहकेकि सुतलहरासभ राति सुतसइ हसे मोदहरियावाह राति मतसइ।

⁸ बाकि हमरा दिनक सन्‍तान भेलेसे, चेतले रहुँ। विस्‍वास हसे प्रेमक छातिपाता तके मुक्‍तिक यासाक सुरछाक टोप लगाउ।

⁹ केहकेकि परमेस्‍वर हमराके यापन खिसक तहिँया हइने, बाकि प्रभु येसु ख्रिस्‍टसे मुक्‍ति पावेके तहिँया नियुक्‍त करले बडसि।

¹⁰ येसुजि हमार तहिँया मरलसि, उहेसे हमरा जिउते रहुँ कि मरु हुने यवइकि, हमरा जम्‍मे जन हुनेसाङे जिउते हखबहुँ।

¹¹ उहेसे, तोहरा जसने करइबडह, वसने एक-दोसरि जनके उत्‍साह दिह हसे प्रभुमा हुनुकर विस्‍वासके बरियार बनोह।

पावलक अन्‍तिम निरदेसन हसे विदाइ

¹² हेरह प्रियसभ, हमरा तोहराके बिन्‍ति करके कहइ बडहुँ, जतेक जन तोहार बिचा मेहनतसे काम करइ बडइ हसे प्रभुमा तोहार वपरा यगुवा भके तोहराके सल्‍लाह देसइ, हुनुकाके यादर करिह।

¹³ हुनुकर करलि कमवाक तहिँया हुनुकाके प्रेमसे खाँ सम्‍मान करिह। एक दोसरिसाङे मेलमिलापमा रहिह।

¹⁴ हेरह प्रियसभ, तोहरा यल्‍छि मन्‍सावानिके चेतवनि दिह, डेरपोक मन्‍सेके सहास दिह, कमजोर मन्‍सावानिके मदत करिह हसे जम्‍मे जनसाङे सहके रहिह कहके हमरा बिन्‍ति करइ बडहुँ।

¹⁵ तोहरा ककरहुँके फेनि खराबक बदला खराब झिन करिह, बाकि एक-दोसरि जनके हसे सकभर जम्‍मे मन्‍सावानिके सबदिन भलाइ करिह।

¹⁶ सबदिन आनन्‍दित रहिह।

¹⁷ परथाना करते रहिह।

¹⁸ जम्‍मे अवस्‍थामा धन्‍यवाद दिह, केहकेकि येसु ख्रिस्‍टमा तोहार तहिँया परमेस्‍वरक इछा इहे हखइ।

¹⁹ पवितर-आत्‍माक कामके झिन रोकिह।

²⁰ परमेस्‍वरक अगमवाडि तुच्‍छ झिन ठानिह।

²¹ बाकि जम्‍मे बतवा जचिह हसे जुन बतवा यसल बडइ वकरमा डटके रहिह।

²² जम्‍मे खलिक दुस्‍टतासे यलग रहिह।

²³ हमराके सान्‍ति देलाहर परमेस्‍वर यपनहिँ तोहराके पुरा रुपसे पवितर बनोबसि हसे हमार प्रभु येसु ख्रिस्‍ट नाहिँ यवइलइ तोहार आत्‍मा, प्रान हसे देहिया निरदोस रहइ।

²⁴ जुन परमेस्‍वर तोहराके बलोले बडसि, हुने इअ करबसि, केहकेकि हुने विस्‍वासयोग्‍य बडसि।

²⁵ प्रियसभ, हमार तहिँया परथाना करिह।

²⁶ जम्‍मे विस्‍वासिसभके पवितर चुमासे अभिवादन करिह।

²⁷ इअ चिठिया पढके जम्‍मे विस्‍वासिसभके सुनादिह कहके मुइ तोहराके प्रभुक नाउँमा आग्‍या देइ बडहिँ।

²⁸ हमार प्रभु येसु ख्रिस्‍टक अनुग्रह तोहारसाङे रहइ।