१ थेसलोनिकि 4 - चितवनिया थारु

परमेस्‍वरक मन परना जिवन

¹ आखिरमा, प्रियसभ, जसने तोहरा परमेस्‍वरक मन परना जिवन कस्‍के जिएके कहके हमारसे सिखले बडह हसे तोहरा वसने जियइ फेनि बडह, याबे तोहार जिवन झन-झन यसल हखते जाइ कहके प्रभु येसुजिमा हमरा तोहराके कहइ बडहुँ।

² केहकेकि कुन-कुन निरदेसनसभ हमरा प्रभु येसुजिक अधिकारसे तोहराके देले बडहुँ कहके तोहार थाह बडइ।

³ तोहरा पवितर हखह कहके परमेस्‍वरक इछा बडइ, उहेसे तोहरा धुचुडसे यलग रहिह।

^4-5 तोहरा परमेस्‍वरके हइने चिनल अविस्‍वासि मन्‍से नहिँया काम वासनाक खराब विचार नाहिँ राखके, हरेक जन यापन-यापन देहियाके पवितर हसे यादरसे यापन वसमा राखे परतइ कहके सिखे परतइ।

⁶ इअ बिसयमा कुनहुँ फेनि ठगके यापन विस्‍वासि भयवानिक जनियावानिसाङे धुचुड झिन करिय। केहकेकि परमेस्‍वर यसने पाप करलहरा मन्‍सेसभके दन्‍ड देबसि। यकर बारेमा हमरा तोहराके यगाहेसे चेतवनि देले रहलहुँ।

⁷ केहकेकि परमेस्‍वर हमराके असुद्ध हखेके हइने, बाकि पवितर जिवन बितावेके तहिँया बलोले हखसि।

⁸ उहेसे जुने इअ सिछा इन्‍कार करबिय, उअ मन्‍सेके हइने, बाकि जुन परमेस्‍वर तोहराके यापन पवितर-आत्‍मा देससि हुनेके इन्‍कार करसइ।

⁹ बाकि एक-दोसरि जनके प्रेम करेके बारेमा तोहराके लिखे नाहिँ परतइ, केहकेकि एक-दोसरि जनके प्रेम करेके परमेस्‍वर यपनहिँ तोहराके सिखोले बडसि।

¹⁰ वास्‍तवमा, तोहरा त माकेडोनिया छेतरक जम्‍मे विस्‍वासिसभके प्रेम करइबडह, बाकि प्रियसभ तोहरा झन-झन प्रेम करते जाह कहके हमरा बिन्‍ति करइ बडहुँ।

¹¹ हमरा तोहराके कहलि नहिँया तोहरा सान्‍त जिन्‍गि बितोइह, तोहरा यापन-यापन कमवामा मतरे ध्‍यान दिह हसे यपने हथवासे मेहनत करेके यापन जिवनक लछय रखिह।

¹² ताकि, दोसरि मन्‍सावानिसे तोहरा यादर पउह हसे तोहरा ककरो वपरा फेनि भर परे नाहिँ परतइ।

¹³ हेरह प्रियसभ, मरसकलि विस्‍वासिसभक कथि हतइ कहके तोहरा थाह हखइ कहके हमरा चाहसहुँ, ताकि यासा हइने भेल मन्‍सेसभक नहिँया तोहरा सोकमा झिन परह।

¹⁴ केहकेकि येसुजि मरलसि हसे फेरि जिइ उठलसि कहके हमरा विस्‍वास करसहुँ, उहेसे परमेस्‍वर येसुजिमा विस्‍वास करके मरलहरानिके येसुजिसाङे फेरि लेके यबसि कहके फेनि हमरा विस्‍वास करइ बडहुँ।

¹⁵ प्रभुक वचन यनुसार, हमरा तोहराके कहइ बडहुँ कि, हमरा जतेक जन प्रभुक यइना दिनवालइ जिउते रहबहुँ, कसहुँकरके फेनि हमरा प्रभुमा विस्‍वास करके मरलहरानिसे यागा हुनेके भेटे नाहिँ जाए सकबहुँ।

¹⁶ केहकेकि प्रभु यपनहिँ जबड हुकुमक यवाज, मुख्‍य स्‍वरगदुतक स्‍वर हसे परमेस्‍वरक धुतुहाक यवाजसाङे स्‍वरगसे यबसि। तखनहिँ ख्रिस्‍टमा विस्‍वास करके मरलहराह सबसे यागा जिउते भके उठतइ।

¹⁷ तब हमरा जतेक जन जिउते बडहुँ, हमरा प्रभुके यकसावामा भेटेके तहिँया हुनुकरसाङे बदरियामा उठाके लिगेबहुँ हसे हमरा सबदिन प्रभुसाङे रहबहुँ।

¹⁸ उहेसे एक-दोसरि जनके इअ बतवासे हउसला दिह।