१ थेसलोनिकि 3 - चितवनिया थारु

¹ याखिरमा जब हमरा तोहारसे तनाउ रहे हइने सकलहुँ, तब एथेन्‍स सहरवामा हमरा मतरे रहेके ठिक हतइ कहके विचार करलहुँ,

² हसे तोहराके विस्‍वासमा बरियार बनावेके तके विस्‍वासमा तोहराके सहास देवेके तहिँया तिमोथिके तोहार लघिना पठोलहुँ। तिमोथि हमार भाइ हसे हमारसाङे ख्रिस्‍टक सुसमाचार परचार करलाहर परमेस्‍वरक सेवक हखिय।

³ तोहरा कुनहुँ फेनि इअ सतावटक कारनसे हरेस झिन खाह कहके हमार इछा बडइ। हमरा दुःख भोगेके तहिँया चुनाइल बडहुँ कहके तोहार थाह बडइ।

⁴ केहकेकि हमरा दुःख भोगे परतइ कहके तोहारसाङे रहइकि हमरा यगाहेसे तोहराके कहले रहलहुँ। इअ हमार कहलि नहिँया भेलइ हसे इअ तोहार थाह बडइ।

⁵ उहेसे मुइ याको सहे हइने सकके, तोहरा विस्‍वासमा बरियार बडह कि हइने कहके बुझेके तहिँया तिमोथिके तोहार लघिना पठोलहिँ। केहकेकि कथि सइतनवा तोहराके परिछा करके हमार करलि मेहनत बेकारमा गेलइ कि कहके मुइ डेरेलहिँ।

तिमोथिक यानल उत्‍साहक समाद

⁶ बाकि तिमोथि भरखे तोहार लघिनासे याइल बडिय हसे तोहार विस्‍वास तके प्रेमक बारेमा डउल समाद यनले बडिय। तोहरा हमराके सबदिन खुसिसे सम्‍झसह हसे हमरा तोहराके भेटेके इछा करले नहिँया तोहरा फेनि हमराके भेटेके इछा करले बडह कहके उअ हमराके सुनोलिय।

⁷ उहेसे हेरह प्रियसभ, तोहार विस्‍वासक कारनसे हमरा यापन जम्‍मे दुःख हसे सतावटमा फेनि सहास पउले बडहुँ।

⁸ केहकेकि तोहरा प्रभुमा डटके बडह कहके सुनके हमरा फेरि लउठा जिवन पउले नहिँया लगलइ।

⁹ तोहार तहिँया हमरा परमेस्‍वरके जतुरा धन्‍यवाद चढोले फेनि नाहिँ पुगतइ! तोहार कारनसे हमरा परमेस्‍वरक यागा खाँ आनन्‍दक महसुस करसहुँ।

¹⁰ तोहारसाङे फेरि यामने-सामने भेटके विस्‍वासमा तोहराके झन बरियार बनावे सकहुँ कहके हमरा दिन-रात इमान्‍दारसे परथाना करसहुँ।

¹¹ याबे हमार परमेस्‍वर पिता यपनहिँ हसे प्रभु येसुजि तोहार लघिना यावेके हमार तहिँया पइडा बनादेसि।

¹² जसने हमरा तोहराके प्रेम करसहुँ, वसने प्रभुजि फेनि तोहराके एक-दोसरि जनसे हसे जम्‍मे मन्‍सावानिसे प्रेममा प्रसस्‍त मतरामा बढादेहुँ कहके हमरा यासा करले बडहुँ।

¹³ परमेस्‍वर तोहार हृदयके बरियार बनादिय, ताकि हमार प्रभु येसुजि यापन जम्‍मे पवितर जनसाङे फेरि यवइकि हमार परमेस्‍वर पिताक यागा तोहरा पवितर हसे निरदोस हखबह।