१ थेसलोनिकि 2 - चितवनिया थारु

थेसलोनिकिमा पावलक काम

¹ हेरह प्रियसभ, तोहारसाङे हमार भेटघाट व्‍यरथ हइने भेलइ कहके तोहार थाह बडइ।

² तोहार लघिना यइलिसे यागा हमरा फिलिप्‍पि सहरवामा कस्‍के दुःख पउलहुँ हसे यपमानित भेलहुँ, उअ बतवा तोहार थाह बडइ। ताफेनि बहुत विरोधि हखते-हखते फेनि परमेस्‍वरमा सहास पाके हमरा तोहराके सुसमाचार सुनोलहुँ।

³ केहकेकि हमार परचार खराब कि असुद्ध मनसे हइने याइल, न त हमरा ककरहुँके छल करइ बडहुँ।

⁴ बाकि परमेस्‍वर हमराके योग्‍य देखके सुसमाचार परचार करेके जिम्‍मा देले बडसि। उहेसे हमरा मन्‍सावानिके खुसि पारेके तहिँया हइने, बाकि परमेस्‍वर, जुने हमार मनवा जचससि हुनेके खुसि पारेके तहिँया हमरा सुसमाचार सुनोसहुँ।

⁵ तोहार थाह बडइ कि, हमरा तोहराके चिपलाट बात हइने करलहुँ न त किहो चिजु पउबहुँ कहके लोभ करलहुँ। यकर साछि परमेस्‍वर बडसि।

⁶ हमरा मन्‍सावानिसे यादर हइने खोजलहुँ, न तोहारसे, न दोसरि जनसे। ख्रिस्‍टक प्रेरित भेलेसे त हमरा तोहारसे यादर माग करे सकतहुँ।

⁷ जसने एगुडा दाओ यापन बचवानिक देखभाल करसिय, वसने हमरा फेनि तोहारसाङे नम्र व्‍यबहार करलहुँ।

⁸ हमरा तोहराके बहुत माया करलेसे, परमेस्‍वरक सुसमाचार परचार मतरे हइने करलहुँ, बाकि यापन जिवन देवेके तहिँया फेनि तयार भेलहुँ, केहकेकि तोहरा हमार तहिँया प्रिय भेल रहलह।

⁹ प्रियसभ, तोहराके हमार खाँ मेहनत हसे दुःखवाक बारेमा याद बडइ, केहकेकि तोहराके परमेस्‍वरक सुसमाचार सुनोइकि ककरोमा भार झिनपरइ कहके हमरा दिन-रात मेहनत करलहुँ।

¹⁰ तोहरा विस्‍वासिसभसाङे रहइकि हमार व्‍यबहार पवितर, ठिक हसे निरदोस रहलइ। तोहरा हसे परमेस्‍वर फेनि इअ बतवाक साछि बडह।

^11-12 केहकेकि तोहार थाह बडइ कि, जसने बाबा यापन बेटवा-बेटियानिसाङे व्‍यबहार करसइ, वसने हमरा फेनि तोहरा जम्‍मे जनके यरति-उपदेस देलहुँ, सहास देलहुँ हसे जुन परमेस्‍वर तोहराके यापन राज तके महिमामा बलोलसि, हुनेक मन परना जिवन जिएके तहिँया बिन्‍ति करलहुँ।

¹³ उहेसे हमरा फेनि सबदिन परमेस्‍वरके धन्‍यवाद देसहुँ, केहकेकि जुन परमेस्‍वरक वचन हमरा तोहराके सुनोलहुँ, तोहरा उअ वचनवाके मन्‍सेक बात हखइ कहके हइने, बाकि वास्‍तवमा परमेस्‍वरक सत्‍य वचन हखइ कहके सुनके गरहन करलह। उअ वचनवा तोहार विस्‍वासिसभक जिवनमा काम करइ बडइ।

¹⁴ केहकेकि हेरह प्रियसभ, तोहरा यहुदिया छेतरमा भेलि येसु ख्रिस्‍ट परमेस्‍वरक मन्‍डलियानिक विस्‍वासिसभक देखासिखि करलह। केहकेकि हुनुका यहुदियानिसे जसने दुःख पउलइ, वसने तोहरा फेनि यपने जातिक मन्‍सावानिसे दुःख पउले बडह।

¹⁵ उहे यहुदि मन्‍सावाह अगमवक्‍तावानिके मारलइ। हुनुका प्रभु येसुजिके फेनि मारलइ हसे हमराके फेनि खेदलइ। हुनुका परमेस्‍वरक मन हइने परना काम करलइ तके जम्‍मे मन्‍सावानिक विरोधि भेलइ।

¹⁶ केहकेकि, जुन मुक्‍तिक समाद सुनके अयहुदि मन्‍सावाह मुक्‍ति पउतइ, उअ समाद सुनावेके कमवामा यहुदि मन्‍सावा हमराके बाधा देतइ। वसने करके हुनुका यापनमा पाप थपते गेलइ, बाकि याखिरमा परमेस्‍वरक खिस हुनुकर वपरा परलइ।

¹⁷ केहकेकि हेरह प्रियसभ, जब यहुदि मन्‍सावाह हमराके सतोलइ हसे हमरा एघरिक तहिँया तोहारसे तनाउ रहलहुँ, हमार मनवा तोहरेसाङे रहलइ। तोहराके यामने-सामने भेटेके बहुत इछा भेलेसे हमरा तोहार लघिना जायके तहिँया सकभर बहुत कोसिस करलहुँ।

¹⁸ हमरा तोहार लघिना यावे खोजइ रहलहुँ। मुइ, पावल त झन घर-घराहे यावेके कोसिस करलहिँ, बाकि सइतनवा हमराके बाधा देलिय।

¹⁹ जब हमार प्रभु येसुजि यबसि, तखनहिँ हुनुकर यागा तोहरा हमार यासा, आनन्‍द हसे घमन्‍डक मकुट हइने हखह त?

²⁰ तोहराहिँ हमार गउरव हसे आनन्‍द हखह।