१ थेसलोनिकि 1 - चितवनिया थारु1 थेसलोनिकिक मन्डलियामा भेलि परमेस्वर पिता हसे प्रभु येसु ख्रिस्टक विस्वासिसभके मुइ पावल, सिलास हसे तिमोथिसाङे इअ चिठिया लिखइ बडहिँ। परमेस्वर तोहराके अनुग्रह हसे सान्ति दिय। थेसलोनिकिक मन्सावानिक विस्वास 2 हमार परथानामा तोहरा जम्मे जनके सम्झते तोहार तहिँया सबदिन परमेस्वरके धन्यवाद देसहुँ, 3 हसे विस्वाससे करल तोहार काम, प्रेमसे करल मदत तके हमरा प्रभु येसु ख्रिस्टमा रखलि तोहार यसरासे बरियार भेल परमेस्वर हमार पिताक यागा हमरा सबदिन सम्झइरहसहुँ। 4 हेरह प्रियसभ, हमार थाह बडइ कि, परमेस्वर तोहराके प्रेम करलेसे तोहराके चुनले बडसि। 5 केहकेकि हमार सुनोलि सुसमाचार तोहार लघिना बातमा मतरे हइने, बाकि सक्तिमा फेनि, पवितर-आत्मामा हसे पुरा निस्चितसाङे यलइ। हमरा तोहारसाङे रहइकि तोहार तहिँया कस्नुक जिवन जियलहुँ कहके तोहार थाह बडइ। 6 तोहरा हमार हसे प्रभुक देखासिखि करलह, केहकेकि सतावटमा फेनि तोहरा पवितर-आत्माक देलि आनन्दसे सुसमाचार गरहन करलह। 7 यसने तोहरा माकेडोनियाक याको छेतरक ठउरियाक विस्वासिसभक हसे अखइया छेतरमा भेलि जम्मे विस्वासिसभक तहिँया एगुडा नमुना बनल बडह। 8 तोहार कारनसे परमेस्वरक वचन माकेडोनिया हसे अखइयामा मतरे हइने फइललइ, बाकि परमेस्वरमा तोहार विस्वासक बात फेनि जम्मे ठउरियामा फइललइ। उहेसे यकर बारेमा किहो कहेके आवस्यक हइने बडइ। 9 केहकेकि हमरा तोहार लघिना यवइकि तोहरा हमराके कस्के स्वागत करलह हसे जिउते तके सत्य परमेस्वरक सेवा करेके तहिँया मुरति पुजासे कस्के फिरलह, वकर बारेमा मन्सावाह यपनहिँ कहइ बडइ। 10 परमेस्वरक पुतर येसुजि, जकरेके परमेस्वर मरलिसे जिउतोले बडसि, हुने स्वरगसे यबसि कहके कस्के तोहरा इसियाइ बडह कहके हुनुका कहइ बडइ। हुनेहिँ यावे लगइकि परमेस्वरक खिससे हमराके बचोइ बडसि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.