१ पतरुस 5 - चितवनिया थारुएल्डरवाह हसे ढोठनियावासभके सल्लाह 1 मुइ फेनि मन्डलिक एगुडा एल्डर भेलेसे ख्रिस्टक भोगलि कस्टके यपनहिँ देखले बडहिँ हसे पाछा यइना महिमामा सहभागि हखबहिँ। उहेसे मुइ तोहार बिचा भेलि एल्डरवानिके बिन्ति करके कहइ बडहिँ, 2 तोहार देखभालमा राखल परमेस्वरक बगालक हेरचाह करिह। इअ कमवा तोहरा करसे हइने बाकि सोइछासे, धनक लोभसे हइने, बाकि सेवा करना मन लेके करिह। 3 तोहार जिम्मामा भेलि विस्वासिसभक वपरा अधिकार नाहिँ चलाके, बरु हुनुकर तहिँया उदाहरन बनिह। 4 जब मुख्य भेडहरवा ख्रिस्ट परकट हखबसि, तोहरा सबदिन चम्कइ रहना मकुट पउबह। 5 वसने करके ढोठनियावाह, बुढ मन्सेसभक अदलमा रहिह। तोहरा जम्मे जन नम्र भके एक-दोसरि जनक सेवा करिह। केहकेकि, “परमेस्वर घमन्डि मन्सावानिके विरोध करससि, बाकि नम्र मन्सावानिके दाया देखोससि।” 6 उहेसे परमेस्वरक सक्तिसालि हथवाक तर यपनहिँके नम्र बनोइह, हुने ठिक जुनवामा तोहराके उँच पारबसि। 7 तोहार जम्मे चिन्ता-फिकरि हुनेमा सोपदिह, केहकेकि हुने तोहार वास्ता करससि। 8 सुद्ध मन राखके चेतले रहिह, केहकेकि तोहार सतरु सइतनवा ककरेके फेला पारु हसे खाउ कहके गुरनाइकि सिंह नहिँया खोजते घुमसिय। 9 विस्वासमा बरियार भके वकर विरोध करिह हसे इअ जनिह कि, संसारभरक तोहार विस्वासि भयवाह फेनि यसने दुःख भोगइ बडइ। 10 तोहरा किहो समय कस्ट भोगलेपर, हमार महान दयगर परमेस्वर, जुने तोहराके ख्रिस्टमा अनन्त महिमामा सहभागि हखेके तहिँया बलोले बडसि, हुने यपनहिँ तोहराके फेरि स्थापना करबसि, सिद्ध बनोबसि, बरियार बनाके स्थिर करबसि। 11 हुनेक जम्मे सक्ति सबदिन रहइ। आमेन। अन्तिम अभिवादन 12 मोर विस्वासयोग्य भाइ सिलासक मदतसे मुइ इअ झिनकि चिठिया लिखइ बडहिँ। मुइ तोहराके सहास देवेके तहिँया हसे तोहार तहिँया जथि हखइ बडइ, उअ परमेस्वरक सदि अनुग्रह हखइ कहके गवाहि देवे चाहसहिँ। इअ अनुग्रहमा डटके रहिह। 13 यहवाँ बेबिलोनमा तोहार नहिँया चुनइलि मन्डलियाक सदस्यसभ हसे मोर सदि बेटवा मरकुस फेनि तोहराके अभिवादन पठोले बडिय। 14 एक-दोसरि जनके पवितर प्रेमसे अभिवादन करिह। ख्रिस्टमा भेलि तोहरा जम्मे जनके सान्ति हखइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.