१ पतरुस 3 - चितवनिया थारुजनि हसे मरदसभ 1 जनियावाह, तोहरा यापन-यापन मरदावानिक अदलमा रहिह, ताकि वसने करले परमेस्वरक वचन विस्वास हइने करलाहर मरद फेनि तोहार चालचलनक कारनसे विस्वास करतइ। तोहरा किहो कहे नाहिँ परतइ, 2 केहकेकि तोहार सुद्ध हसे यादरनिय जिवन देखके, हुनुका विस्वास करतइ। 3 तोहार देखसार केसक सिङार, सोनक गहना-गुरिया हसे डउल-डउल लुगाफाटासे हइने यसइ। 4 बरु तोहार भितरि हृदयके, नम्र हसे सान्त आत्माक नास हइने हखना रत्नसे सजोइह, जुन परमेस्वरक नजरमा बहुत मोलक बडइ। 5 केहकेकि यसने परमेस्वरमा भरोसा करलाहर पहिलाक पवितर जनिसभ यापन मरदावानिक अदलमा रहके यपनहिँके सिङार-पटार करइ। 6 जसने सारा, यापन मरदावा अब्राहमके प्रभु मानके वकर कहलि मनिय। यगर तोहरा डउल काम करबह हसे किहो बातमा नाहिँ डेरेबह जउँ, तोहरा वकरे बेटिसभ हखह। 7 वसने करके मरदावाह, यापन जनियावानिके कमजोर सहयोगि मानके व्यबहार करिह हसे परमेस्वरक देलि जिवनक वरदानक बराबर हकदार मानके यादर करिह, ताकि तोहार परथानामा किहो फेनि बाधा झिन यवइ। यसल काम करइकि यइना कस्ट 8 याखिरमा मुइ इअ कहबहिँ, तोहरा जम्मे जन एके मनक हखे परतइ हसे एक-दोसरि जनके दाया देखोइह। ददेर-भाइक नहिँया एक-दोसरि जनके प्रेम करिह। तोहरा कोमल हृदयक तके नम्र स्वभावक मन्से हखिह। 9 खराबक बदला खराब कि यपमानक बदला यपमान झिन करिह। बरु खराबक सटहा आसिस दिह, केहकेकि इहे करेके तहिँया परमेस्वर तोहराके बलोले हखसि हसे तोहरा फेनि आसिस पउबह। 10 केहकेकि धरमसास्तरवामा यसके लिखाइल बडइ, “जुने जिवनके प्रेम करतइ हसे यसल दिनसभ देखे खोजतइ, उअ यापन जिभियाके खराबिसे हसे यापन ठोरवाके छलक बात फदकेकेसे यलग रखिय। 11 उअ खराब कामसे फिरिय हसे यसल करिय, उअ सान्तिक खोजि करिय हसे वकरपाछा लगिय। 12 केहकेकि परमेस्वर धरमि मन्सावानिके हेरइ रहससि, हसे हुने हुनुकर परथाना सुनससि। बाकि हुने खराब काम करलहरा मन्सावानिक विरोध करससि।” 13 यगर तोहरा भलाइक काममा लागल रहबह जउँ, कुने तोहार हानि करबिय त? 14 बाकि धारमिकताक खातिर तोहरा दुःख भोगबह जउँ, तोहरा धन्यक हखह। उहेसे हुनुकर धम्किसे तोहरा झिन डेरइह हसे झिन हडबडइह। 15 बरु तोहार हृदयमा ख्रिस्टके प्रभु मानके सम्मान करिह। यगर कुनहुँ तोहारमा भेल यसराक बारेमा पुछभाख करतइ जउँ, तोहरा जवाफ देवेके तहिँया जखनि फेनि तयार रहिह। 16 बाकि नम्र हसे यादरसे सुद्ध विवेकसे जवाफ दिह। यगर तोहरा यसके करबह जउँ, ख्रिस्टमा तोहार यसल चालचलनके दोस लगाके बदनाम करलहरा लजियामा परतइ। 17 इअ कारनसे, खराब करके दुःख भोगलिसे, यगर परमेस्वरक इछा इअ हखइ जउँ भलाइ करके दुःख भोगले यसल हखइ। 18 केहकेकि हमराके परमेस्वरमा पुगावेके तहिँया ख्रिस्ट धरमि भके फेनि अधरमिसभक पापक तहिँया एकपल्टा दुःख भोगलसि। हुने देहियामा मरलसि, बाकि परमेस्वर हुनेके आत्मामा जिउतोलसि, 19 हसे हुने उहे आत्मामा जाके कइदमा परलि आत्मासभके परचार करलसि, 20 जुन आत्मासभ पहिला परमेस्वरक आग्या पालन हइने करलइ, तब परमेस्वर हिनिका यापन पापसे फिरइ कहके सहसानसे इसियाइ रहलसि, जखनि नोहा पानि जहजवा बनोइ रहलिय। उअ दहवाक पनियासे आठ जन मतरे बचलइ। 21 इहे पनिया बप्तिस्माक संकेत करसिय, जुन तोहराके यखनि बचोसिय। बप्तिस्मा देहियाक मइल धोवइकि नहिँया हइने, बाकि सुद्ध विवेक पावेके तहिँया परमेस्वरके बिन्ति हखइ हसे इअ तोहराके येसु ख्रिस्टक पुनरुत्थानसे उद्धार करइ बडिय। 22 याबे हुने स्वरगमा जाके यखनि परमेस्वरक दहिनिकलहरवा सम्मानित ठउरिमा बेठल बडसि हसे स्वरगदुतवाह, अधिकार चलोलहराह तके सक्तिसभ हुनेक अदलमा बडइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.